"İnternational Herald Tribune": Azərbaycan Prezidenti Türkiyənin Qafqazda sülh səylərini dəstəkləyir

AzərTAc xəbər verir ki, ABŞ-ın nüfuzlu "İnternational Herald Tribune" qəzetinin 5 noyabr tarixli nömrəsində Azərbaycan Prezidenti İlham Əliyevin Türkiyəyə rəsmi səfəri ilə bağlı "Associated Press" agentliyinin xəbəri dərc edilmişdir.

Yazıda deyilir ki, Ankarada səfərdə olan Azərbaycan Prezidenti İlham Əliyev Türkiyənin irəli sürdüyü Qafqazda Sabitlik və Əməkdaşlıq Platformasını dəstəklədiyini bildirmişdir. Qəzet yazır: "Türkiyə Prezidenti Abdullah Güllə görüşdən sonra İlham Əliyev demişdir ki, o, Türkiyənin regiona sülh və sabitlik gətirmək istiqamətində səylərini dəstəkləyir.

Avqustda Gürcüstan və Rusiya arasında baş verən münaqişədən sonra Türkiyə Qafqazda Sabitlik və Əməkdaşlıq Platformasının yaradılması təşəbbüsü ilə çıxış etmişdir. Prezident Abdullah Gül hətta xoşməramlı addım ataraq sentyabrda Ermənistana səfər etmişdir".

Yazıda Prezident İlham Əliyevin bu bəyanatının Türkiyənin təklifinin reallaşmasına təkan verəcəyi vurğulanır. Həmçinin qeyd edilir ki, bu platforma Ermənistana və Azərbaycana Dağlıq Qarabağ münaqişəsi ilə bağlı aralarında olan ziddiyyətləri aradan qaldırmaq üçün yeni imkanlar yaradır.

Azərbaycan.-2008.-7 noyabr.-S.4.