Prokurorluq işçiləri peşə bayramlarını qeyd etmişlər

Xalqımızın ümummilli lideri Heydər Əliyevin 1998-ci il 17 iyul tarixli sərəncamına müvafiq olaraq hər il oktyabrın 1-i prokurorluq işçilərinin peşə bayramı günü kimi qeyd edilir.

Prokurorluq işçilərinin peşə bayramı günü münasibətilə oktyabrın 1-də Baş Prokurorluğun, Respublika Hərbi və Bakı şəhər prokurorluqları orqanlarının kollektivləri xalqımızın ümummilli lideri Heydər Əliyevin məzarını və Şəhidlər xiyabanını ziyarət etmiş, ulu öndərimizin və ölkəmizin müstəqilliyi yolunda həyatlarını qurban vermiş həmvətənlərimizin əziz və unudulmaz xatirəsini dərin hörmətlə anmışlar.

Baş Prokurorluqda 1 oktyabr - Prokurorluq İşçilərinin peşə bayramı günü və Azərbaycan Prokurorluğunun yaradılmasının 91-ci ildönümünə həsr olunmuş təntənəli mərasim keçirilmişdir.
Peşə bayramı günü münasibətilə prokurorluq əməkdaşlarını və veteranları təbrik edən baş prokuror Zakir Qaralov bildirmişdir ki, ulu öndər Heydər Əliyevin zəngin dövlətçilik ənənələri olan Azərbaycanın milli dəyərlərinə və tarixi keçmişinə dərin hörmətin təzahürü olan 1998-ci il 17 iyul tarixli sərəncamı ilə prokurorluq orqanlarına dövlət qayğısı ifadə olunmuş, müstəqil inkişaf yolu seçmiş cəmiyyətimizdə prokurorluğun yeri və roluna münasibət bildirilmişdir.

Nəzərə çatdırılmışdır ki, bütün digər dövlət təsisatları kimi, Azərbaycan Prokurorluğunun da sivil və demokratik, öz xalqının və müstəqil dövlətçiliyin maraqlarına xidmət edən qurum kimi formalaşması yalnız Heydər Əliyevin dövlətçilik siyasəti nəticəsində mümkün olmuşdur. Dövlət müstəqilliyini bərpa etdikdən sonra 1991-1992-ci illər və 1993-cü ilin birinci yarısını əhatə edən anarxiya və xaos dövrünü yaşamış Azərbaycan Respublikasında milli prokurorluq orqanlarının demokratik məzmunda yenidən formalaşdırılması, prokurorluğun totalitar rejimlərə xas funksiyalarından imtina edilməsi, onun beynəlxalq standartlara uyğun yeni statusunun müəyyənləşdirilməsi, müasir qanunvericilik bazasının yaradılması, yeni kadr korpusunun formalaşdırılması, digər hüquq-mühafizə orqanları ilə qarşılıqlı əlaqədə və yüksək tələbkarlıq səviyyəsində fəaliyyət göstərən, dövlətçiliyimizin maraqlarının, insan hüquq və azadlıqlarının müdafiəsinə, cinayətkarlıqla mübarizə işinə xidmət edən sivil bir dövlət təsisatına çevrilməsi yalnız ulu öndər Heydər Əliyevin rəhbərliyi ilə həyata keçirilən məhkəmə-hüquq islahatları nəticəsində mümkün olmuşdur.

Xüsusi vurğulanmışdır ki, Azərbaycan Prezidenti İlham Əliyev tərəfindən prokurorluq orqanlarına hərtərəfli qayğı və diqqət göstərilir. Məhz Azərbaycan Prezidentinin dəstəyi nəticəsində məhkəmə hakimiyyətinin tərkib hissəsi kimi prokurorluğun fəaliyyətinin müasirləşdirilməsi, yeni informasiya texnologiyalarına əsaslanan mütərəqqi iş metodlarının tətbiqi, Baş prokuror yanında Korrupsiyaya Qarşı Mübarizə İdarəsinin və tam yeni məzmunlu dövlət ittihamının müdafiəsi üzrə qurumların yaradılması yolu ilə strukturun təkmilləşdirilməsi, əməkdaşların maddi-sosial təminatı məsələlərinin inkişaf etmiş dövlətlərdəki səviyyəyə qaldırılması, müasir standartlara uyğun maddi-texniki bazanın yaradılması və çoxsaylı yeni inzibati binaların tikintisi həyata keçirilmiş, habelə digər mühüm tədbirlər reallaşdırılmışdır.

Diqqətə çatdırılmışdır ki, prokurorluq orqanlarının müasir məzmunda yeniləşməsi işində Azərbaycan Respublikası Prezidentinin 2008-ci il 27 sentyabr tarixli sərəncamı ilə təsdiq edilmiş "Azərbaycan Respublikası Prokurorluğunun fəaliyyətinin müasirləşdirilməsinə dair 2009-2011-ci illər üçün Dövlət Proqramı"nın müstəsna əhəmiyyəti olmuşdur. Azərbaycan Prokurorluğunun tarixində yeni təkmilləşmə və inkişaf, müasirləşdirmə dövrünün əsasını qoyan Dövlət Proqramında nəzərdə tutulan tədbirlərin yerinə yetirilməsi cəmiyyətdə prokurorluğun rolunun artırılması, digər hüquq-mühafizə orqanları ilə qarşılıqlı fəaliyyətin təkmilləşdirilməsi, prokurorluğun işində müasir elmi-texniki nailiyyətlərdən geniş istifadə olunması, "Prokurorluq haqqında" qanunda müəyyən edilmiş fəaliyyət istiqamətləri üzrə işin səmərəliliyinin artırılması, prokurorluq işçilərinin sosial müdafiəsinin gücləndirilməsi və prokurorluğun maddi-texniki təminatının yaxşılaşdırılması üçün hərtərəfli zəmin yaratmışdır.

Diqqətə çatdırılmışdır ki, Dövlət Proqramının icrası ilə əlaqədar prokurorluq orqanları qarşısında duran vəzifələr Baş Prokurorluğun kollegiya iclasında ətraflı müzakirə olunmaqla onların yerinə yetirilməsi istiqamətində zəruri tədbirlər görülür. "Prokurorluq haqqında", "Prokurorluq orqanlarında qulluq keçmə haqqında" və "Əmək pensiyaları haqqında" Azərbaycan Respublikası qanunlarına prokurorluq işçilərinin sosial vəziyyətinin və pensiya təminatının yaxşılaşdırılması, habelə digər məsələlər üzrə 16 əlavə və 22 dəyişiklik edilməsini nəzərdə tutan "Azərbaycan Respublikasının bəzi qanunvericilik aktlarına əlavələr və dəyişikliklər edilməsi haqqında" Azərbaycan Respublikası qanununun layihəsi hazırlanaraq aidiyyəti üzrə təqdim olunmuşdur. Eyni zamanda, Azərbaycan Respublikasının Baş Prokuroru yanında Elmi-Tədris Mərkəzinin, hərbi prokurorluq orqanlarının strukturunun təkmilləşdirilməsi məqsədi ilə Zaqatala Hərbi Prokurorluğunun yaradılması, Baş Prokurorluq və tabe prokurorluqlar arasında elektron məlumat mübadiləsini təmin edəcək informasiya-kommunikasiya şəbəkəsinin formalaşdırılması, prokurorluğun avtomatlaşdırılmış məlumat-axtarış sistemlərinə daxil olması, "Prokurorluq haqqında" qanunla müəyyənləşdirilmiş istiqamətlər üzrə fəaliyyətimizin daha da təkmilləşdirilməsi sahəsində xeyli işlər görülmüşdür.

Baş prokuror qeyd etmişdir ki, ölkəmizdə həm respublika miqyasında, həm də ayrı-ayrı regionlar səviyyəsində sosial-iqtisadi inkişaf daha da sürətləndirilmiş, yeni yüksəliş dövrünü yaşayan Azərbaycan iqtisadi inkişaf göstəricilərinə görə dünyada ön mövqelərə çıxmış, demokratik və hüquqi dövlətimizin iqtisadi qüdrəti daha da artırılmış, ölkə həyatının bütün sahələrində sürətli irəliləyişlərlə səciyyələnən və xalqımızın həyat səviyyəsinin əhəmiyyətli dərəcədə yüksəlməsi ilə nəticələnən göstəricilərə nail olunmuş, dünya birliyinə daha sıx inteqrasiya olunan ölkəmizin beynəlxalq nüfuzu əhəmiyyətli dərəcədə artmışdır.

"Əsrin müqaviləsi"nin 15-ci ildönümünə həsr olunmuş tədbirlər və təntənəli mərasimdə dövlətimizin başçısı İlham Əliyevin nitqində səsləndirilən fikirlər bir daha əyani şəkildə göstərmişdir ki, son illərdə Azərbaycan Respublikasının əldə etdiyi sosial-iqtisadi inkişaf göstəriciləri ölçüyəgəlməzdir, ölkəmiz tarix üçün bir an olan qısa zaman kəsiyində dünyanı heyrətə gətirən uğurlar əldə etmişdir. Yeni neft strategiyasının reallaşdırılması nəticəsində öz enerji təhlükəsizliyini təmin edən Azərbaycan etibarlı bir tərəfdaş kimi dünya birliyində öz layiqli yerini tutmuşdur.

Diqqətə çatdırılmışdır ki, Azərbaycan Respublikasının Prezidenti İlham Əliyev ölkəmizin hərtərəfli sosial-iqtisadi inkişafının təmin edildiyi bir şəraitdə bütün neqativ təzahürlərə, dövlət məmurlarının qanunsuz hərəkətlərinə və cinayətkarlığa qarşı mübarizə məsələlərini də daim diqqət mərkəzində saxlamaqla zəruri tədbirlərin görülməsini təmin edir. Azərbaycan Prezidentinin "Dövlət və bələdiyyə əmlakının və vəsaitlərinin idarə olunması sahəsində korrupsiya ilə əlaqədar hüquqpozmalara qarşı mübarizənin gücləndirilməsi haqqında" 2009-cu il 22 iyun tarixli fərmanı bu istiqamətdə atılmış ən əhəmiyyətli addımlardan biridir.

Bu fərmanın imzalanması, eyni zamanda dövlət səviyyəsində və Prezident İlham Əliyev tərəfindən prokurorluq orqanlarına göstərilən böyük etimadın, cinayətkarlığa, o cümlədən korrupsiya cinayətlərinə qarşı mübarizənin gücləndirilməsi sahəsində prokurorluğun roluna verilən müsbət qiymətin təzahürüdür. Bu etimada cavab olaraq prokurorluq orqanlarında korrupsiya hüquqpozmalarına qarşı zəruri tələblər səviyyəsində kəsərli mübarizə aparılması, bütün müraciətlərin tam və obyektiv araşdırılması, yoxlamaların keçirilməsinə məsul olan prokurorluğun müvafiq qurumları və əməkdaşları tərəfindən sui-istifadə hallarına yol verilməsinin qarşısının dərhal alınması, insan hüquq və azadlıqlarının hərtərəfli qorunması və şəffaflıq təmin edilməlidir.

Çıxışın sonunda prokurorluq orqanlarının işinin respublika Prezidenti və Azərbaycan dövləti tərəfindən göstərilən yüksək etimada layiq səviyyədə qurulması, həyata keçirilən demokratik məzmunlu islahatların müvəffəqiyyətlə başa çatdırılması, hüquqi statusuna müvafiq olaraq fəaliyyət istiqamətləri üzrə prokurorluğun işinin səmərəliliyi və keyfiyyətinin daha da artırılması üçün bütün mümkün tədbirlərin görüləcəyi diqqətə çatdırılmışdır.

Mərasimdə belə bir inam ifadə olunmuşdur ki, xalqımızın ümummilli lideri Heydər Əliyevin dövlətçilik siyasəti nəticəsində sivil və demokratik bir qurum kimi formalaşmış Azərbaycan Prokurorluğu bundan sonra da fəaliyyətinin zəruri tələblər səviyyəsində qurulmasını təmin etməyə qadirdir. Prokurorluq orqanları Prezident İlham Əliyevin respublikamızın yüksələn xətlə sosial-iqtisadi inkişafına istiqamətləndirilmiş dövlətçilik siyasətinin həyata keçirilməsində həmişə ona yardımçı olacaq, ölkəmizdə aparılan quruculuq işlərinin əsas təminatları kimi ictimai-siyasi sabitliyin, əmin-amanlığın, müstəqilliyimizin və milli maraqlarımızın, xalqın mənafeyinin cinayətkar qəsdlərdən qorunmasında yaxından iştirak edəcəkdir.

Peşə bayramı günü münasibətilə Baş Prokurorluq üzrə əmrlə mükafatlandırılmış əməkdaşlara fəxri fərmanlar, qiymətli hədiyyələr və rütbə dərəcələri təqdim edilmişdir.

Mərasimin sonunda prokurorluq orqanlarının kollektivi adından yekdilliklə Azərbaycan Respublikasının Prezidenti İlham Əliyevə müraciət qəbul edilmişdir.

* * *

Prokurorluq işçilərinin peşə bayramı günü və Azərbaycan Respublikası Prokurorluğu orqanlarının yaradılmasının 91 illiyi ərəfəsində Bakı şəhərinin Xətai rayonu, Gədəbəy, Göygöl, İsmayıllı və Biləsuvar rayon prokurorluqları üçün tikilmiş yeni inzibati binaların təntənəli açılış mərasimləri keçirilmişdir.

Baş prokurorun birinci müavini Rüstəm Usubov və müavini Namiq Əsgərovun iştirakı ilə keçirilən həmin tədbirlərdə Azərbaycan Respublikası Prezidentinin 2008-ci il 27 sentyabr tarixli sərəncamı ilə təsdiq edilmiş "Azərbaycan Respublikası Prokurorluğunun fəaliyyətinin müasirləşdirilməsinə dair 2009-2011-ci illər üçün Dövlət Proqramı"nın icrası istiqamətində görülən bu işlər dövlət səviyyəsində prokurorluğa göstərilən diqqət və qayğının təzahürü kimi dəyərləndirilmişdir.

AzərTAc

Azərbaycan.- 2009.- 2 oktyabr.- S. 3.