Bakıda Azərbaycan və Rusiya hökumətləri arasında əmək miqrasiyası sahəsində əməkdaşlığa dair saziş layihəsi müzakirə edilir

Əmək və Əhalinin Sosial Müdafiəsi Nazirliyinin mətbuat xidmətindən bildirmişlər ki, noyabrın 10-da Bakıda "Azərbaycan Respublikası hökuməti ilə Rusiya Federasiyası hökuməti arasında əmək miqrasiyası sahəsində əməkdaşlığa dair saziş" layihəsinin hazırlanması üzrə yaradılmış işçi qrupun növbəti iclası keçirilmişdir.

İclası giriş sözü ilə açan işçi qrupun həmsədri, əmək və əhalinin sosial müdafiəsi nazirinin müavini Natiq Məmmədov Azərbaycanın sürətlə inkişaf edən və iqtisadiyyatı daim yüksələn bir ölkə olduğunu və bu səbəbdən əmək miqrantları üçün mənşə ölkəsindən təyinat ölkəsinə çevrildiyini bildirmişdir. N.Məmmədov Azərbaycanda miqrasiya proseslərinin dövlətin sosial-iqtisadi maraqlarına uyğunlaşdırılması, müvafiq qanunvericiliyin təkmilləşdirilməsi və bu proseslərin idarə olunmasında "bir pəncərə" prinsipinin tətbiqi istiqamətində görülən işlər barədə məlumat vermişdir.

Hazırda Azərbaycanda Rusiya Federasiyasının investisiyası əsasında təşkil edilmiş 250-dən çox müəssisənin, habelə bu ölkənin hüquqi və fiziki şəxsləri ilə müştərək yaradılmış 360-dan çox birgə müəssisənin fəaliyyət göstərdiyini deyən nazir müavini, eyni zamanda respublikamızda fərdi icazə əsasında işləyənlərin 216 nəfərinin Rusiya vətəndaşı olduğunu vurğulamışdır.

İclasda qeyd olunmuşdur ki, ölkələrimiz arasında dostluq və strateji tərəfdaşlıq əlaqələrinin inkişafı belə müəssisələrin və həmçinin işləyən Rusiya vətəndaşlarının sayının artacağını deməyə əsas verir. Ona görə də əməkçi miqrant kimi fəaliyyət göstərən hər iki ölkə vətəndaşlarının hüquqlarının qorunması, onların sosial müdafiəsinin təmini və fəaliyyəti üçün əlverişli şəraitin yaradılması məqsədi ilə iki ölkə arasında miqrasiya sahəsində əməkdaşlığın gücləndirilməsi mühüm əhəmiyyət kəsb edir. Hazırda layihəsi müzakirə olunan sazişin bu istiqamətdə atılan uğurlu addım olacağı şübhəsizdir.

Rusiya Federasiyası Federal Miqrasiya Xidmətinin xarici əmək miqrasiyası idarəsi rəisinin müavini Sergey Boldırev ölkələrimiz arasında əlaqələrin daim inkişaf etdiyini vurğulayaraq təmsil etdiyi dövlətin Azərbaycan ilə miqrasiya sahəsində əməkdaşlığın gücləndirilməsində maraqlı olduğunu və bunun üçün müvafiq səylərin göstərildiyini diqqətə çatdırmışdır.

Sonra işçi qrup "Azərbaycan Respublikası hökuməti ilə Rusiya Federasiyası hökuməti arasında əmək miqrasiyası sahəsində əməkdaşlığa dair saziş" layihəsini ətraflı müzakirə etmişdir.

İclasın yekunlarına dair protokol noyabrın 11-də imzalanacaqdır.

AzərTAc

Azərbaycan.- 2009.-11 noyabr.- S. 6.