Xarici İşlər Nazirliyində

Xarici İşlər Nazirliyinin mətbuat xidmətindən bildirmişlər ki, noyabrın 4-də nazir Elmar Məmmədyarov Koreya Respublikasının ölkəmizdəki səfiri Lü Kvanq Çulla diplomatik fəaliyyətinin başa çatması ilə əlaqədar görüşmüşdür.

Görüşdə Lü Kvanq Çul Azərbaycanda Koreyanın səfiri olmasından məmnunluğunu bildirmiş, fəaliyyəti müddətində ölkələr arasındakı iqtisadiyyat, təhsil, mədəniyyət, humanitar və digər sahələrdə ikitərəfli münasibətlərin daha da genişlənməsi və inkişafı üçün fəaliyyət göstərdiyini, bu istiqamətdə XİN ilə faydalı əməkdaşlığı vurğulamışdır. Azərbaycandan xoş xatirələrlə ayrıldığını deyən diplomat, səfirliyin fəaliyyətinə göstərilən yüksək diqqətə görə minnətdarlığını bildirmişdir. Nazir E.Məmmədyarov Lü Kvanq Çula xoş arzularını bildirmiş və gələcək işlərində müvəffəqiyyətlər arzulamışdır.

***

Noyabrın 4-də nazir Elmar Məmmədyarov Avropa İttifaqının (Aİ) nümayəndəliyinin Azərbaycanda yeni təyin olunmuş rəhbəri, səfir Rolan Kobian ilə görüşmüşdür.

Etimadnaməsinin surətini nazirə təqdim edən səfir ölkəmizə təyinatından şad olduğunu bildirmiş, fəaliyyəti dövründə Azərbaycan ilə Aİ arasında münasibətlərin daha da genişləndirilməsinə xidmət edəcəyini demişdir.

R.Kobianı yeni təyinatı münasibətilə təbrik edən nazir E.Məmmədyarov Azərbaycan ilə Aİ arasında əlaqələrin yüksək səviyyədə olmasından məmnunluğunu ifadə etmişdir.

Tərəflər Azərbaycan-Aİ münasibətlərinin hazırkı vəziyyəti və bir sıra maraq doğuran məsələlər ətrafında fikir mübadiləsi aparmışlar.

AzərTAc

Azərbaycan.- 2009.- 5 noyabr.- S. 7.