İctimai-özəl əməkdaşlıq məsələləri müzakirə edilmişdir

AzərTAc xəbər verir ki, noyabrın 25-də Azərbaycanda Amerika Ticarət Palatası (AmCham) və Avrasiya Əməkdaşlıq Fondunun (AƏF) sponsorluğu ilə "Park Hyatt" mehmanxanasında ictimai-özəl əməkdaşlıq üzrə ziyafət təşkil edilmişdir.

Ölkəmizdə səfərdə olan Amerika Birləşmiş Ştatları Beynəlxalq İnkişaf Agentliyinin (USAİD) Administratoru və ABŞ-ın xarici yardımlar üzrə direktoru Henrietta For ziyafətdə çıxış etmişdir.

Xanım For ABŞ və Azərbaycanın biznes rəhbərlərinə USAİD-in Qlobal İnkişaf Alyansı Proqramı barədə məlumat vermiş, diqqəti Azərbaycanda mövcud və potensial ictimai-özəl əməkdaşlıq məsələlərinə cəlb etmişdir. O demişdir: "Qlobal İnkişaf Alyansı mexanizminin geniş istifadəsi USAİD-in əsas prioritetidir. Bizim məqsədimiz öz alyanslarımızın strateji dəyərini artırmaq, beləliklə, dünyada davamlı inkişafı sürətləndirmək yollarını axtarmaqdır".

Henrietta For, həmçinin vurğulamışdır ki, ictimai və özəl sektoru bir araya gətirməklə USAİD özəl sektorun ən yaxşı ideyalarını, idarəetmə texnikasını yer üzündə daha sabit, demokratik, bazaryönümlü cəmiyyətlər yaradan qarşılıqlı faydalı yanaşmalara aparan inkişafa yardım niyyəti ilə birləşdirir. "Mən məmnunluqla qeyd etmək istərdim ki, USAİD-in Qlobal İnkişaf Alyansı Proqramı Azərbaycana gəlib. USAİD və bp-nin rəhbərlik etdiyi neft şirkətləri konsorsiumu Təcili Tibbi Yardımın İnkişafı Proqramını həyata keçirmək üçün Səhiyyə Nazirliyi ilə əməkdaşlıq etmişdir. Bundan əlavə, "Şevron" və "StatioilHydro" şirkətləri USAİD-in "Junior Achievement" layihəsi vasitəsilə Azərbaycanda orta və ali məktəbdə təhsil alanların sahibkarlıq və liderlik qabiliyyətlərini inkişaf etdirməyə kömək göstərəcək. Biz əlavə imkanlar axtarmağa davam edirik", - deyə For bildirmişdir.

Xatırladaq ki, AmCham Azərbaycanda biznesin maraqlarını dəstəkləyən və onu inkişaf etdirən özəl, gəlirsiz biznes assosiasiyasıdır.

Azərbaycan.-2008.-26 noyabr.-S.3.