Bakıda "Məzun-2009" yarmarkası təşkil olunmuşdur

Mayın 26-da Azərbaycan Dövlət İqtisad Universitetində Gənclər və İdman Nazirliyinin dəstəyi ilə 28 may - Respublika Gününə həsr olunmuş IV məzun yarmarkası keçirilmişdir.

"Məzun-2009" yarmarkasında respublikanın 70-ə yaxın holdinq, şirkət və bankları, bir sıra nazirliklər və dövlət idarələri 700-dən çox vakant iş yerləri təklifi ilə iştirak etmişlər. Yarmarkada iştirak etmək üçün ayrı-ayrı ali məktəblərdən 3 minə yaxın məzun öncədən öz SV-lərini göndərmişdir.

Universitetin rektoru, Milli Məclisin Elm və təhsil komitəsinin sədri professor Şəmsəddin Hacıyev bildirmişdir ki, yarmarkanın məqsədi respublikanın bütün iqtisadyönümlü universitetlərini bitirən bakalavr və magistrləri işlə təmin etməkdir. Bu da ölkədə aparılan siyasətlə tamamilə üst-üstə düşən bir prosesdir və dövlətimizin başçısının gənclər siyasəti, məşğulluq probleminin həlli ilə bağlı qarşıya qoyduğu vəzifələrin həyata keçirilməsi istiqamətində atılan addımlardandır.

Ş.Hacıyev bildirmişdir ki, məzun yarmarkası dördüncü ildir keçirilir və ənənəyə çevrilmişdir. Bolonya prosesinə qoşulduqlarını deyən rektor prosesin ən mühüm prinsiplərindən birinin də məzunların işə düzəldilməsi ilə bağlı olduğunu vurğulamış, bu sahədə tədbirlərin görüldüyünü söyləmişdir.

Milli Məclis Sədrinin müavini Bahar Muradova, Naxçıvan Dövlət Universitetinin rektoru, Milli Məclisin deputatı, akademik İsa Həbibbəyli, Milli Məclisin Sosial siyasət komitəsinin sədri Hadi Rəcəbli və başqaları belə yarmarkaların keçirilməsinin əhəmiyyətli olduğunu, ali məktəbləri bitirən məzunların ixtisasları üzrə iş tapmasına kömək göstərəcəyini bildirmiş, son illər ölkədə aparılan islahatlar nəticəsində təhsil sistemində əldə olunan nailiyyətlərdən, Azərbaycanda bu sahənin inkişafına göstərilən yüksək dövlət qayğısından danışmışlar. Bildirilmişdir ki, yarmarka ADİU-da son zamanlar sistemli şəkildə tətbiq olunan yeni iqtisadi təhsil modelinin mühüm tərkib hissəsidir və bu zaman tədris prosesinə dövlət qurumları və özəl şirkətlər bilavasitə cəlb olunurlar.

Sonra qonaqlar yarmarkada iş təklif edən şirkətlərlə, müəssisələrlə və başqa qurumlarla yaxından tanış olmuşlar.

Yarmarka zamanı məzunların demokratik prinsiplərə uyğun və şəffaflıq şəraitində dövlət və biznes strukturlarının nümayəndələri ilə görüşləri təşkil edilmişdir.

AzərTAc

Azərbaycan.-2009.-27 may.-S.4.