Azərbaycan Nazirlər Kabinetində görüş

Noyabrın 11-də Azərbaycanın Baş naziri Artur Rasizadə ölkəmizdə səfərdə olan Türkiyənin dövlət naziri Hayati Yazıcinin başçılıq etdiyi nümayəndə heyəti ilə görüşmüşdür.

Ümummilli liderimiz Heydər Əliyevin "Bir millət, iki dövlət" kəlamını xatırladan, Azərbaycan və Türkiyə arasında dostluq və qardaşlıq əlaqələrinin əhəmiyyətini diqqətə çatdıran Baş nazir Artur Rasizadə ölkələrimiz arasında münasibətlərin bütün istiqamətlər üzrə, o cümlədən gömrük və ticarət sahələrində də inkişaf etdiyini bildirmiş, Azərbaycanın ən çətin anlarında Türkiyəni həmişə öz yanında hiss etdiyini vurğulamışdır.

Baş nazir ölkələrimiz arasında əlaqələrin inkişafında dövlətlərimizin başçılarının qarşılıqlı səfərlərinin, rəsmi görüşlərin əhəmiyyətini də nəzərə çarpdırmışdır. A.Rasizadə dünyanı bürümüş maliyyə-iqtisadi böhrana baxmayaraq, Azərbaycan iqtisadiyyatının dinamik inkişaf etdiyini söyləmişdir.

Türkiyənin dövlət naziri Hayati Yazıci Azərbaycana ilk səfəri çərçivəsində Bakıda keçirilən "İpək Yolu" ölkələri arasında ticarətə yardım və onun asanlaşdırılması üzrə gömrük idarələrinin roluna dair ikinci Beynəlxalq forumda iştirak etdiyini diqqətə çatdırmış və tədbir barədə A.Rasizadəyə məlumat vermişdir. Vurğulamışdır ki, "İpək Yolu" ölkələri arasında ticarət əlaqələri getdikcə genişlənir.

Türkiyənin Azərbaycandakı səfiri Hulusi Kılıçın iştirakı ilə keçən görüşdə bir sıra məsələlər əfrafında fikir mübadiləsi aparılmışdır.

AzərTAc

Azərbaycan.- 2009.- 12 noyabr.- S. 1.