Bir qanadda iki müxtəlif rəngli gül

Uzun illərdir ki, redaksiyamızın mədəniyyət şöbəsinin otağında Çin qızılgülləri becərilir. Qəzetimizin ötən saylarında da bu güllərin Tibet dağlarından dünyaya necə yayılmasından, müxtəlif növlərindən söz açmışdıq. İyirmi ilə yaxındır ki, bu güllərin qayğısına qalırıq. Vaxtlı-vaxtında suvarılmasına, tozunun alınmasına çalışırıq. Çin qızılgüllərinin özünəməxsus xüsusiyyətləri var. Bu dəfə bizi heyrətə gətirən başqa səbəbdir.

Bir səhər iş otağına daxil olanda gözlərimizə inanmadıq. Bir qanadda iki gül açmışdı. Biri qırımızı rəngdə, biri zoğalı. Maraqlıdır ki, hər ikisinin də yanında tumurcuq var idi. Zoğalı rəngli qızılgülün qonşuluğundakı tumurcuq beşguşə formasında, qırmızı rənglinin davamçısı isə adi qönçə idi. Çox təəccüblənsək də, səbəbini başa düşmədik. Bir necə gündən sonra yenidən həmin müxtəlif rəngli güllərin açılması həqiqətən bizə möcüzə təsiri bağışladı. Kimdən soruşduqsa da, bu dəyişməni açıqlaya bilmədi. Maraqlıdır ki, bu gülün əsl sahibi çox uzun illər bundan əvvəl dünyasını dəyişib. Sahibinin vəfatından sonra Çin qızılgülü yaşıllığını saxlasa da, heç vaxt gül açmayıb. İnadkar övladsa ondan bir qanad kəsərək iş yerində böyüdüb. Çəkilən zəhmət hədər getməyib. Nəhayət, yaşıl yarpaqların arasında qırmızı güllər görünüb. Beş-altı ildən bir həmin gülün qanadından kəsərək yenidən göyərdən övlad isə anasından yadigar qalmış bu Çin qızılgülünü əbədi yaşatmaq istəyir. Kim bilir, bəlkə də bu sədaqətin və ehtiramın nəticəsidir ki, adi yaşıllıq kimi baxdığımız qızılgüllər də öz "təşəkkürünü" bu cür bildirir. Doğrudan da təbiət qəribədir və möcüzələrlə doludur. Adi otaq şəraitində becərilən Çin qızılgülünün bu cür "hədiyyəsi" hamımızın qəlbini riqqətə gətirdi. Əməkdaşlarımızdan kimsə söylədi ki, sanki bir ananın iki övladı var: oğlan və qız. Bənzətmə nə qədər yerinə düşür. Həqiqətən də, başqa ad düşünmək olmur.

F.XƏLİLZADƏ

Azərbaycan.- 2009.- 1 noyabr.- S. 8.