Rusiya Federasiyası nəqliyyat kompleksinin innovasiya inkişafı sərgisi ilə tanışlıq

Volqa çayı üzərində körpü-keçidin açılışından sonra Azərbaycan Prezidenti İlham Əliyev və Rusiya Prezidenti Dmitri Medvedev "Rusiya Federasiyası nəqliyyat kompleksinin innovasiya inkişafı" mövzusunda sərgi ilə tanış olmuşlar.

Prezidentlər İlham Əliyev və Dmitri Medvedevə Rusiyanın nəqliyyat sisteminin müasir tələblərə uyğun inkişafına xidmət edəcək innovasiya layihələri nümayiş etdirilmişdir.

Sərgidə sürücülərin iş zamanı əmək və istirahətinə nəzarət terminalı, yüksəksürətli qatarların maketləri, qaz-turbin güc qurğulu lokomotivlər, qatarların avtomatlaşdırılmış idarəetmə sistemi və sair layihələrə yer verilmişdir.

Dövlət başçılarına bildirilmişdir ki, yüksək sürət qatarları Moskva ilə Sankt-Peterburq arasında məsafəni 3 saat 40 dəqiqəyə qət edə bilər.

Bundan başqa, prezidentlər İlham Əliyev və Dmitri Medvedevə QLONASS texnologiyasına əsaslanan intellektual nəqliyyat sistemi layihəsi də göstərilmişdir.

Rusiya Prezidenti bir sıra layihələrin tezliklə reallaşdırılması və bazara çıxarılması barədə tapşırıqlarını vermişdir.

Dövlət başçıları Volqa üzərində körpünü tikən inşaatçılarla da söhbət etdilər.

AzərTAc

Azərbaycan.- 2009.- 25 noyabr.- S. 2.