BDU-nun 90 illik yubileyi münasibətilə universitetin müəllimlərinə yeni mənzillərin açarları təqdim edilmişdir

Oktyabrın 31-də Bakı Dövlət Universitetinin (BDU) 90 illik yubileyi münasibətilə universitetin müəllimləri üçün inşa olunmuş 16 mərtəbəli, 4 korpusdan ibarət yaşayış kompleksinin açılış mərasimi keçirilmişdir.

Yasamal rayonu, M.Seyidov küçəsi 3138-ci məhəllədə yerləşən "Bakı universiteti" yaşayış kompleksinin açılış mərasimində BDU-nun rektoru, Milli Məclisin deputatı, akademik Abel Məhərrəmov demişdir ki, tikintisinə iki il bundan öncə başlanılan bu bina 350-dən çox ziyalının ev problemini həll edəcəkdir. Bakı Universiteti Mənzil Tikinti Kooperativinin sifarişi ilə inşa edilmiş kompleksdə müəllimlərin rahat yaşayışı üçün hər cür şərait yaradılmışdır. Yaxın vaxtlarda burada uşaq bağçası və poliklinika da açılacaqdır.

Tədbirdə Baş nazirin müavini Abid Şərifov, təhsil naziri Misir Mərdanov, Yasamal Rayon İcra Hakimiyyətinin başçısı İbrahim Mehdiyev, YAP Yasamal rayon təşkilatının sədri Fikrət İsmayılov və başqaları çıxış edərək bütün mənzil sahiblərini təbrik etmiş, Prezident İlham Əliyevin elm, təhsil və mədəniyyət sahəsində çalışan insanlara göstərdiyi diqqət və qayğıdan danışmışlar.

Vurğulanmışdır ki, son beş ildə Azərbaycanda təhsilin inkişafı istiqamətində bir çox Dövlət Proqramı təsdiqlənmişdir. Prezident İlham Əliyevin BDU-nun 90 illik yubileyinin dövlət səviyyəsində qeyd olunması ilə bağlı imzaladığı müvafiq sərəncama uyğun olaraq, Azərbaycanda və xarici ölkələrdə silsilə təbirlər keçirilmişdir.

Sonra yeni mənzillərin açarları sahiblərinə təqdim edilmişdir. Yeni mənzil alanların sırasında BDU-nun müəllimi, AMEA-nın müxbir üzvü, 92 yaşlı Abdulla Muxtarov da vardır.

Tədbir gənc ifaçıların geniş konsert proqramı ilə davam etmişdir.

Azərbaycan.- 2009.- 1 noyabr.- S. 3.