Dövlət başçısının qayğısı bizə yeni ruh verir

Azərbaycanda son beş ildə bütün sahələrdə əldə edilən tərəqqi və dövlətçiliyimizin günbəgün möhkəmlənməsi ərazi bütövlüyümüz uğrunda müharibədə xidmət göstərən biz əlilləri və şəhid valideynlərini qəlbən sevindirir.

Biz, Qarabağ müharibəsi əlilləri, ölkəmizin ərazi bütövlüyü uğrunda canını qurban vermiş vətən övladarının ailə üzvləri dövlətimizin diqqət və qayğısını daim öz üzərimizdə hiss edirik. Sosial qayğılarımızın, problemlərimizin həlli yolunda atılan addımlar isə göz önündədir.

Ümummilli lider Heydər Əliyevin siyasi kursunun layiqli davamçısı Azərbaycan Respublikasının Prezidenti cənab İlham Əliyev 2008-ci il yanvarın 17-də Ağcabədiyə gəlmişdi. Rayonun mərkəzi meydanına toplaşan minlərlə rayon sakini möhtərəm Prezidenti böyük hörmət və ehtiramla qarşıladı. Dövlət başçısı əvvəlcə ulu öndər Heydər Əliyevin möhtəşəm heykəlinin önünə gül dəstəsi qoydu, sonra Ağcabədiyə təbii qazın verilməsini bildirən məşəli alovlandırdı. Rayon ictimaiyyəti və qonaqlar qarşısında geniş nitq söylədi. Heydər Əliyev muzeyinin açılışında iştirak etdi. Həmin gün şəhid ailələri və Qarabağ müharibəsi əlilləri üçün inşa olunan üçmərtəbəli, 24 mənzilli binanın istifadəyə verilməsi mərasimində Prezident İlham Əliyev və xanımı Mehriban Əliyeva iştirak etdilər. Ölkə başçısı mənzillərin orderlərini sahiblərinə təqdim etdi.

Mənzil alanların arasında mən də var idim. Prezident əlimi sıxıb mənzilin orderini təqdim edəndə sevincimin həddi-hüdudu yox idi. Həyəcanla ürək sözlərimi çatdırdım: "Möhtərəm Prezident, göstərilən bu yüksək qayğıya görə Sizə bütün Qarabağ əlilləri və şəhid ailələri adından dərin minnətdarlığımızı bildiririk və uca Tanrıdan ulu öndərimizə qəni-qəni rəhmət diləyirik. Cənab Prezident, bu əziz gündə bizə hədiyyə etdiyiniz bu gözəl mənzillərdə Sizi bir stəkan çay içməyə dəvət edirik". Cənab İlham Əliyev təşəkkür edərək dedi: "Sizi təbrik edirəm. Bu gözəl binada yaşayacaqsınız. Burada hər cür şərait var. Azərbaycan dövləti sizə bundan sonra da həmişə diqqət göstərəcəkdir. Əgər bu ev sizin vəziyyətinizi bir balaca yüngülləşdirirsə, hesab edirəm ki, bu, böyük işdir".

Biz inanırıq ki, dövlətin iqtisadiyyatı gücləndikcə nəinki bizim, ümumən cəmiyyətin bütün təbəqələrinin sosial vəziyyətinin yaxşılaşdırılması istiqamətində addımlar atılacaqdır. Qeyd edim ki, Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyeva həmin günün səhərisi Heydər Əliyev Fondundan 24 ailənin hər birinə 5 min manat məbləğində pul yardımı göndərdi. Bu da dövlət başçısının və onun xanımının Qarabağ müharibəsi veteranlarına, şəhid ailələrinə olan qayğısının parlaq təzahürüdür.

Prezident İlham Əliyevin Ağcabədiyə səfərindən bir neçə gün sonra Prezidentin ehtiyat fondundan rayonumuza 2 milyon manat vəsaitin ayrılması rayonumuzun sosial-iqtisadi inkişafına təkan verdi, uzun illər su görməyən kəndlərimizə içməli su xətti çəkildi, rayonumuzda daha geniş abadlıq və quruculuq işləri aparıldı.

Cənab İlham Əliyevin müharibə əlillərinə Prezident təqaüdünün verilməsi ilə əlaqədar imzaladığı fərman bizlərə göstərilən diqqət və qayğının daha bir bariz nümunəsidir. Bu yüksək diqqət və qayğıya görə ölkə başçısına və onun xanımına dərin minnətdarlığımızı və təşəkkürümüzü bildiririk.

Cənab İlham Əliyev prezidentlik fəaliyyətinin ötən 5 ili ərzində qarşısına qoyduğu bütün vəzifələri layiqincə yerinə yetirib. Bunu Azərbaycanın regionda lider dövlət olması, ölkə iqtisadiyyatının sürətlə inkişafı, beynəlxalq aləmə inteqrasiyası, ordumuzun güclənməsi, olimpiya-idman komplekslərinin, sağlamlıq ocaqlarının, turizm mərkəzlərinin yaradılması, məktəblərin tikilib təmir olunması, işsizliyin aradan qaldırılması, qaçqın və məcburi köçkünlərin, əlillərin və şəhid ailələrinin həyat şəraitinin yaxşılaşdırılması istiqamətində gördüyü işlər bir daha təsdiq edir.

Dövlət başçısının Azərbaycan gəncliyinə göstərdiyi qayğı ölkəmizi işıqlı sabaha aparır. Bu qayğı bizə yaşamaq eşqi, qurub-yaratmaq həvəsi verir.
15 oktyabr 2008-ci il tarixində ölkəmizdə keçirilən prezident seçkilərində biz, Qarabağ döyüşçüləri, Ağcabədi gəncləri Ali Baş Komandan cənab İlham Əliyevə böyük inamla səs verdik. Bu seçimimizlə qürur duyuruq.

Ramil NAĞIYEV,

Ağcabədi rayonu I qrup

Qarabağ müharibəsi əlili

Azərbaycan .-2008.-28 noyabr.-S.3.