Ulyanovskda Azərbaycan xalqının ümummilli lideri Heydər Əliyevin adını daşıyan meydanın açılışı olmuşdur

Xəbər verdiyimiz kimi, noyabrın 24-də Ulyanovsk şəhərinin mərkəzində Azərbaycan xalqının ümummilli lideri Heydər Əliyevin adını daşıyan meydanın açılış mərasimi olmuşdur.

Azərbaycan Respublikasının Prezidenti İlham Əliyev və Rusiya Federasiyasının Prezidenti Dmitri Medvedev mərasimdə iştirak etmişlər.

Azərbaycan xalqının ümummilli lideri Heydər Əliyev vaxtilə bir neçə dəfə Ulyanovsk şəhərində olmuşdur. Sovetlər Birliyində ali rəhbər vəzifədə işləyərkən ulu öndər bu şəhərin inkişafı ilə bağlı mühüm qərarların qəbul edilməsində bilavasitə iştirak etmişdir. Şəhər sakinləri dünya şöhrətli siyasi xadimin xatirəsini daim əziz tuturlar. Məhz buna görə də Ulyanovskın mərkəzi meydanlarından birinə Heydər Əliyevin adı verilmişdir. Bu meydanda ulu öndərin əzəmətli heykəli ucaldılmışdır.

Mərasimə toplaşanlar dövlət başçılarını hərarətlə qarşıladılar.

Prezidentlər ulu öndər Heydər Əliyevin abidəsi önünə gül dəstələri qoydular, xatirəsinə ehtiramlarını bildirdilər.

Daha sonra prezidentlər İlham Əliyev və Dmitri Medvedev Ulyanovskda yaşayan Azərbaycan diasporunun nümayəndələri ilə görüşüb söhbət etdilər.

Diasporun nümayəndəsi: Cənab Prezident, Sizi Ulyanovsk torpağında salamlamağa şadıq! Xoş gəlmisiniz!

Biz bu abidəni keçən il ucaltmışıq. Bu, xalqlarımız arasında, Rusiya ilə Azərbaycan arasında dostluğun rəmzidir. Əlbəttə, bu, ulu öndərə, Azərbaycan xalqının ümummilli lideri Heydər Əliyevə, habelə həyata keçirilən milli siyasətə böyük ehtiramın əlamətidir. Biz Ulyanovsk vilayətinin qubernatoru Sergey İvanoviç Morozovun köməyi sayəsində belə bir gözəl abidə yarada bilmişik, həmçinin Azərbaycan Tarixi və Mədəniyyəti Muzeyi açmışıq. Həmin muzeyin ayrıca bir stendi Heydər Əliyevin həyat və fəaliyyətinə həsr edilmişdir.

Dmitri MEDVEDEV: Bəs muzey haradadır?

Diasporun nümayəndəsi: 78 nömrəli məktəbdə, bura yaxındır, 200 metr aralıda yerləşir. Orada bazar günü məktəbi, yaradıcılıq dərnəkləri də vardır, folklor qrupları məşğələ keçirlər. Uşaqlar milli mədəniyyəti, bədii tikmə sənətinin, metal üzərində nəqqaşlığın sirlərini öyrənirlər. Bizim hələ futbol komandamız da vardır - "Neftçi" adlanır.

Dmitri MEDVEDEV: Burada neft var?

Diasporun nümayəndəsi: Taparlar.

Dmitri MEDVEDEV: Afərin, yaxşı abidədir!

Diasporun nümayəndəsi: Heydər Əliyevin şərəfinə onun adını daşıyan bu meydan Ulyanovsk vilayət hökumətinin, şəhər merinin köməyi ilə yaradılmışdır. Bu torpağın hər qarışında həmvətənlərimizin əməyi vardır. Hətta buradakı ağacları da həmyerlilərimiz və yerli fəhlələr əkiblər. Burada Heydər Əliyevə abidə ucaldılmasına görə bütün azərbaycanlılar fəxr edirlər. Bu, azərbaycanlılara bəslənilən dostluq, mehriban qonşuluq münasibətlərinin parlaq nümunəsidir. Fəxr edirik ki, bizdə belə bir abidə vardır. Biz fəxr edirik ki, Siz bizə qonaq gəlmisiniz. Bu, bizim üçün bayramdır.

İlham ƏLİYEV: Sağ olun. Mən çox şadam ki, siz burada yaxşı, mehriban yaşayırsınız, şəhərin, vilayətin həyatında fəal iştirak edirsiniz. Şadam ki, siz Rusiyanın yaxşı vətəndaşlarısınız. İnsanın öz xalqını, mədəniyyətini, tarixi xadimlərini xatırlaması və eyni zamanda, yaşadığı ölkənin yaxşı, vicdanlı vətəndaşı olması çox vacibdir. Mən çox şadam ki, azərbaycanlılar burada yaxşı yaşayırlar. Şadam ki, siz burada çox əhəmiyyətli dəyərlər yaradırsınız. Mən həm də Heydər Əliyevin xatirəsinə bu cür münasibətə görə vilayətin, şəhərin rəhbərlərinə təşəkkür etmək istəyirəm. Məni hər bir azərbaycanlı üçün çox əhəmiyyətli olan bu mərasimə dəvət etdiyinə və özü də həmin mərasimdə iştirak etdiyinə görə Rusiya Prezidentinə təşəkkür etmək istəyirəm. Mən burada özümü evimdə olduğu kimi hiss edirəm. Mən sizi gördüm, bax, bu şəraiti gördüm. Bu, həqiqətən Rusiya-Azərbaycan dostluğu günüdür. Sağ olun və gələcək işlərinizdə sizə uğurlar arzulayıram.

Diasporun nümayəndəsi: Biz bunlarla kifayətlənməyəcəyik. Biz hələ inkişaf edəcək, münasibətlərimizi qoruyub saxlayacağıq.

İlham ƏLİYEV: Düzdür.

Dmitri MEDVEDEV: Həqiqətən, bununla kifayətlənmək lazım deyildir. Ona görə ki, bu, bizim dostluğumuzun rəmzidir, bizim birlikdə yaşamağımızın rəmzidir, Rusiyanın inkişafına azərbaycanlıların verdiyi töhfənin rəmzidir. Mənə belə gəlir ki, bu, çox vacibdir və bizim birlikdə yeni dövlət qurmağımızın əlamətdar göstəricisidir, eyni zamanda, Rusiyada yaşayan azərbaycanlıların öz tarixi köklərini yadda saxlamalarının, liderlərini yadda saxlamalarının rəmzidir. Bu, həqiqətən vacibdir, xüsusən ona görə ki, Heydər Əliyev bizim birlikdə yaşadığımız dövlətdə işləmiş və o vaxtkı ortaq dövlətimizin inkişafı üçün olduqca çox iş görmüşdür. Bu gün biz 20 il müddətində yaradılmış, o vaxt SSRİ Nazirlər Soveti sədrinin birinci müavini olmuş Heydər Əlirza oğlu Əliyevin fəal iştirakı ilə yaradılmış körpünü açdıq. Ona görə də bunlar keçmişin şanlı səhifələri və bu günün əlamətdar səhifələridir.

İlham ƏLİYEV: Onu da demək istəyirəm ki, Azərbaycanda da rus icması mehriban yaşayır. Onlar Azərbaycanın layiqli vətəndaşlarıdır, ölkəmizin inkişafına çox böyük töhfə verirlər. Onlar əsrlər boyu Azərbaycanda yaşayırlar. Bu yaxınlarda mən rus vətəndaşlarımızın yaşadığı böyük bir kənddə - İvanovka kəndində olmuşam.

Dmitri MEDVEDEV: Kəndin adı da müvafiqdir.

İlham ƏLİYEV: Həmin kənddə Heydər Əliyev də olmuşdur, mən də dəfələrlə orada olmuşam, adamlarla ünsiyyət saxlamışam. Orada məhsul bayramı idi. Bu da bizim xalqlar arasında dostluq bayramı idi. Buna görə də insanlar arasında münasibətlər və başqa millətdən olan insanlara münasibət dövlətlərimizi birləşdirən amildir. Bizim dövlətlərin gücü bundadır.

Dmitri MEDVEDEV: Mən Sizə təşəkkür edirəm ki, Ulyanovska gəlmisiniz. Ona görə ki, biz həmişə Moskvada, Peterburqda, Soçidə, yaxud Bakıda görüşməyəcəyik ki. Başqa şəhərlərə də getmək lazımdır. Rusiya böyük ölkədir, üstəlik, burada Azərbaycanla və Azərbaycanın liderinin xatirəsi ilə bağlı yerlər çoxdur. Ona görə də sizə uğurlar arzulayıram!

Ulyanovsk sakini: Sağ olun, cənab İlham Heydər oğlu. Rusiya ilə münasibətləri atanızın sağlığında olduğu kimi saxlayın. Allah köməyiniz olsun!

İlham ƏLİYEV: Çalışırıq.

Ulyanovsk sakini: Əlbəttə, istərdik ki, bütün respublikalarla münasibətlər bu cür olsun.

Dmitri MEDVEDEV: Bizim münasibətlər məhz bu cür münasibətlərə nümunədir. Qoy, başqa respublikalar görsünlər.

İlham ƏLİYEV: Biz Dmitri Anatolyeviçlə həmişə deyirik ki, bütün qonşularla münasibətlər Rusiya ilə Azərbaycan arasındakı münasibətlər kimi olsaydı, dünyada problem olmazdı.

Dmitri MEDVEDEV: Düzdür. Sizə uğurlar arzulayıram!

Mərasim iştirakçıları: Sağ olun, xoşbəxt olun.

AzərTAc

Azərbaycan.- 2009.-26 noyabr.- S. 1.