Bakıda İkinci Xəzər Beynəlxalq mühafizə, təhlükəsizlik və xilasetmə vasitələri sərgisi keçirilir

Noyabrın 4-də Bakıda, Heydər Əliyev adına İdman-Konsert Kompleksində II Xəzər Beynəlxalq mühafizə, təhlükəsizlik və xilasetmə vasitələri sərgisi öz işinə başlamışdır. Ekspozisiya "BakuTel" 15-ci yubiley Beynəlxalq telekommunikasiya və informasiya texnologiyaları sərgisi çərçivəsində keçirilir.

Azərbaycan Respublikası Daxili İşlər Nazirliyinin Baş Mühafizə İdarəsi və Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının dəstəyi, Böyük Britaniyanın İTE Group PLC və onun Qafqaz üzrə tərəfdaşı "İteca Caspian" şirkətləri bu sərginin təşkilatçılarıdır.

Azərbaycan, Belarus, Almaniya, Polşa, Rusiya, Türkiyə, Ukrayna və Yaponiyanın 23 şirkəti icazəsiz daxilolma əleyhinə siqnalizasiya, mühafizə xidməti üçün video-müşahidə və nəzarət, daxilolmaya nəzarət təhlükəsizlik sistemləri, antiterror və yoxlama avadanlıqları, rabitə və xəbərdarlıq qurğuları, mühəndis-texniki təhlükəsizlik vasitələri, fərdi mühafizə və xüsusi nəqliyyat vasitələrini nümayiş etdirirlər.

Sərgidə banklar və digər maliyyə qurumları üçün kommersiya tipli nəqliyyat vasitələri nümayiş etdiriləcəkdir. Almaniyanın "Stoof" şirkəti sərgidə maksimum zirehli mühafizəyə malik "Volksvagen T5" avtomobilinin təqdimatını keçirmişdir. "Stoof" şirkəti ən yeni texnologiyalardan istifadə etməklə hazırlanmış zirehli gödəkçələri nümayiş etdirir.

Sərgi çərçivəsində təhlükəsizlik məsələləri mövzusunda seminarlar keçiriləcəkdir. Bu sərgi təkcə xilasetmə, yanğından mühafizə, kompüterlərin mühafizəsi vasitələrinin inkişafı sahəsində nailiyyətlərin nümayiş etdirildiyi yer deyil, eləcə də məlumat mübadiləsi, ideyaların formalaşdırılması, həmçinin müxtəlif istehsalat təhlükələrinə qarşı əks-tədbirlərin görülməsi istiqamətində səylərin birləşdirilməsi üzrə imkanların axtarışı mərkəzinə çevriləcəkdir.

Sərgi noyabrın 7-dək davam edəcəkdir.

AzərTAc

Azərbaycan.- 2009.- 5 noyabr.- S. 7.