Azərbaycanın diplomatik nümayəndəlik və konsulluqlarının konsulluq məsələləri üzrə məsul əməkdaşlarının ikinci müşavirəsi öz işinə başlamışdır

AzərTAc xəbər verir ki, noyabrın 29-da Xarici İşlər Nazirliyində Azərbaycan Respublikasının diplomatik nümayəndəlik və konsulluqlarının konsulluq məsələləri üzrə məsul əməkdaşlarının ikinci müşavirəsi öz işinə başlamışdır. Müşavirədə diplomatik nümayəndəlik və konsulluqların konsulluq sahəsində fəaliyyəti müzakirə olunacaq, qarşıya çıxan nöqsan və problemlər araşdırılacaq, təhlil ediləcək və onların aradan qaldırılması, konsulluq məsələləri üzrə məsul əməkdaşların peşə hazırlığının artırılması, digər dövlət orqanlarının konsulluq işinə dair təklifləri nəzərdən keçiriləcəkdir.

Müşavirə iştirakçıları əvvəlcə Fəxri xiyabana gələrək ümummilli lider Heydər Əliyevin xatirəsini anmış, məzarı önünə əklil qoymuşlar.

Görkəmli oftalmoloq alim, akademik Zərifə xanım Əliyevanın məzarı üzərinə də güllər düzülmüşdür.

Şəhidlər xiyabanında Azərbaycanın müstəqilliyi və ərazi bütövlüyü uğrunda canlarından keçmiş vətən övladlarının xatirəsi yad edilmişdir.

Azərbaycan Respublikası xarici işlər nazirinin müavini V.Sadıqov müşavirədə giriş nitqi söyləmişdir. Sonra müşavirəyə sədrlik edən XİN-in Konsulluq İdarəsinin rəisi, fövqəladə və səlahiyyətli səfir Nadir Hüseynov Azərbaycan Respublikasının diplomatik nümayəndəlik və konsulluqlarının konsulluq məsələləri üzrə məsul əməkdaşlarının 2006-cı il dekabrın 11-dən 14-dək keçirilmiş birinci müşavirəsindən ötən dövr ərzində fəaliyyəti barədə çıxış etmiş, tövsiyələrini vermişdir.

Hazırlanmış proqrama uyğun olaraq hesabat, təhlil və konsulluq məsələləri üzrə məsul əməkdaşların bilik, təcrübə və peşə hazırlığının artırılması məqsədilə təlim xarakterli müşavirə işini dekabrın 1-4-də davam etdirəcəkdir.

Azərbaycanın 55 xarici ölkədəki səfirlik və baş konsulluqlarında çalışan konsul məsələləri üzrə məsul əməkdaşlarının, həmçinin XİN-in Naxçıvan Muxtar Respublikasındakı nümayəndəliyinin əməkdaşlarının iştirak etdiyi müşavirədə təlim xarakterli məruzələr dinləniləcəkdir. İşdə qarşıya çıxan çətinliklər və konsul məsələləri üzrə məsul əməkdaşları maraqlandıran müxtəlif məsələlərlə bağlı sualları 14 dövlət qurumunun - Prezidentin İcra Aparatı yanında Vətəndaşlıq Məsələləri Komissiyasının, Milli Təhlükəsizlik, Vergilər, Daxili İşlər, Ədliyyə, Əmək və Əhalinin Sosial Müdafiəsi, Təhsil nazirliklərinin, Dövlət Sərhəd və Dövlət Miqrasiya xidmətlərinin, Dövlət Sosial Müdafiə Fondunun, Diaspor ilə İş, Ailə, Qadın və Uşaq Problemləri üzrə dövlət komitələrinin, Vəkillər Kollegiyasının və Azərbaycan Respublikası Hərbi Komissarlığının yüksək vəzifəli nümayəndələri cavablandıracaqlar.

Azərbaycan.-2008.-30 noyabr.-S.3.