Ankarada Heydər Əliyev küçəsinin açılışı olmuşdur

Noyabrın 6-da Ankaranın Batıkənd məhəlləsində Heydər Əliyev küçəsinin açılışı olmuşdur.

Azərbaycan Prezidenti İlham Əliyev, xanımı Mehriban Əliyeva, habelə Türkiyənin energetika və təbii sərvətlər naziri Hilmi Gülər və xanımı, Ankara Böyük Şəhər Bələdiyyəsinin sədri Melih Gökçek mərasimdə iştirak edirdilər.

Mərasimə toplaşanlar dövlətimizin başçısını və xanımını hərarətlə salamladılar.

Prezident İlham Əliyev və Ankara Böyük Şəhər Bələdiyyəsinin sədri Melih Gökçek Heydər Əliyev küçəsinin açılışını bildirən lövhə üzərindən örtüyü götürdülər. Lövhənin üzərində "Heydər Əliyev küçəsinin açılışı Azərbaycan Prezidenti İlham Əliyevin və Ankara Böyük Şəhər Bələdiyyəsinin sədri Melih Gökçek tərəfindən 2008-ci il noyabrın 6-da olmuşdur" sözləri yazılmışdır.

Dövlətimizin başçısına məlumat verildi ki, uzunluğu 900 metrə yaxın olan bu küçəyə 2008-ci ilin iyununda ulu öndər Heydər Əliyevin adı verilmişdir. Ətrafda Heydər Əliyev adına ibtidai məktəb, ümummilli liderin adını daşıyan park, yaşayış evləri, ofislər və inzibati binalar yerləşir. Ətraf ərazi abadlaşdırılmışdır.
Ankaralılar türk dünyasının böyük oğlu Heydər Əliyevin xatirəsini əziz tuturlar və küçəyə onun adının verilməsi də böyük şəxsiyyətə olan hörmət və məhəbbətin nümunəsidir.

AzərTAc

Azərbaycan.-2008.-7 noyabr.-S.3.