Ümumdünya Diabet Gününə həsr olunmuş tədbir keçirilmişdir

Noyabrın 13-də Azərbaycan Media Mərkəzində Azərbaycan Diabet Cəmiyyətinin təşkilatçılığı ilə Ümumdünya Diabet Gününə həsr olunmuş tədbir keçirilmişdir.

Cəmiyyətin sədri Möminat Ömərova bildirmişdir ki, diabet mədəaltı vəzin kifayət qədər insulin ifraz etməməsi nəticəsində yaranan xroniki xəstəlikdir. Dünya Səhiyyə Təşkilatı tərəfindən dünyada bu xəstəliyin yayılmasının qarşısını almaq məqsədi ilə 14 noyabr - Ümumdünya Diabet Günü elan edilmişdir.

M.Ömərova vurğulamışdır ki, hazırda dünyada 250 milyon insan şəkərli diabet xəstəsidir. Sürətlə artan bu xəstəlik ciddi sosial-tibbi problemlər yaradır, ölkələrin iqtisadiyyatına da mənfi təsir edir. Diabetə hər bir insan tutula bilər. Bu xəstəlik müalicə olunmadıqda ölümlə nəticələnir. Hər bir insanın diabetin əlamətləri, onun fəsadlarının qarşısının alınması haqqında məlumatı olmalıdır.

Cəmiyyətin sədr müavini Akif Muxtarov əhalinin maarifləndirilməsi istiqamətində görülən işlərdən danışaraq demişdir ki, birinci tip şəkərli diabet xəstələr üçün qidalanma və fiziki iş barədə məlumat kitabçaları hazırlanmışdır. Kitabçalar şəhər və rayonlarda yaşayan xəstələrə və endokrinoloji tibbi yardım göstərən müəssisələrə çatdırılmışdır.

Tədbirdə məlumat verilmişdir ki, dünyanın inkişaf etmiş dövlətləri ilə yanaşı, Azərbaycanda da "Şəkərli diabet xəstəliyinə tutulmuş insanlara dövlət qayğısı haqqında" qanun qəbul edilmişdir.

AzərTAc

Azərbaycan.- 2009.- 14 noyabr.- S. 6.