Bakıda "VTB Bank"ın nümayəndəliyi açılmışdır

Mərasimdə Azərbaycanda səfərdə olan Rusiya Prezidenti Administrasiyanın rəhbəri Sergey Narışkin, Baş nazirin birinci müavini Yaqub Eyyubov, "VTB Bank"ın idarə heyətinin sədri - prezidenti Andrey Kostin, Mərkəzi Bankın idarə heyəti sədrinin birinci müavini Alim Quliyev, ölkəmizin Rusiyadakı səfiri Polad Bülbüloğlu iştirak etmişlər.

Mərasimdə çıxış edən S.Narışkin Azərbaycan-Rusiya əlaqələrinin inkişaf sürətindən danışmış, bu əlaqələrin fonunda bank sektorunun əhəmiyyətini xüsusi vurğulamışdır. O, bu nümayəndəliyin açılmasını Rusiyanın Azərbaycana verdiyi yüksək əhəmiyyətin təcəssümü kimi qiymətləndirmişdir.

Daha sonra S.Narışkin və Y.Eyyubov bankın xatirə kitabına ürək sözlərini yazmışlar.

A.Kostin açılışdan sonra jurnalistlərə bildirmişdir ki, bank geniş spektrli bank xidmətləri göstərəcəkdir. Əvvəlcə bankın fəaliyyəti korporativ müştərilərə xidmət göstərilməsinə və xarici ticarət əməliyyatlarının maliyyələşdirilməsinə yönəldiləcəkdir. Gələcəkdə isə bu xidmətlər siyahısına biznesin fərdi, investisiya və digər istiqamətləri əlavə olunacaqdır.

Hələlik bankın Azərbaycanda yalnız bir ofisi fəaliyyət göstərəcəkdir. Lakin yaxın zamanlarda Sumqayıtda və Gəncədə də filialların açılması gözlənilir. Bankın nizamnamə kapitalı 9,7 milyon manat, aktivləri isə 20 milyon dollar təşkil edir.

A.Kostin nümayəndəliyin Bakıda açılmasını Azərbaycanın sənaye və ticarət potensialının yüksək olması ilə izah etmiş, bu regionu maliyyə yatırımları üçün olduqca cəlbedici hesab etdiyini vurğulamışdır.

AzərTAc

Azərbaycan.- 2009.- 24 noyabr.- S. 2.