İstanbulda İKT-nin İqtisadi və Ticarət Əməkdaşlığı Daimi Komitəsinin 25-ci sessiyasının toplantısı keçirilmişdir

İstanbulda İslam Konfransı Təşkilatı İqtisadi və Ticarət Daimi Komitəsinin (COMCEC) 25-ci sessiyasının toplantısı keçirilmişdir. Toplantıda ölkəmizin İstanbuldakı Baş konsulluğunun əməkdaşı iştirak etmişdir.

Toplantını giriş sözü ilə açan Türkiyə Prezidenti Abdullah Gül bildirmişdir ki, İslam ölkələrinin dünya ticarət dövriyyəsində payı 2003-cü ildə 8,1 faizdən 2008-ci ildə 11,2 faizə yüksəlmişdir.

İKT daxilində ticarət dövriyyəsinin həcmi isə 16 faizə çatmışdır. Lakin, hələ də dünyadakı ən az inkişaf etmiş 49 ölkədən 22-si İKT üzvdür və bu yoxsul ölkələrin inkişafına da kömək etmək lazımdır.

İKT-nin baş katibi Ekmələddin İhsanoğlu da İslam dünyasında iqtisadi inkişafa nail olmaq üçün birgə fəaliyyətə, habelə yeni strateji plana ehtiyac olduğunu demişdir. Vurğulamışdır ki, iqtisadi inkişaf olmadan bu ölkələrdə sabitliyin təmin olunması da mümkün deyildir.

Toplantıda çıxış edənlər qlobal maliyə böhranı, üzv dövlətlər arasında əməkdaşlığın perspektivləri, yoxsulluğa qarşı mübarizə və digər məsələlərə toxunmuşlar.

Noyabrın 9-da COMCEC-in sədri, Türkiyə Prezidenti Abdullah Gülün sədrliyi ilə təşkilatın zirvə toplantısı keçiriləcəkdir. Toplantıda ölkəmizi Baş nazirin birinci müavini Abid Şərifovun təmsil edəcəyi gözlənilir. Həmin iclasda COMCEC-in 25 illik yubileyi münasibətilə rəsmi ziyafət də təşkil olunacaqdır.

COMCEC-ə 57 üzv və 3 müşahidəçi dövlət daxildir.

Oqtay BAYRAMOV,

AzərTAc-ın xüsusi müxbiri

Ankara

Azərbaycan.- 2009.- 8 noyabr.- S. 8.