Azərbaycan şirkəti "POLEKO-2008" beynəlxalq sərgisində iştirak etmişdir

Polşa Respublikasının Poznan şəhərində "POLEKO-2008" beynəlxalq sərgisi keçirilmişdir. Sərgidə bir çox dövlətləri təmsil edən tanınmış şirkətlər, birgə müəssisələr, firmalar ekologiya sahəsində öz fəaliyyət və nailiyyətlərini əks etdirən stendlər və eksponatlar nümayiş etdirmişlər.

Sərgi çərçivəsində keçirilən seminarlarda ekoloji problemlər müzakirə edilmiş, bu problemlərin həlli üçün birgə fəaliyyətin təşkil edilməsi və qarşılıqlı əməkdaşlıq münasibətlərinin yaradılması tövsiyə olunmuşdur. "Ekol Mühəndislik Xidmətləri" Qapalı Səhmdar Cəmiyyəti də adıçəkilən sərgidə iştirak etmişdir. Burada əsas məqsəd QSC-nin mövcud imkanlarını nümayiş etdirmək, Avropada və dünyanın digər dövlətlərində sifarişçi təşkilatlar tapmaq və öz işini ölkə xaricində inkişaf etdirmək, yeni texnologiyaların və ekoloji layihələrin birgə həyata keçirilməsini təmin etməkdən ibarət olmuşdur.

QSC-nin sərgidə nümayiş etdirdiyi stend, onun fəaliyyət sahələri, Azərbaycanın iqtisadi inkişafı, ARDNŞ-nin həyata keçirdiyi layihələr və əldə etdiyi nailiyyətlər haqqında verilən məlumatlar xarici şirkətlərin marağına səbəb olmuşdur. "Ekol Mühəndislik Xidmətləri" QSC-nin baş direktoru Soltan Əliyev sərgi zamanı bir çox şirkətlərin rəhbərləri ilə görüşlər keçirmiş, ekoloji yönümlü layihələrin birgə həyata keçirilməsi məsələlərini müzakirə etmişdir. Görüşlər zamanı Polşa Respublikasının Ekologiya Nazirliyi nəzdində fəaliyyət göstərən İstehsalat Sahələrinin Ekologiya İnstitutu, "Prote" şirkəti və "ENVİTECH-Net" Ekoloji Texnologiyaların Beynəlxalq Elm Mərkəzi ilə potensial əməkdaşlıq sahəsində ilkin razılıqlar əldə olunmuşdur.

Ətraf mühitin mühafizəsi, tullantıların emalı və ekoloji təhlükəsizlik sahəsində bir çox xidmətlər göstərən İstehsalat Sahələrinin Ekologiya İnstitutu birgə fəaliyyəti genişləndirmək, torpaqların rekultivasiyası və remidasiyası, uzunömürlü yaşıllıqların salınması, monitorinq işlərinin və ekoloji layihələrin həyata keçirilməsi sahəsində əməkdaşlıq barədə "Ekol Mühəndislik Xidmətləri" QSC-yə razılığını bildirmişdir. "ENVİTECH-Net" Mərkəzi isə ekoloji yönümlü biliklərin birgə öyrənilməsi, beynəlxalq tərəfdaşların inteqrasiyası və yeni texnologiyaların tətbiqi sahəsində QSC-nin mərkəzin üzvlüyünə qəbul edilməsini təklif etmişdir. "Ekol Mühəndislik Xidmətləri" QSC-nin "POLEKO-2008" beynəlxalq sərgisində uğurlu iştirakı QSC-nin ekologiya və iqtisadiyyat sahəsində Avropaya inteqrasiyası və potensial əməkdaşlıq münasibətlərinin yaradılması istiqamətində əsaslı zəmin yaratmışdır.

Azərbaycan.- 2008.- 9 noyabr.- S.4.