"İslam mədəniyyəti və sivilizasiyasının dəyərləri" mövzusunda kulturoloji seminar keçirilmişdir

Noyabrın 14-də "Simurq" Azərbaycan Mədəniyyət Assosiasiyası, Azərbaycan Kulturoloqlar Cəmiyyəti, Vətəndaş Cəmiyyəti Beynəlxalq Mədəniyyət Forumunun təşkilatçılığı ilə "İslam mədəniyyəti və sivilizasiyasının dəyərləri" mövzusunda respublika kulturoloji seminarı keçirilmişdir.

"Novosti-Azərbaycan" beynəlxalq informasiya agentliyində təşkil olunan tədbiri "Simurq" Azərbaycan Mədəniyyət Assosiasiyasının prezidenti, professor Fuad Məmmədov açaraq, müzakirə edilən mövzunun əhəmiyyətindən danışmışdır.

Natiq demişdir ki, "Bakı İslam mədəniyyətinin paytaxtı-2009" mədəniyyət ili çərçivəsində ölkəmiz bir-birindən maraqlı onlarla tədbirə ev sahibliyi etmişdir. Bu mərasimlərdə İslamın insanlara bəxş etdiyi mənəvi dəyərlər barədə geniş məlumatlar verilmiş və Azərbaycanda İslam dəyərlərinə göstərilən böyük hörmət və qayğıdan danışılmışdır.

F.Məmmədov "Simurq" Azərbaycan Mədəniyyət Assosiasiyasının vitse-prezidentləri - akademiklər Fuad Qasımzadə, Maqsud Əliyev və Asəf Nadirova qurumun fəxri fərmanlarını təqdim etmişdir.

Seminarda fəlsəfə elmləri doktoru Aydın Əlizadə "Din və əxlaq", filologiya elmləri namizədi Samirə Mirbağırzadə "Müsəlman incəsənəti", fəlsəfə elmləri namizədləri İradə Zərqanayeva "Əbu Həmid Qəzali İslam mədəniyyətinin qurucularından biri kimi", Elsevər Səmədov "İslam mədəniyyətinin formalaşması və təsir dairələri", Radif Mustafayev "Orta əsrlər müsəlman sivilizasiyasında bərabərlik problemləri", Mətanət Şəkixanova "XIX əsrin sonu XX əsrin əvvəllərində yeni İslam islahatçıları: Musa Çarulla Biqi və onun "Müsəlman millətlərinə" əsəri barədə" mövzularında çıxışlar etmişlər.

Seminardan sonra "Müsəlman mədəniyyəti və sivilizasiyası: gələcəyin görünüşü" mövzusunda "dəyirmi masa" keçirilmişdir.

AzərTAc

Azərbaycan.- 2009.- 15 noyabr.- S. 5.