Avropa ölkələrini təmsil edən jurnalistlər Azərbaycanda

AzərTAc xəbər verir ki, Milli Məclisdə ölkəmizdə səfərdə olan Avropa İttifaqına üzv ölkələrin jurnalistləri ilə görüş keçirilmişdir.

Milli Məclisin İqtisadi siyasət daimi komissiyasının sədri Ziyad Səmədzadə parlamentin iqtisadi qanunvericilik bazası, rəhbərlik etdiyi komissiyanın fəaliyyəti, ölkəmizdə aparılan islahatlar, Azərbaycanın təşəbbüskarı və iştirakçısı olduğu regional layihələr barədə ətraflı məlumat vermişdir.

Bildirilmişdir ki, müstəqilliyinin ilk illərində bir sıra çətinliklərlə, eyni zamanda, erməni təcavüzü nəticəsində ciddi iqtisadi böhranla üzləşən Azərbaycan artıq dünyada islahatçı ölkə kimi tanınır. Azərbaycanda büdcə gəlirləri, adambaşına düşən ümumi daxili məhsulun həcmi ötən illərlə müqayisədə xeyli artmışdır.

Z.Səmədzadə qonaqların gəlişinin çox əlamətdar bir dövrə təsadüf etdiyini, respublikamızda prezident seçkilərinin yenicə başa çatdığını və Azərbaycan xalqının ümummilli lideri Heydər Əliyevin siyasi xəttinin layiqli davamçısı İlham Əliyevin yenidən 5 il müddətinə ölkəmizin rəhbəri seçildiyini xüsusi vurğulamışdır.
Milli Məclisin Hüquq siyasəti və dövlət quruculuğu məsələləri daimi komissiyasının sədri Əli Hüseynov Avstriya, Çex, Finlandiya, İrlandiya, İsveçrə və digər ölkələrdən gəlmiş jurnalistlərə Azərbaycanın Avropa İttifaqı, eləcə də digər nüfuzlu beynəlxalq təşkilatlarla qarşılıqlı əlaqələrindən söhbət açmışdır. Bildirmişdir ki, torpaqlarımızın 20 faizi erməni təcavüzkarları tərəfindən işğal olunmuşdur. Bir milyondan artıq yurddaşımız öz tarixi dədə-baba torpaqlarından qovularaq qaçqına-köçkünə çevrilmişdir. Ə.Hüseynov təkcə Cənubi Qafqazda deyil, bütün dünyada lider dövlət kimi tanınan Azərbaycanın bu problemin sülh yolu ilə, beynəlxalq hüquq normaları çərçivəsində həllini tapmasında Avropa İttifaqının dəstəyinə ümid etdiyini diqqətə çatdırmışdır.

Nümayəndə heyətinin üzvləri Johanna Ruzicka, İya Ban, Miçal Kacevic və digərləri səmimi görüşə və ətraflı məlumata görə təşəkkür etdilər. Ölkəmizdə müşahidə etdikləri inkişafdan məmnun qaldıqlarını bildirən qonaqlar onları maraqlandıran məsələlər barəsində suallar verdilər.

Görüşdə Azərbaycanla Avropa İttifaqı arasında əlaqələrin inkişaf perspektivləri, qarşılıqlı səfərlərin təşkili, regional əməkdaşlığın inkişafı, özəlləşdirmə, işsizliyin azaldılması və digər məsələlər barəsində fikir mübadiləsi aparılmışdır.

Azərbaycan.-2008.-8 noyabr.-S.2.