Pakistanın "İttehad" qəzeti AzərTAc ilə əməkdaşlıq edəcəkdir

Noyabrın 10-da AzərTAc-da Pakistanın "İttehad" qəzetinin redaktoru Tahir Faruq ilə görüş keçirilmişdir.

AzərTAc-ın baş direktoru Aslan Aslanov qonağa 1920-ci ildə, Şərqdə ilk demokratik dövlət - Azərbaycan Xalq Cümhuriyyəti dövründə yaradılmış rəsmi informasiya agentliyinin tarixi barədə məlumat vermişdir.

Görkəmli siyasi xadim Heydər Əliyevin ölkəyə rəhbərliyə qayıdışından sonra Azərbaycanın keçdiyi böyük inkişaf yolundan, ulu öndərin AzərTAc-a diqqət və qayğısından, Prezident İlham Əliyevin rəhbərliyi altında sürətli inkişaf yolu ilə irəliləyən ölkəmizin uğurlarından danışan agentliyin rəhbəri vurğulamışdır ki, son illər Azərbaycanın nüfuzu dünyada xeyli yüksəlmiş, o, regionun lider dövlətinə çevrilmişdir. Bu uğurlar artıq dünya informasiya məkanına çıxmış AzərTAc-ın beynəlxalq əlaqələrinin daha da genişlənməsi baxımından yeni imkanlar açır.

Qonağa bildirilmişdir ki, hazırda AzərTAc dünyanın iki ən böyük regional qurumunun Asiya və Sakit Okean Ölkələri Xəbər Agentlikləri Təşkilatının (OANA) və onun rəhbər orqanı - İcraiyyə Komitəsi idarə heyətinin, Avropa Xəbər Agentlikləri Alyansının (EANA) üzvüdür. Agentlik, həmçinin Qara Dəniz İqtisadi Əməkdaşlıq Təşkilatının üzvü olan Ölkələrin Milli İnformasiya Agentlikləri Assosiasiyasının (BSANNA) və Türkdilli Xəbər Agentlikləri Birliyinin (TKA) təsisçilərindən biridir, 2008-ci ildən TKA-da sədrlik edir. Ötən il AzərTAc həm TKA-nın, həm də OANA-nın geniş tərkibdə iclaslarına ev sahibliyi etmişdir.

Azərbaycan-Pakistan münasibətlərinə toxunan Aslan Aslanov Dağlıq Qarabağ münaqişəsinin sülh yolu ilə həllində ölkəmizin haqlı mövqeyinin Pakistan tərəfindən dəstəkləndiyini diqqətə çatdırmışdır.

Ətraflı məlumata görə təşəkkür edən Tahir Faruq Azərbaycan ilə Pakistan arasında tarixi köklərə söykənən əlaqələrin bu gün də yüksək səviyyədə olduğunu demişdir.

Təmsil etdiyi qəzet haqqında məlumat verən qonaq demişdir ki, "İttehad" müxtəlif dövrlərdə Azərbaycanın tarixi haqqında, o cümlədən ölkəmizdə aparılan irimiqyaslı islahatlar barədə materiallar dərc etmişdir. 2008-ci ildə Azərbaycanda keçirilmiş prezident seçkilərinə dair geniş məqalə hazırladıqlarını deyən redaktor qəzetin ölkəmizin rəhbəri İlham Əliyevin möhtəşəm qələbəsinə həsr etdiyi "Xalqın Prezidentə etimadı: İlham Əliyev yenidən prezident seçildi" başlıqlı yazı çap etdiyini diqqətə çatdırmışdır.

AzərTAc ilə əlaqələrinin genişləndirilməsində maraqlı olduğunu bildirən Tahir Faruq əməkdaşlıq haqqında sənədin imzalanması barədə təkliflə çıxış etmişdir. Təklif razılıqla qarşılanmışdır.

Daha sonra qonaq AzərTAc-ın maddi-texniki bazası, əməkdaşların iş şəraiti ilə tanış olmuş və onlarla səmimi söhbət etmişdir.

Azərbaycan.- 2009.-11 noyabr.- S. 6.