Nyu-Yorkda Azərbaycan diplomatiyasının 90 illik yubileyinə həsr olunmuş konfrans

Azərbaycanın BMT yanında daimi nümayəndəliyindən verilən məlumatda bildirilir ki, noyabrın 5-də Nyu-Yorkdakı Kolumbiya Universitetində Azərbaycan Respublikasının BMT yanında daimi nümayəndəliyinin və Harriman İnstitutunun təşkilatçılığı ilə Azərbaycan diplomatiyasının 90 illik yubileyinə həsr edilmiş "Azərbaycan 21-ci əsrdə: Perspektivlər və çağırışlar" mövzusunda konfrans keçirilmişdir.

Konfransda xarici işlər nazirinin müavini Araz Əzimov, Azərbaycan Respublikasının BMT yanında daimi nümayəndəsi səfir Aqşin Mehdiyev, ölkəmizin ABŞ-dakı səfiri Yaşar Əliyev, professor Timoti Frye, beynəlxalq diplomatiya üzrə professor, səfir Stefen Sestanoviç iştirak etmişlər.

Tədbirdə "Dəyişən mühitdə Azərbaycanın təhlükəsizlik siyasəti", "Müstəqil, bütöv, çiçəklənən və demokratik Azərbaycana aparan yol", "Azərbaycan-ABŞ əlaqələri" mövzularında məruzələr dinlənilmişdir.

Tədbirin sonunda azərbaycanlı diplomatlar iştirakçıların suallarını cavablandırmış, şərhlər vermişlər.

Sonda iştirakçılara Ermənistan-Azərbaycan, Dağlıq Qarabağ münaqişəsinə dair Azərbaycan Respublikasının Xarici İşlər Nazirliyi tərəfindən hazırlanmış BMT-nin sənədlər toplusu və kitablar təqdim edilmişdir.

AzərTAc

Azərbaycan.- 2009.- 7 noyabr.- S. 4.