Azərbaycan nümayəndə heyəti Dünya Gömrük Təşkilatının konfransında iştirak etmişdir

Dövlət Gömrük Komitəsinin (DGK) mətbuat xidmətindən bildirmişlər ki, mayın 18-19-da Norveç Krallığının Bergen şəhərində 44 ölkədən 97 nümayəndənin iştirakı ilə Dünya Gömrük Təşkilatının (DGT) Avropa regionu üzrə gömrük xidməti rəhbərlərinin konfransı keçirilmişdir.

Tədbirdə Azərbaycanı Dövlət Gömrük Komitəsinin sədri, gömrük xidməti general-leytenantı Aydın Əliyevin başçılığı ilə nümayəndə heyəti təmsil etmişdir.

Konfransda "DGT-nin XXI əsrdə gömrük strategiyası: sərhəd idarəetməsində daha səmərəli qarşılıqlı işin təşkili", "XXI əsrdə gömrük işinin əsas prioritetləri və tələbatları", gömrükdə "bir pəncərə" prinsipinin tətbiqi mexanizmləri, təşkilati məsələlər və s. müzakirə edilmişdir.

Tədbirin açılış mərasimində DGT sədri Martin Dan, baş katib Kunio Mikuriya, Norveç Gömrük Xidmətinin baş direktoru Byorn Ross, DGT sədrinin Avropa regionu üzrə müavini xanım Jozefin Fihili və başqaları çıxış etmişlər.

Konfransda Azərbaycan nümayəndə heyəti Avropa üzrə yeganə regional ofisin açılması ilə bağlı təqdimatla çıxış etmişdir.

Təqdimatın birinci hissəsində ölkəmizin qədim və zəngin tarixindən, bugünkü hərtərəfli inkişafından, əldə olunan nailiyyətlərdən, Azərbaycan gömrüyünün keçdiyi inkişaf yolundan bəhs edən film nümayiş etdirilmişdir. Qeyd olunmuşdur ki, xalqımızın ümummilli lideri Heydər Əliyevin gömrük sisteminə də gündəlik diqqət və qayğısı qısa müddətdə bu sahənin inkişafını xeyli sürətləndirmişdir. Xidmət iqtisadi təhlükəsizliyin təminatçısı olan aparıcı strukturlardan birinə çevrilmişdir. Ulu öndərin siyasi xəttinin layiqli davamçısı, Prezident İlham Əliyevin dəstəyi sayəsində müstəqil Azərbaycanın gömrük xidməti artıq nümunəvi bir dövlət qurumuna çevrilmiş, dünya gömrük ailəsində özünə layiqli yer tutmuşdur.

Təqdimatın ikinci hissəsində regional ofisin açılması ilə bağlı Azərbaycan gömrük xidmətinin yerinə yetirdiyi öhdəliklər, eləcə də bir sıra təşkilati məsələlər barəsində nümayəndə heyətinin rəhbəri, DGK-nın sədri Aydın Əliyev konfrans iştirakçılarına ətraflı məlumat vermişdir.

Türkiyə, Rusiya, Gürcüstan, Qazaxıstan, Macarıstan, İsrail, İrlandiya və digər ölkələrin nümayəndə heyətlərinin rəhbərləri təqdimatı yüksək qiymətləndirmiş, respublikamızda regional ofisin açılmasına müsbət rəy vermişlər. Azərbaycan tərəfinin bu təklifinə DGT-nin iyunda keçiriləcək sessiyasında baxılması qərara alınmışdır.

Konfransda Makedoniyada və Qazaxıstanda DGT regional tədris mərkəzlərinin açılması ilə bağlı müvafiq qərarlar qəbul edilmiş, Belarus gömrük xidməti təmsilçisinin ölkə gömrüyünün hazırkı durumu barədə məlumatı dinlənilmişdir.

Tədbirdə Macarıstan gömrük xidmətinin rəhbəri Yanoş Naqin yekdilliklə DGT baş katibinin Avropa regionu üzrə müavini seçilmişdir.

Konfransın ikinci günü Azərbaycan nümayəndə heyətinin üzvü, DGK Statistika və İnformasiya Texnologiyaları Baş İdarəsinin rəisi İqbal Babayev "Azərbaycan Respublikası dövlət sərhədinin buraxılış məntəqələrindən keçirilən malların və nəqliyyat vasitələrinin yoxlanılmasında "Bir pəncərə" prinsipinin tətbiqi haqqında" məruzə ilə çıxış etmişdir. Bir sıra ölkələrin - Qazaxıstan, Slovakiya, Polşa, Latviya, Estoniya və başqa nümayəndə heyətləri bu təcrübədən yararlanmaq üçün Azərbaycan tərəfinə müraciət etmişlər.

Azərbaycan nümayəndə heyətinin DGT-nin baş katibi Kunio Mikuriya ilə görüşü də olmuşdur. Görüşdə ikitərəfli münasibətlərdən söhbət açılmış, Bakıda keçirilmiş İslam Konfransı Təşkilatı hüquq-mühafizə orqanları rəhbərlərinin iclası barədə məlumat verilmiş və qəbul edilmiş Bakı Bəyannaməsi K.Mikuriyaya təqdim olunmuşdur.

AzərTAc

Azərbaycan.-2009.-26 may.-S.7.