İran Dağlıq Qarabağ münaqişəsinin Azərbaycanın ərazi bütövlüyü çərçivəsində həllinə tərəfdardır

Noyabrın 9-da Milli Məclisin Sosial siyasət komitəsinin üzvləri ölkəmizdə səfərdə olan İran İslam Respublikası İslam Şurası Məclisinin Sosial məsələlər komissiyasının sədri Süleyman Cəfərzadənin başçılıq etdiyi nümayəndə heyəti ilə görüşdülər. Milli Məclisin Sosial siyasət komitəsinin sədri Hadi Rəcəbli qonaqlara Azərbaycan parlamentinin qanunvericilik bazası, rəhbərlik etdiyi komitənin fəaliyyəti, qanun yaradıcılığı prosesi və demokratik dövlət quruculuğu istiqamətində atılmış mühüm addımlar, iqtisadi islahatlar barədə ətraflı məlumat verdi. Hadi Rəcəblinin sözlərinə görə, bu cür səfərlər təkcə qanunvericilik orqanları arasında deyil, bütün sahələrdə münasibətlərin daha da dərinləşməsinə və möhkəmlənməsinə xidmət edir.

Hadi Rəcəbli onu da qeyd etdi ki, dövlətlərimiz arasındakı münasibətlər Azərbaycan müstəqilliyini bərpa etdikdən sonra yeni müstəvidə inkişaf etməyə başlamışdır. Əlaqələrin yüksək səviyyəyə çatmasında iki ölkənin prezidentlərinin böyük xidmətləri olmuşdur. Parlamentlərimiz yaranmış imkandan səmərəli istifadə edərək əməkdaşlığı daha da genişləndirməlidirlər.

Süleyman Cəfərzadə onlara göstərilən qonaqpərvərliyə görə minnətdarlığını bildirdi. Qonaq dedi ki, İran yaxın qonşusu və dostu olan Azərbaycanla əlaqələrin daha da inkişafında və genişlənməsində maraqlıdır. Süleyman Cəfərzadə onu da qeyd etdi ki, iranlı deputatlar beynəlxalq təşkilatlarda azərbaycanlı həmkarlarını daim dəstəkləyir və bundan sonra da dəstəkləyəcəklər. İran Ermənistan-Azərbaycan, Dağlıq Qarabağ münaqişəsinin də Azərbaycanın ərazi bütövlüyü çərçivəsində həllinə tərəfdardır.

Görüşdə qarşılıqlı maraq doğuran məsələlər ətrafında fikir mübadiləsi aparıldı.

Azərbaycan.- 2009.- 10 noyabr.- S. 4.