Azərbaycan-Suriya münasibətlərinin inkişafında hər iki ölkə rəhbərlərinin rolu yüksək qiymətləndirilmişdir

Xarici işlər naziri Elmar Məmmədyarov Suriya Ərəb Respublikasının xarici işlər nazirinin müavini Feysal Əl-Miqdad ilə görüşmüşdür.

Xarici İşlər Nazirliyinin mətbuat xidmətindən verilən məlumatda bildirilir ki, görüşdə Azərbaycan və Suriya arasında əlaqələrin yüksək səviyyədə olmasında ölkə rəhbərlərinin şəxsi münasibətlərinin əhəmiyyəti vurğulanmışdır.

Siyasi əlaqələrin inkişafından danışan tərəflər, iqtisadi sahədə də əməkdaşlığın genişləndirilməsinin vacibliyini bildirmişlər. Bu məqsədlə qarşılıqlı səfərlərin və iş adamlarının görüşlərinin təşkilinin zəruriliyi qeyd olunmuşdur.

Regiondakı proseslərə toxunan Suriya xarici işlər nazirinin müavini F.Əl-Miqdad İslam dünyası birliyinin vacibliyini qeyd etmiş və müsəlman ölkələrinin birgə maraq kəsb edən məsələlərdə həmrəylik göstərməsinin zəruriliyini vurğulamışdır.

Xarici işlər naziri E.Məmmədyarov Azərbaycanın İslam dünyası ilə həmrəy olduğunu bildirmişdir. Ermənistanın Azərbaycana qarşı davam edən təcavüzünə toxunan nazir münaqişənin nizamlanması ilə bağlı ölkəmizin mövqeyi barədə məlumat vermişdir.

Tərəflər Yaxın Şərqdə və Cənubi Qafqaz regionunda baş verən proseslər ətrafında fikir mübadiləsi aparmışlar.

Azərbaycan.- 2009.- 12 noyabr.- S. 10.