"İslamda mədəniyyət və gözəllik amili" mövzusunda beynəlxalq konfrans başa çatmışdır

"Bakı İslam mədəniyyətinin paytaxtı - 2009" mədəniyyət ili çərçivəsində Azərbaycan Milli Elimlər Akademiyasının (AMEA) Milli Azərbaycan Tarixi Muzeyində "İslamda mədəniyyət və gözəllik amili" mövzusunda beynəlxalq elmi-praktiki konfransa noyabrın 10-da yekun vurulmuşdur.

Mədəniyyət və Turizm Nazirliyi və Milli Azərbaycan Tarixi Muzeyinin birgə təşkilatçılığı ilə keçirilən tədbirdə 9 ölkənin (Rusiya, Misir, Albaniya, İordaniya, Türkiyə, Macarıstan və s.) 15 elmi-tədqiqat və ali təhsil müəssisələrinin nümayəndələri iştirak etmişlər.

Konfransda "İslam şəriətində dilin gözəllikləri", "Müsəlman dünyasında ilk dünyəvi qız məktəbi", "Azərbaycan-İSESKO elmi-mədəni əməkdaşlığında Mehriban xanım Əliyevanın rolu", "Azərbaycan folkloru islam kontektsində", "İslamda qadına verilən dəyər və qadın hüquqlarının müdafiəsi", "İslamı necə düzgün anlamaq", "İçərişəhər mədəniyyət abidələri" və digər mövzularda məruzələr dinlənilmişdir.

Bildirilmişdir ki, Azərbaycanda islam mədəniyyəti və mənəviyyatının dərin kökləri vardır. Son illərdə ölkəmizdə YUNESKO-nun və İSESKO-nun dəstəyi ilə keçirilən konfrans və simpoziumların uğurla nəticələnməsi 2009-cu ildə islam mədəniyyətinin paytaxtı elan edilmiş Bakını dini tolerantlıq nümunəsinə və sivilizasiyalararası dialoqun baş tutduğu məkana çevirmişdir.

Vurğulanmışdır ki, bütün bu işlər Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsu ilə reallaşmış və Azərbaycanın birinci xanımının fəaliyyəti nəticəsində mədəni irsin qorunması istiqamətində mühüm uğurlar əldə olunmuşdur.

Azərbaycan.- 2009.- 11 noyabr.- S. 4.