Fəxri Xiyabanda anım

Yazdığı əsərlərlə Azərbaycan ədəbiyyatında özünəməxsus iz qoymuş xalq yazıçısı İlyas Əfəndiyevin 95 illik yubileyinə həsr olunmuş silsilə tədbirlər davam edir. Dünənsə rəsmi şəxslərin, eləcə də ölkənin tanınmış sənət adamlarının iştirakı ilə yazıçının Fəxri Xiyabandakı məzarı ziyarət edilib. Ziyarətcilər tərəfindən yazıçının məzarı üstünə gül-çiçək dəstələri qoyulduqdan sonra xatirə nitqləri söylənilib. İlk çıxış edən mədəniyyət və turizm naziri Əbülfəs Qarayev, İlyas Əfəndiyevin xatirəsinə toplaşanları salamlayaraq, yazıçının yaradıcılığını «ömrün böyük anları» adlandırdı.

“Sözsüz ki, İlyas Əfəndiyevin yaradıcılığı haqqında daha geniş ədəbiyyat adamları, tənqidçilər danışa bilərlər. Amma mən onun yaradıcılığında bir amili önə çəkmək istəyirəm. İlyas Əfəndiyevin əsərlərində vətənpərvərlik, vətən sevgisi, doğma Qarabağa bağlılıq, Azərbaycanın bütövlüyü əsas qayə olaraq önə çəkilir. Bunlar yazıçının bütün əsərlərində qırmızı xətlə keçir. Və məhz onun əsərlərinə ölməzlik gətirən də bu xəttə sadiqlikdir. Artıq neçə illərdir ki, Azərbaycan Milli Dram Teatrında teatr mövsümü İlyas Əfəndiyevin “Hökmdar və qızı” əsəri ilə açılır. Bu, teatr ictimaiyyətinin İlyas Əfəndiyev sənətinə, onun əsərlərinə sevginin təzahürüdür. Ənənə davam edir və biz çalışırıq ki, hər teatr mövsümündə xatırlatdığım tamaşa yeni quruluşda, yeni aktyorların iştirakı və yeni rejissor işi ilə tamaşaçılara təqdim edilsin. İlyas Əfəndiyev klassik dramaturgiya üzrə dəyərli əsərlər yaradıb. Eyni zamanda, müasirliyi də öz yaradıcılığına gətirməyi bacararaq, lirik-psixoloji janrda dramaturji yaradıcılığını davam etdirdi və bu əsərlər bizim hər birimizin sevə-sevə mütaliə etdiyimiz əsərlərdir”.

Azərbaycan Yazıçılar Birliyinin sədri, xalq yazıçısı Anar isə İlyas Əfəndiyevi 95 il əvvəl xalqımızın bəxtinə düşmüş pay adlandırdı.

“Onun əsərləri ilə fikrimi ifadə edərək deyə bilərəm ki, “Sən həmişə bizimləsən”. İlyas müəllimin xatirəsi həm də mənimlədir. Demək olar ki, onunla bağlı xatirələrimi yazıya alaraq tamamlamışam. Allah ona qəni-qəni rəhmət etsin”.

Azərbaycan Teatr Xadimləri İttifaqının sədri Azərpaşa Nemətov İlyas Əfəndiyevin səhnə həyatı almış əsərləri haqqında danışaraq, onun Cənubi Azərbaycan mövzusuna müraciət etməsini böyük cəsarət nümunəsi olduğunu qeyd etdi. Respublikanın xalq artisti Amaliya Pənahova isə yazıçının səhnələşdirilmiş əsərlərində aldığı rolların xarakterindən danışaraq, onu insan psixologiyasının bilicisi adlandırdi. Xalq şairi Zəlimxan Yaqub İlyas Əfəndiyevi böyük vətənpərvər, onun əsərlərini isə milli kimliyimizi yada salan dərslik adlandırdı.

Respublikanın tanınmış bir çox sənət adamlarının çıxışından sonra yazışının oğlu Elçin, Əfəndiyevlər ailəsi adından çıxış edərək, mərasimlərə toplaşanlara təşəkkür etdi.

Sabutay

Mədəniyyət. - 2009.- 27 may.- S. 3.