"Azərbaycan Respublikasının Dini Qurumlarla İş üzrə Dövlət Komitəsi haqqında Əsasnamənin təsdiq edilməsi barədə" Azərbaycan Respublikası Prezidentinin 2001-ci il 20 iyul tarixli 544 nömrəli Fərmanına əlavələr və dəyişikliklər edilməsi haqqında

Azərbaycan Respublikası Prezidentinin 2001-ci il 20 iyul tarixli 544 nömrəli Fərmanı ilə təsdiq edilmiş "Azərbaycan Respublikasının Dini Qurumlarla İş üzrə Dövlət Komitəsi haqqında Əsasnamə"yə (Azərbaycan Respublikasının Qanunvericilik Toplusu, 2001-ci il, №7, maddə 481; 2005-ci il, №5, maddə 403; 2008-ci il, №3, maddə 175, №11, maddə 970; 2009-cu il, №7, maddə 533) aşağıdakı əlavələr və dəyişikliklər edilsin:

1. 2-ci bənddə "qərar və sərəncamlarını" sözlərindən sonra ", Azərbaycan Respublikasının tərəfdar çıxdığı beynəlxalq müqavilələri" sözləri əlavə edilsin.

2. 4-cü və 5-ci bəndlər aşağıdakı redaksiyada verilsin:

"4. Komitə müstəqil balansa, qanunvericiliyə uyğun sərəncamında olan dövlət əmlakına, xəzinə və bank hesablarına, üzərində Azərbaycan Respublikasının Dövlət gerbinin təsviri və öz adı həkk olunmuş möhürə, müvafiq ştamplara və blanklara malikdir.

5. Komitənin saxlanma xərcləri və fəaliyyəti Azərbaycan Respublikasının dövlət büdcəsi və qanunvericiliklə nəzərdə tutulan digər mənbələr hesabına maliyyələşdirilir.".

3. III fəsil çıxarılsın, II fəsil III fəsil hesab edilsin və Əsasnaməyə aşağıdakı məzmunda II fəsil əlavə edilsin:

"II. Komitənin fəaliyyət istiqamətləri

6-1. Komitənin fəaliyyət istiqamətləri aşağıdakılardır:

6-1.1. dini etiqad azadlığının təmin olunması sahəsində fəaliyyət göstərir;

6-1.2. dini etiqad azadlığı sahəsində vahid dövlət siyasətinin formalaşmasında iştirak edir və bu siyasətin həyata keçirilməsini təmin edir;

6-1.3. dövlət-din münasibətlərinin tənzimlənməsini və inkişafını təmin edir;

6-1.4. dini qurumların dövlət qeydiyyatını həyata keçirir;

6-1.5. öz səlahiyyətləri daxilində dini tədris ilə bağlı məsələlərin tənzimlənməsində iştirak edir;

6-1.6. qanunvericiliklə müəyyən edilmiş digər istiqamətlərdə fəaliyyət göstərir.".

4. III fəslin adından və 7-ci bənddən "əsas" sözü çıxarılsın.

5. 7.3-cü bənd aşağıdakı redaksiyada verilsin:

"7.3. dini qurumların qanunvericiliklə nəzərdə tutulmuş qaydada dövlət qeydiyyatının həyata keçirilməsi, dini qurumların dövlət reyestrinin aparılması, dini qurumların dövlət qeydiyyatı haqqında məlumatların kütləvi informasiya vasitələrində dərc edilməsi, dini qurumların təşkilati işlərinin qanunauyğun qurulmasına köməklik göstərilməsi;".

6. Əsasnaməyə aşağıdakı məzmunda 7.9-1-7.9-8-ci bəndlər əlavə edilsin:

"7.9-1. ölkədəki dini durum haqqında Azərbaycan Respublikasının Prezidentinə ildə iki dəfə hesabatların təqdim edilməsi;

7.9-2. qanunda göstərilən əsaslar olduqda dini qurumun ləğv olunması barədə məhkəməyə müraciət edilməsi;

7.9-3. dini qurumlara münasibətdə cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı qanunla nəzərdə tutulmuş qaydada və hallarda nəzarət orqanının funksiyalarının həyata keçirilməsi;

7.9-4. qanunvericiliklə nəzərdə tutulmuş müvafiq inzibati xətalar haqqında işlərə baxılması;

7.9-5. vətəndaşların dini tədris müəssisələrində təhsil almaq üçün xaricə göndərilməsinə və qəbuluna razılıq verilməsi;

7.9-6. dini təyinatlı ədəbiyyatın, əşyaların və dini məzmunlu başqa məlumat materiallarının istehsalına, idxalına və yayılmasına nəzarət edilməsi, o cümlədən dini təyinatlı ədəbiyyatın, əşyaların və dini məzmunlu başqa məlumat materiallarının istehsalına, idxalına, ixracına və yayılmasına, habelə onların satışı üçün ixtisaslaşdırılmış satış məntəqələrinin yaradılmasına razılıq verilməsi;

7.9-7. dini ibadət yerlərinin tikintisinin və yenidən qurulmasının məqsədəuyğunluğu barədə rəy verilməsi;

7.9-8. dini qurumların fəaliyyəti ilə bağlı mübahisəli məsələlərin həllində dövlət adından iştirak edilməsi;".

7. 7.10-cu bənd aşağıdakı redaksiyada verilsin:

"7.10. dini tədris müəssisələrinin fəaliyyətinə xüsusi razılığın (lisenziyanın) verilməsi üçün rəy verilməsi, Azərbaycan Respublikasının Təhsil Nazirliyi ilə birlikdə dini tədris müəssisələrinin proqramlarının təhlil edilməsi, tədris plan və proqramlarının təsdiq edilməsi, dini tədrisin keyfiyyətinin müəyyən edilməsi üçün rəy verilməsi;".

8. Əsasnaməyə aşağıdakı məzmunda 7.15 - 7.18-ci bəndlər əlavə edilsin:

"7.15. din sahəsində mütəxəssislərin hazırlanması və ixtisaslarının artırılması üçün tədbirlər görülməsi;

7.16. Komitənin fəaliyyəti ilə bağlı daxil olan ərizə və şikayətlərə baxılması və qanunvericiliklə müəyyən edilmiş qaydada tədbirlər görülməsi;

7.17. Komitənin strukturunun və fəaliyyətinin təkmilləşdirilməsi istiqamətində öz səlahiyyətləri daxilində tədbirlər görülməsi;

7.18. fəaliyyət istiqamətlərinə uyğun olaraq qanunvericiliklə nəzərdə tutulmuş digər vəzifələrin yerinə yetirilməsi.".

9. 9-cu bənddə "vəzifə və funksiyalarını" sözləri "vəzifələrini" sözü ilə əvəz edilsin.

10. 9.2-ci bənd aşağıdakı redaksiyada verilsin:

"9.2. dinşünaslıq ekspertizasının aparılmasının təmin edilməsi məqsədi ilə dini qurumların nümayəndələrini və müvafiq mütəxəssisləri cəlb etmək;".

11. 9.9-cu bənd çıxarılsın.

12. 9.10-cu bənddə "formalarda" sözü "qaydada" sözü ilə əvəz edilsin.

13. 9.11-ci bənddən "Dini qurumların dövlət qeydiyyatını həyata keçirmək," sözləri çıxarılsın.

14. Əsasnaməyə aşağıdakı məzmunda 9.14-1 - 9.14-3-cü bəndlər əlavə edilsin:

"9.14-1. öz səlahiyyətləri daxilində dövlət və yerli özünüidarəetmə orqanlarına, fiziki və hüquqi şəxslərə zəruri məlumatlar (sənədlər) barədə sorğu vermək və onlardan belə məlumatları (sənədləri) almaq;

9.14-2. dini qurumların fəaliyyəti ilə bağlı mübahisəli məsələlərin qanun çərçivəsində tənzimlənməsində iştirak etmək, yaranmış problemlərin həlli barədə müvafiq dövlət orqanları qarşısında vəsatət qaldırmaq;

9.14-3. dini ayinlərin icrası ilə əlaqədar vətəndaşların və dini qurumların hüquqlarının qorunması məsələsinin dövlət orqanları tərəfindən müzakirə olunmasında iştirak etmək;".

15. 9.15-ci bənddə "izahatlar" sözü "izahlar" sözü ilə əvəz edilsin.

16. Əsasnaməyə aşağıdakı məzmunda 9.22-1 - 9.22-5-ci bəndlər əlavə edilsin:

"9.22-1. dövlət-din münasibətlərinin tənzimlənməsi və müvafiq qanunvericiliyin icrasına nəzarətin həyata keçirilməsi ilə bağlı vaxtaşırı müşavirələr keçirmək;

9.22-2. müvafiq beynəlxalq tədbirlərdə müəyyən edilmiş qaydada iştirak etmək və öz səlahiyyətləri çərçivəsində Azərbaycan Respublikasını təmsil etmək;

9.22-3. yerlərdə dini durumu öyrənmək üçün yerli icra hakimiyyəti orqanları ilə mütəmadi əlaqələr saxlamaq;

9.22-4. islam dininə aid ibadət yerlərinin rəhbərliyinə təyin edilən din xadimləri barədə Qafqaz Müsəlmanları İdarəsindən məlumat almaq;

9.22-5. dövlət-din münasibətləri sahəsində məqsədli proqramlar hazırlamaq və həyata keçirmək;".

17. "IV. Komitənin fəaliyyətinin təşkili" fəslinin adında "IV" rəqəmi "V" rəqəmi ilə əvəz edilsin.

18. 10.2-ci bəndin ikinci cümləsində "yetirilməsi" sözündən sonra "və hüquqların həyata keçirilməsi" sözləri əlavə edilsin, "şəxsi" sözü "şəxsən" sözü ilə əvəz edilsin.

19. 10.3-cü bəndə aşağıdakı məzmunda ikinci cümlə əlavə edilsin:

"Komitə sədrinin müavini ona Komitənin sədri tərəfindən həvalə edilmiş vəzifələri yerinə yetirir və bunun üçün şəxsən məsuliyyət daşıyır;".

20. 10.5-ci bənddə:

20.1. üçüncü və dördüncü abzaslar aşağıdakı redaksiyada verilsin:

"müəyyən edilmiş struktur, əməkhaqqı fondu və işçilərin say həddi daxilində Komitənin aparatının, tabeliyində olan qurumlarının strukturunu, ştat cədvəlini və ayrılmış büdcə təxsisatı daxilində onların xərclər smetasını təsdiq edir, Komitənin aparatının struktur bölmələrinin və tabeliyində olan qurumların əsasnamələrini təsdiq edir;

qanunvericiliyə uyğun olaraq icrası məcburi olan əmr və sərəncamlar verir, normativ hüquqi aktları təsdiq edir (imzalayır), onların icrasını təşkil edir və nəzarəti həyata keçirir;";

20.2. beşinci-doqquzuncu abzaslar müvafiq olaraq altıncı-onuncu abzaslar hesab edilsin və bəndə aşağıdakı məzmunda beşinci abzas əlavə edilsin:

"Komitənin vəzifəli şəxslərinin qanunvericiliyə zidd olan qərarlarını ləğv edir;".

21. 10.6-cı bənddən "şəxsi" sözü çıxarılsın.

22. 10.7-ci bənddə:

22.1. birinci abzasın ikinci cümləsində "üçdə iki hissəsi" sözləri "yarıdan çoxu" sözləri ilə əvəz edilsin;

22.2. birinci abzasın dördüncü cümləsi beşinci cümlə hesab edilsin və abzasa aşağıdakı məzmunda dördüncü cümlə əlavə edilsin:

"Komitənin Kollegiyasının qərarı qəbul edilərkən səslər bərabər olarsa, Kollegiyanın sədrinin səsi həlledici hesab edilir.";

22.3. ikinci abzas üçüncü abzas hesab edilsin və bəndə aşağıdakı məzmunda ikinci abzas əlavə edilsin:

"Komitənin Kollegiyasının üzvləri arasında fikir ayrılığı yarandığı hallarda Komitənin sədri bu barədə Azərbaycan Respublikasının Nazirlər Kabinetinə məlumat verərək öz qərarını həyata keçirir. Kollegiyanın üzvləri şəxsi fikirlərini Azərbaycan Respublikasının Nazirlər Kabinetinə çatdıra bilərlər.";

22.4. üçüncü abzasda "rəhbərləri" sözü ", qeyri-hökumət təşkilatlarının" sözləri ilə əvəz edilsin.

İlham ƏLİYEV,

Azərbaycan Respublikasının Prezidenti

Bakı şəhəri, 2 noyabr 2009-cu il

Azərbaycan.- 2009.- 4 noyabr.- S. 3.