Turizmin təbliğinə həsr olunmuş seminar keçirilir

"Bakı İslam mədəniyyətinin paytaxtı-2009" ili çərçivəsində sentyabrın 30-da Şirvanşahlar Sarayında "Asiya ölkələrində bəşəri və mədəni irsin istifadəsinin turizmin təbliğində rolu" mövzusunda seminar başlamışdır.

Seminarda Azərbaycan, İran, Pakistan, Qazaxıstan, Qırğızıstan, İndoneziya və Malayziyadan turizm və mədəni irsin qorunması sahəsində çalışan mütəxəssislər iştirak edirlər.

Tədbir Azərbaycan Mədəniyyət və Turizm Nazirliyi və İSESKO-nun Tehrandakı regional ofisinin təşkilatçılığı ilə keçirilir.

Açılış mərasimində çıxış edən Mədəniyyət və Turizm Nazirliyinin mədəni irs şöbəsinin müdiri Rizvan Bayramov Bakının İslam mədəniyyətinin paytaxtı elan olunması ili çərçivəsində bugünədək 100-dək tədbirin keçirildiyini söyləmişdir. O, bu seminarın mütəxəssislərin bilik və təcrübə mübadiləsi baxımından böyük əhəmiyyət daşıdığını vurğulamışdır.

İSESKO-nun Tehrandakı regional ofisinin rəhbəri Abbas Sədri isə Azərbaycan paytaxtının İslam mədəniyyətinin paytaxtı ili çərçivəsində keçirilən tədbirlərin yüksək səviyyədə təşkil olunduğunu bildirmişdir.

İSESKO-nun baş direktoru Əbdüləziz bin Osman əl-Tüveycrinin salamlarını çatdıran qonaq seminarın mədəni irsin qorunmasında layiqli töhfə verəcəyinə əmin olduğunu söyləmişdir.

Oktyabrın 2-dək davam edəcək seminar zamanı müxtəlif ölkələrin turizm potensialı və mədəni irsin qorunması sahəsində həyata keçirilən tədbirlər barədə məruzələr dinləniləcək, qonaqlara Abşeronun tarixi abidələri göstəriləcəkdir.

AzərTAc

Azərbaycan.- 2009.- 1 oktyabr.- S. 11.