Beynəlxalq konfrans "Bakı gənclər təşəbbüsü"nü qəbul etmişdir

AzərTAc xəbər verir ki, noyabrın 8-də Bakıda "İslamofobiya və ksenofobiyanın müxtəlif növləri: gənclərə təsir və onların qarşısının alınmasında gənclərin iştirakı" mövzusunda beynəlxalq konfrans başa çatmışdır.

Gənclər və İdman Nazirliyinin, Avropa Şurasının, İSESKO-nun, Avropa Gənclər Forumunun və İslam Konfransı Təşkilatının "Dialoq və əməkdaşlıq uğrunda" Gənclər Forumunun himayəsi ilə "Dini fərqlərə baxmayaraq" devizi altında keçirilən konfransda 43 ölkədən 124 nümayəndə iştirak etmişdir.

Gənclər və idman naziri Azad Rəhimov forumun iştirakçılarına müraciətində bildirmişdir ki, beynəlxalq komanda olduqca yaxşı və faydalı iş görmüşdür. Dörd gün davam edən gərgin diskussiyalar, bilik mübadilələri dünyanın müxtəlif ölkələrindən olan və müxtəlif dinlərə etiqad edən insanları birləşdirmişdir. Konfransın qəbul etdiyi "Bakı gənclər təşəbbüsü" baza sənədidir. Nazir əmin olduğunu bildirmişdir ki, əməkdaşlıq bu sahədə gənclərimizin rifahına xidmət edəcək, xalqlararası dialoqa dəstək olacaqdır.

Avropa Şurası Gənclər və İdman Direktorluğunun rəhbəri Ralf-Rene Veynqartner bildirmişdir ki, konfransın başlıca məqsədinə - gənclərlə işə, islamofobiyaya, ksenefobiyaya, dini dözümsüzlüyün digər növlərinə qarşı mübarizə, insan hüquqlarının müdafiəsi məsələlərinin müzakirəsinə nail olunmuşdur. İşçi qruplar islamofobiya və antisemitizmə, dini dözümsüzlüyün digər formalarına, sosial və irqi ayrı-seçkiliyə qarşı mübarizənin, gender bərabərliyinin, gənclər siyasətinin hüquqi baxımdan əsaslandırılması məsələlərini müzakirə etmiş, gənclər təşkilatları və təsisatları arasında əməkdaşlığın yollarını müəyyənləşdirmiş, mədəniyyətlərarası və dinlərarası dialoqu ardıcıl şəkildə dəstəkləmək üçün tədbirlər nəzərdə tutmuşlar.

Konfransın yekunlarına görə qəbul edilmiş və dinlərarası dialoqa töhfə verə biləcək gənclər layihələrinə maliyyə dəstəyini nəzərdə tutan "Bakı gənclər təşəbbüsü" islamafobiyaya, antisemitizmə, dini və etnik dözümsüzlüyün digər təzahürlərinə qarşı mübarizəyə yönəlmişdir.

İslamafobiya və ksenofobiyaya qarşı mübarizəyə həsr olunmuş növbəti konfrans 2009-cu ildə Tatarıstanın paytaxtı Kazanda keçiriləcəkdir.

Azərbaycan.-2008.- 9 noyabr.-S.3.