İran parlamentinin nümayəndə heyəti Talassemiya Mərkəzində olmuşdur

Noyabrın 10-da Azərbaycanda səfərdə olan İran parlamentinin nümayəndə heyəti Talassemiya Mərkəzində olmuşdur. Mərkəz barədə qonaqlara məlumat verilərək bildirilmişdir ki, Heydər Əliyev Fondunun "Talassemiyasız həyat naminə" proqramı çərçivəsində inşa olunan müalicə ocağı talassemiya xəstəliyinə düçar olanlar və onların yaxınları üçün ümid yeridir. Burada gün ərzində 40-50 xəstə qəbul edilir.

Hazırda ölkəmizdə min nəfərədək talassemiyalı xəstə vardır və onlardan 700 nəfərə yaxını daimi nəzarət altındadır. Mərkəzdə xəstəliyin aşkar edilməsi üçün xüsusi poliklinika da fəaliyyət göstərir. Mərkəzin üç regional şöbəsi var.

Qonaqlar ikinci mərtəbədə yerləşən transfuziya zalı və 12 otaqdan ibarət klinika, manipulyasiya, ümumi laboratoriya, şüa diaqnostikası otaqları ilə tanış olmuşlar. Nümayəndə heyətinin üzvləri transfuziya zalında müalicə alan uşaqlar və onların valideynləri ilə görüşmüş, xəstələrin vəziyyəti ilə maraqlanmışlar.

Qonaqlar mərkəzin reanimasiya palatasına, manipulyasiya və cərrahiyyə əməliyyatı otaqlarına, kitabxanaya, internet otağına baxmışlar.

Nümayəndə heyətinin üzvləri Talassemiya Mərkəzinin fəaliyyətindən məmnun qaldıqlarını bildirmişlər.

AzərTAc

Azərbaycan.- 2009.- 11 noyabr.- S. 6.