Qadınlara Qarşı Zorakılıqla Mübarizə Gününə həsr olunmuş konfrans keçirilmişdir

AzərTAc xəbər verir ki, noyabrın 27-də "Avropa" mehmanxanasında Heydər Əliyev Fondu, Ailə, Qadın və Uşaq Problemləri üzrə Dövlət Komitəsi (AQUPDK), Birləşmiş Millətlər Təşkilatının (BMT) Qaçqınlar üzrə Ali Komissarlığı və BMT Əhali Fondunun (UNFPA) Azərbaycan ofisinin təşəbbüsü ilə 25 noyabr - Qadınlara Qarşı Zorakılığın Aradan Qaldırılması Uğrunda Beynəlxalq Mübarizə Gününə həsr olunmuş konfrans keçirilmişdir.
AQUPDK-nın sədri Hicran Hüseynova qadınlara qarşı zorakılığın dünyada ən geniş yayılmış cinayətlərdən biri olduğunu bildirmiş, bu problemin, o cümlədən erkən nigah hallarının Azərbaycan üçün də aktuallığını diqqətə çatdırmışdır. O, Milli Məclisdə gender bərabərliyi ilə bağlı müvafiq qanunun tezliklə qəbul edilməsinin vacibliyindən, qadınlara qarşı zorakılığın qarşısının alınması istiqamətində Azərbaycan hökuməti tərəfindən həyata keçirilən kompleks tədbirlərdən danışmışdır. Cari ilin əvvəlindən Heydər Əliyev Fondu, AQUPDK və UNFPA-nın birgə təşkilatçılığı ilə "XXI əsrdə qadınlara qarşı zorakılıq əlehyinə layihə"nin həyata keçirildiyi bildirilmişdir.
UNFPA-nın Azərbaycan, Gürcüstan və Ermənistan üzrə ölkə direktoru Peer Sieben və BMT-nin Qaçqınlar üzrə Ali Komissarlığının proqram üzrə departamentinin müdiri Ayaz Xan qadınlara qarşı zorakılığa son qoyulması üçün hamının məsuliyyət daşıdığını, gender bərabərliyinə nail olunması üçün bütün qüvvələrin səfərbər edilməsinin vacibliyini diqqətə çatdırmışlar. Natiqlər təmsil etdikləri qurumların Heydər Əliyev Fondu və AQUPDK ilə səmərəli əməkdaşlığını qeyd etmişlər.
Tədbirdə Milli Məclisin Sosial siyasət daimi komissiyasının sədri Hadi Rəcəbli, Milli Məclisin deputatı Qənirə Paşayeva, Ədliyyə Nazirliyi İnsan Hüquqları və İctimaiyyətlə Əlaqələr İdarəsinin rəisi Faiq Qurbanov, Daxili İşlər Nazirliyi İnsan Alverinə Qarşı Mübarizə İdarəsinin rəisi Cavad Şıxəliyev və başqaları mövzu ilə bağlı fikirlərini söyləmiş, qadınlara qarşı zorakılıq hallarının qarşısının alınmasında hüquq-mühafizə orqanlarının, təhsil, səhiyyə işçilərinin rolunu və köməyini vurğulamışlar.
Çıxış edənlər Ermənistan-Azərbaycan, Dağlıq Qarabağ münaqişəsi nəticəsində minlərlə qadının zorakılığa məruz qaldıqlarını bildirmişlər.
Konfransda mövzu ilə bağlı videolentlər nümayiş etdirilmişdir.
Sonda problemlə bağlı geniş fikir mübadiləsi aparılmış, təkliflər irəli sürülmüşdür.

Azərbaycan.-2008.-28 noyabr.-S.2.