Azərbaycan-Tacikistan əməkdaşlığının aktual məsələləri müzakirə edilmişdir

Xarici İşlər Nazirliyinin mətbuat xidmətindən bildirmişlər ki, nazir Elmar Məmmədyarov Tacikistan xarici işlər nazirinin birinci müavini Abdullo Yuldaşevlə görüşmüşdür.

Görüşdə Azərbaycan-Tacikistan münasibətlərinin mövcud durumu müzakirə edilmiş, əlaqələrin inkişaf etdirilməsi istiqamətində atılacaq addımlar ətrafında fikir mübadiləsi aparılmışdır. Tərəflər ölkələrimiz arasında sıx siyasi və iqtisadi əlaqələrin mövcud olduğunu bildirmiş və bu münasibətlərin daha da genişləndirilməsinin vacibliyini qeyd etmişlər.

İki ölkə arasında beynəlxalq təşkilatlar çərçivəsində əməkdaşlığın davam etdirilməsi və gücləndirilməsinin zəruriliyinə də xüsusi önəm verilmişdir. Bu məqsədlə 2010-cu ildə Azərbaycan və Tacikistan Xarici İşlər nazirlikləri arasında siyasi məsləhətləşmələr məqsədi ilə görüş keçirilməsinə hazırlıq görülməsi qərara alınmışdır.

Sonra tərəflər Orta Asiya, Əfqanıstan və Cənubi Qafqazda gedən proseslər, qarşılıqlı maraq doğuran digər məsələlər ətrafında fikir mübadiləsi aparmışlar.

Azərbaycan.- 2009.- 12 noyabr.- S. 10.