Beynəlxalq konfransın yekunlarına həsr olunmuş mətbuat konfransı keçirilmişdir

İslam Konfransı Təşkilatının (İKT) 40 illik yubileyinə həsr olunmuş "Sivilizasiyalararası dialoq: Azərbaycandan baxış" mövzusunda Bakıda keçirilən beynəlxalq konfransın yekunları ilə bağlı mətbuat konfransı olmuşdur.

Azərbaycan xarici işlər nazirinin müavini Vaqif Sadıqov konfrans haqqında məlumat verərək bildirmişdir ki, maraqlı müzakirələrlə yadda qalan tədbirdə bir çox ölkələrdən, o cümlədən İKT-nin üzvü olmayan Koreya Respublikası və Argentinadan nümayəndələr iştirak etmişlər. V.Sadıqov konfransın XİN Diplomatik Akademiyası və İKT Baş Katibliyi tərəfindən təşkil olunduğunu diqqətə çatdırmışdır.

İKT-nin baş katibi Ekmələddin İhsanoğlu konfransın yüksək səviyyədə təşkil edildiyindən məmnunluğunu bildirmişdir. Bakının son dövrlərdə bir çox vacib beynəlxalq tədbirlərə ev sahibliyi etdiyini vurğulayan E.İhsanoğlu bu cür tədbirlərin keçirilməsinin böyük əhəmiyyətə malik olduğunu bildirmişdir.

Dünyada fərqli mədəniyyətlərin mövcud olduğunu bildirən E.İhsanoğlu "sivilizasiyalararası toqquşma" kimi yanlış bir fikrin qarşısının alınması baxımından dialoqun zəruri olduğunu qeyd etmişdir. O, Bakıda keçirilən konfransın bu baxımdan böyük əhəmiyyətə malik olduğunu xüsusi vurğulamışdır. E.İhsanoğlu konfrans zamanı dinlər arasında dialoqun qurulması istiqamətində çox maraqlı fikirlərin səsləndiyini qeyd etmişdir.

Baş katib, həmçinin sivilizasiyalararası dialoqun aparılmasında və bu sahədə uğurların əldə edilməsində medianın və qeyri-hökumət təşkilatlarının üzərinə mühüm vəzifələr düşdüyünü bildirmişdir.

AzərTAc

Azərbaycan.- 2009.-12 noyabr.- S. 10.