Görüş hər iki tərəf üçün faydalı olacaqdır

Noyabrın 9-da Azərbaycan İnvestisiya Şirkətində (AİŞ) Azərbaycan-Sloveniya Biznes Forumu çərçivəsində İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə maliyyə sektoru üzrə "dəyirmi masa" keçirilmişdir.

"Dəyirmi masa"da AİŞ və onun törəmə şirkətlərinin, Bakı Fond Birjasının, Azərbaycan Beynəlxalq Bankı, "Paşa Bank", "Atabank" və bir sıra kommersiya banklarının, Sloveniya tərəfindən "S.t.Hammer", "STBM", "Korona", "Agencija İmelda" və s. şirkətlərin və kommersiya banklarının təmsilçiləri iştirak etmişlər.

AİŞ-nin icraçı direktoru Əfqan İsayev təmsil etdiyi qurumun yaranması, fəaliyyəti barədə qonaqlara ətraflı məlumat vermiş və bildirmişdir ki, AİŞ xarici şirkətlərlə, eləcə də sloveniyalı səhmdarlarla əməkdaşlıqda maraqlıdır. Azərbaycan sərmayə qoyuluşu baxımından çox geniş imkanlara malikdir. Ümid edirəm ki, görüşümüz hər iki tərəf üçün çox məhsuldar və faydalı olacaqdır.

Tədbirdə AİŞ-nin təqdimatı keçirilmiş, Azərbaycan və Sloveniyanın investisiya mühiti və biznes imkanları, ölkələrimizin maliyyə-bank sistemi barədə məlumat verilmiş, bu sahələrdə işgüzar əlaqələrin daha da genişləndirilməsi məsələləri müzakirə olunmuşdur.

Sloveniya şirkətləri və kommersiya banklarının fəaliyyəti ilə bağlı ətraflı məlumat verilmiş, qarşılıqlı maraq doğuran məsələlər ətrafında fikir mübadiləsi aparılmışdır.

Azərbaycan.- 2009.- 10 noyabr.- S. 4.