Azərbaycanın daxili işlər naziri Türkiyənin Quru Qoşunları komandanı ilə görüşmüşdür

Azərbaycanın daxili işlər naziri, general-polkovnik Ramil Usubov noyabrın 3-də ölkəmizdə səfərdə olan Türkiyənin Quru Qoşunları komandanı, ordu generalı İşık Koşanerin başçılıq etdiyi nümayəndə heyəti ilə görüşmüşdür.

Nazirliyin mətbuat xidmətindən bildirmişlər ki, qonaqları salamlayan daxili işlər naziri son illər ölkələrimizin Silahlı Qüvvələri, daxili işlər orqanları, həmçinin Türkiyə Jandarm Komandanlığı ilə Daxili İşlər Nazirliyinin Daxili Qoşunları arasında əlaqələrin daha da inkişaf edərək yeni məzmun kəsb etdiyini, əməkdaşlığın geniş yayılmış formalarından səmərəli şəkildə istifadə edildiyini, bu istiqamətdə kadr hazırlığına böyük önəm verildiyini qeyd etmişdir.

Ramil Usubov Türkiyə Quru Qoşunları komandanının ölkəmizə səfərinin əlaqələrimizin inkişafına müsbət təsir göstərəcəyinə, iki qardaş dövlətin müvafiq qurumları ilə əməkdaşlığın potensial imkanlarından bundan sonra da səmərəli istifadə olunacağına əminliyini ifadə etmişdir.

Türkiyə Quru Qoşunları komandanı, ordu generalı İşık Koşaner Türkiyənin hər zaman Azərbaycanın yanında olacağını, onun ordu potensialının möhkəmlənməsi, Silahlı Qüvvələrinin inkişafı üçün bundan sonra da əlindən gələni əsirgəməyəcəyini, qarşılıqlı əlaqələrin və əməkdaşlığın hər iki qardaş xalqın mənafeyinə xidmət edəcəyini bildirmişdir.

Görüşdə Türkiyənin ölkəmizdəki səfiri Hulusi Kılıç iştirak etmişdir.

AzərTAc

Azərbaycan.- 2009.-4 noyabr.- S. 4.