Düşənbədə MDB Müdafiə Nazirləri Şurasının növbəti iclası keçirilmişdir

Tacikistanın paytaxtı Düşənbə şəhərində Müstəqil Dövlətlər Birliyi (MDB) Müdafiə Nazirləri Şurasının növbəti iclası keçirilmişdir.

İclasda Azərbaycanın müdafiə naziri Səfər Əbiyevin başçılığı ilə ölkəmizin nümayəndə heyəti də iştirak etmişdir.

Müdafiə nazirləri 2015-ci ilə qədərki dövrdə hərbi əməkdaşlıq Konsepsiyasını bəyənmiş, şuranın 2010-cu il üçün iş planını təsdiqləmiş, MDB ölkələri birgə hava hücumundan müdafiə sisteminin 2015-ci ilədək əsas inkişaf istiqamətlərini müzakirə etmişlər.

İclas iştirakçıları MDB hava hücumundan müdafiə qüvvələri strukturunda dəyişikliklər etmiş, 2010-cu ildə MDB hava hücumundan müdafiə qüvvələrinin birgə tədbirlərinin keçirilməsini müəyyənləşdirmişlər.

Şuranın iclasında hava məkanından istifadə qaydaları üzərində nəzarət sisteminin təkmilləşdirilməsi, uçuşların təhlükəsizliyinin təmin edilməsi sahəsində əməkdaşlığın inkişafı problemləri də müzakirə olunmuşdur.

Müdafiə nazirləri ekoloji təhlükəsizliyin təmin olunması üçün informasiya-sorğu sisteminin yaradılmasını qərara almış, şuranın yeni işçi orqanı - texniki təminat üzrə Əlaqələndirmə Komitəsinin yaradılması haqqında Əsasnaməni təsdiq etmişlər.

İclasda ümumilikdə 20 məsələyə baxılmışdır.

Tacikistan Prezidenti Emoməli Rəhmon müdafiə nazirlərini qəbul etmişdir.

Azərbaycan.- 2009.- 12 noyabr.- S. 9.