Strateji Araşdırmalar Mərkəzinin iştirakı ilə Qazaxıstanda "dəyirmi masa" keçirilib

Almatıda Qazaxıstan Respublikası Prezidenti yanında Strateji Araşdırmalar İnstitutu (QSAİ) Azərbaycan Respublikası Prezidenti yanında Strateji Araşdırmalar Mərkəzi (SAM) və Qazaxıstan Respublikasının Birinci Prezidenti Fondu ilə birlikdə "Qazaxıstan-Azərbaycan: qarşılıqlı əlaqələr və əməkdaşlıq perspektivləri" mövzusunda beynəlxalq forum keçirmişdir.

SAM-ın Avropa və Amerikada silsilə tədbirlərindən sonra Mərkəzi Asiyada Qazaxıstanı seçməsi heç də təsadüfi deyil. Birincisi, bu iki qonşu və dost dövlət ənənəvi olaraq siyasi və iqtisadi əlaqələrin inkişafında, regional təhlükəsizlik və beynəlxalq sabitliyin qorunmasında eyni dərəcədə maraqlıdır. İkinci və daha vacib amil isə Qazaxıstan tarixində baş verən hadisələrdə Heydər Əliyevin nümayiş etdirdiyi mövqe ilə bağlıdır.

Mixail Qorbaçov Sovet İttifaqının çökmə mexanizmini "yenidənqurma" adı altında həyata keçirəndə ilk zərbələrdən biri Qazaxıstana dəymişdi. Baş katib Qazaxıstan KP MK-nın birinci katibi Dinməhəmməd Kunayevi vəzifəsindən azad edib, Kovbini təyin edərkən Mərkəzi Komitənin Siyasi Büro üzvlərindən bu qərara etirazını bildirən yeganə şəxs Siyasi Büronun üzvü Heydər Əliyev olmuşdu. O, birmənalı şəkildə bu təyinatla razılaşmayaraq, Qazaxıstanda bu vəzifəyə daha layiqli, məsələn, Nazarbayev kimi kadrların təyin olunmasını məsləhət görmüşdü. Lakin ambisiyalı M.Qorbaçov öz qərarında israrlı oldu. Və onun təyinatı qazax xalqının tarixinə qanla yazıldı. Milli zəmində qarşıdurma yarandı, onlarla günahsız insanın qanı töküldü. Tarix Heydər Əliyevin Qorbaçovdan daha uzaq görən və daha müdrik olduğunu göstərdi. Bu hadisə ötən əsrin sonunda baş versə də, qazax xalqı Heydər Əliyevin Siyasi Büro üzvlərində görünməyən mərdlik və cəsarətini indi də unutmur. İki ölkənin "beyin mərkəzləri"nin keçirdikləri forum məhz bu amilə görə daha maraqlı keçdi. "Dəyirmi masa" formatında keçirilən tədbirdə iqtisadiyyat, energetika, ticarət sahələrində, eləcə də Xəzər regionunda da əməkdaşlıq istiqamətində Qazaxıstanla Azərbaycan arasında münasibətlərin hazırkı durumu və inkişaf perspektivlərinə dair geniş mövzuları əhatə edən məsələlər müzakirə olundu.

"Dəyirmi masa"nın işində QSAİ-nun direktoru Bulat Sultanov, SAM-ın direktoru Elxan Nuriyev, eləcə də Qazaxıstanda təmsil olunmuş diplomatik korpusun nümayəndələri, tanınmış qazax ekspert və analitikləri iştirak edirdilər.

B.İMANQULİYEV

Azərbaycan.-2008.- 27 noyabr.-S.3.