Telebazar

Müstəqilliyin təməl prinsipləri, atributları hər kəsə məlumdur və respublikamız da bu zəruri faktorlara tam sahibdir. Fəqət, hər bir ölkənin müstəqilliyinin mühüm göstəricilərindən olan mənəvi rəmzləri var ki, onların sırasında da efir məkanı xüsusi yer tutur. Elektron və yazılı KİV-in mövcudluğu, fəaliyyəti, yayımladığı verilişlərin, yaxud dərc etdirdiyi materialların məzmunu və keyfiyyəti məhz mənsub olduğu dövlətin müstəqilliyinin real təsvirini aydınlaşdırır.

Qətiyyətli və prinsipial yanaşma

Azərbaycanda bu sahədəki durum barədə əlavə şərhə ehtiyac yoxdur. Müstəqil dövlətimiz KİV-in sərbəst fəaliyyətini tam təmin edib, azad sözün qarantına çevrilib. Lakin yaradılan bu münbit şərait bir çox hallarda düzgün dəyərləndirilməyib və müəyyən KİV fəaliyyətlərində sui-istifadə hallarına geniş rəvac veriblər. Bu arzuolunmaz proses mediada bəzi nəşrlərin ictimai xadimlərin, ziyalıların şərəf və ləyaqətinə kölgə salaraq, onlara qarşı total qarayaxma kampaniyası aparmaları, həmçinin üzdəniraq "jurnalistlərin" "reket qəzet"lər yaradaraq milli mətbuat ənənələrimizə zidd fəaliyyətlə məşğul olmaları kimi məqamlarla müşayiət olunub.

Bu prosesin teleməkandakı təzahürü isə milli-mənəvi dəyərlərə qarşı yürüdülən "səlib yürüşü", maarifləndirici funksiyanın ucuz şoularla əvəzlənməsidir. Belə xoşagəlməz halların kütləvi xarakter alması və ziyanlı miqyasını dayanmadan genişləndirməsi ölkə ictimaiyyətinin müxtəlif təbəqələrini əslində, bu problemin qarşısını almaq üçün səfərbər edib. Lakin qarşı tərəf hər zaman səslənən iradları qulaqardına vurub və öz "ayıblarına kor olaraq" etiraz müəlliflərinə yönəlik cılız şər kampaniyası aparıblar. Azərbaycan teleməkanının nöqsan və çatışmazlıqları barədə deyilən sözlər, səslənən faktlar heç bir nəticə verməyib, əksinə, mavi efirimizin qara yayımları hər gün daha bir yeni verilişi tamaşaçılara "ərməğan" edib.

Şübhəsiz ki, bu problemin mövcudluğu sadə vətəndaşlarla yanaşı, dövləti də ciddi narahat edir. Məsələyə yüksək səviyyədə kəskin münasibətin bildirilməsi də fikrimizin əyani göstəricisi sayıla bilər. Respublika Prezidentinin Administrasiyasının rəhbəri, akademik Ramiz Mehdiyevin "Azərbaycan" qəzetində dərc edilən "Azərbaycanın efir məkanı: problemlər və vəzifələr" məqaləsi uzun müddətdir ki, bu mövzuda ictimaiyyətdə aparılan müzakirələrə yeni impuls və istiqamət verməklə yanaşı, həm də problemdən real çıxış yollarını göstərməsi baxımından olduqca əhəmiyyətli və dəyərlidir. Ölkə televiziyalarının fəaliyyətinin təhlilinə həsr olunan və yaranmış böhranın həlli variantlarını əks etdirən məqalədə biz müstəqil dövlətçilik konsepsiyasının əsas ideoloqlarından olan müəllifin konseptual yanaşmasını görməklə bahəm, həm də çox zövqlü bir teleizləyicinin uzun müddətli müşahidəsinin yekun qənaəti ilə tanış oluruq. Bu məqalə eyni zamanda, mövzuya münasibətdə vətəndaş mövqeyinin, vətəndaş yanğısının, vətəndaş təəssübünün örnək nümunəsi olaraq, ictimaiyyəti problemin laqeyd və susqun seyrçiliyinə son qoyaraq, fəal fikir müzakirəsinə səsləyir.

Akademik Ramiz Mehdiyevin hər bir məqaləsi ölkənin ictimai həyatında yenilik yaradır, siyasət meydanında geniş diskussiyalar predmetinə çevrilir, elmdə və ideoloji proseslərdə innovativ tədqiqatlara təkan verir. Lakin son məqalənin əsas xüsusiyyəti odur ki, burada toxunulan mövzu ölkənin siyasi və elmi elitası ilə yanaşı, "7-dən 77-yə" yaş kateqoriyasına mənsub bütün vətəndaşların - müəllimdən fəhləyə, mühəndisdən aqronoma, akademikdən "obıvatelə" ... qədər uzanan sosial qruplar silsiləsinin hər birinin fikirlərini daha dolğun və bitkin formada əks etdirir, onların bəzi teleproqramlardan narazılıqlarını bütünlüklə milli teleməkanın fəsadları kontekstində ümumiləşdirir, ən nəhayət, konkret ünvanlar, konkret teleproqramlar, konkret problemlər rakursunda mövzunu təhlil süzgəcindən keçirərək düzgün vəzifələr müəyyənləşdirir. Qeyd etdiyimiz məqamlar belə nəticəyə gəlməyə imkan verir ki, "Azərbaycanın efir məkanı: problemlər və vəzifələr" məqaləsi məhz xalqın sosial sifarişinin təcəssümüdür, həmçinin dövlətin bu sahədəki "bespredeli" aradan qaldırmaq üçün teleşirkət rəhbərlərinə fəaliyyətlərində dönüş yaratmaqla bağlı son çağırışıdır. 2001-ci ilin avqust ayında ulu öndər Heydər Əliyevin milli-mənəvi dəyərlərin qorunması barədə məlum müraciətinin tezislərini və Prezident İlham Əliyevin bu mövzu ilə bağlı dəfələrlə bəyan etdiyi mülahizələri tam müfəssəlliyi ilə əks etdirən məqalədə Prezident Administrasiyasının rəhbərinin problemə qətiyyətli və prinsipial yanaşması ictimaiyyət nümayəndələrini bu məsələdə fəal diskussiyalara səsləyir.

Maddi maraq tamaşaçı istəyini üstələyəndə

Azərbaycan teletamaşaçısının "biz maraqlı, məzmunlu, ailəliklə oturub baxa biləcəyimiz verilişlər istəyirik" arzusunu akademik Ramiz Mehdiyev məqaləsində konkretləşdirərək belə ifadə edir: "Televiziya kanallarının konsepsiyası, strateji hədəfləri, efir siyasəti ictimai maraqlarla uzlaşdırılmalı, cəmiyyətimizin saflaşması, milli-mənəvi dəyərlərimizin qorunub saxlanması, Azərbaycan dövlətçiliyinin möhkəmlənməsinə töhfə verməlidir... Bu gün Azərbaycan tamaşaçısı radio və televiziyalarından ölkəmizdə və dünyada baş verən taleyüklü hadisə və proseslər haqqında obyektiv, hərtərəfli informasiya çatdırılmasını, onların yüksək peşəkarlıqla şərh edilməsini, maarifləndirmə xarakterli keyfiyyətli verilişlər gözləyir". Bu prinsiplər əslində, hər bir teleşirkətin fəaliyyətə başlamadan öncə müəyyənləşdirdiyi prioritetlər olmalıdır. Yəqin ki, bu məqamlar müvafiq strukturlardan işə başlamaq üçün lisenziya alarkən elan edilən məramnamədə əksini tapıb. Lakin real fəaliyyətə gələrkən prinsiplər elə kağız üzərində də qalmaqda davam edib.

Teleməkanın nöqsan və çatışmazlıqları o qədər çoxdur ki, onları təhlil etməyi demirik, sadəcə, elə sadalamaq xeyli zaman alar. Amma əvvəlcədən onu xatırlatmaq zəruridir ki, təsnifatına görə üç qrupa bölünən teleşirkətlərdən - səhmləri dövlətə məxsus olan, ictimai yayımla məşğul olan və özəl kanallardan ilk ikisi fəaliyyətlərində məlum təməl prinsipləri rəhbər tutur, tamaşaçı qınağına məruz qalmır, keyfiyyətli (tam olmasa da) verilişlər hazırlayırlar. Elə sonuncu qrup - özəl teleşirkətlər də ölkədə teleməkanın keyfiyyətcə inkişafına ilk dövrlərdə müəyyən töhfələr veriblər. Lakin zaman keçdikcə, vəziyyət dəyişib və akademik Ramiz Mehdiyevin qeyd etdiyi kimi, indi "...özəl teleradio qurumları bir qayda olaraq biznes fəaliyyəti göstərir və daha çox gəlir əldə etmək məqsədi güdürlər. Halbuki özəl medianın əsas məqsədi reytinqini yüksəltmək, sağlam rəqabət mühitində lider mövqe əldə etmək və fəaliyyətini davam etdirmək üçün maliyyə imkanlarını da gücləndirməkdir".

Bu gün özəl teleşirkətlərin efirləri səviyyəsiz şoular, ucuz əyləncə verilişləri, şit maqazin proqramları ilə doldurulub. Günün hansı saatında bu kanallara baxırsan bax, fərqi yoxdur, hər zaman eyni simalar - mahnısından çox qalmaqalları ilə məşhur olan müğənnilər, sponsor sayəsində "sənətkara" çevrilənlər, şou-biznesi əxlaqsızlıq və bayağılıq kimi qəbul edənlər... ya verilişlərin qonaqlarıdırlar, ya da ki, özləri proqram aparıcısıdırlar. Şübhəsiz, sənətdən bixəbər və istedaddan uzaq olan bu tipli şəxslərin efirlərə qonaq, yaxud da aparıcı kimi çıxmaları onların həmin kanallara ödədikləri pul vəsaitləri, yaxud da cəlb etdikləri reklamlar vasitəsilə mümkün olur. Amma maarifçilik və milli-mənəvi dəyərləri qorumaq kimi vacib bir vəzifəni fəaliyyətində realizə etməyə borclu olan telekanalların əksinə, bazar münasibətlərini, "qaz vurub qazan doldurmaq" niyyətlərini fəaliyyət prioritetinə çevirmələri günümüzün acı reallığıdır! Hər yerindən duranı, arxalı-sponsorlu təsadüfi adamları efirə buraxmaq, verilişlərdə qalmaqal yaratmaqla reytinq yığmaq, nitq qabiliyyətindən və mənəvi keyfiyyətlərdən xali olan şəxsləri aparıcı statusuna yüksəltmək və digər bu kimi neqativ proseslər Azərbaycanın özəl teleyayım şirkətlərinin gündəlik fəaliyyət metodlarıdır! Axı, cənablar, bu dövlət sizə fəaliyyət üçün icazə lisenziyasını ona görə verməyib ki, telekanalları şəxsi mənafeləriniz üçün bir obyekt kimi işlədib, teleməkanı xaos vəziyyətinə, biabırçı duruma salasınız!

Məqaləsində akademik Ramiz Mehdiyev özəl teleşirkətlərin proqramlarını təhlil edərək vurğulayır ki, "göründüyü kimi, ATV kanalında şou-biznes verilişlərinin faizi daha çoxdur. Bu verilişlərin əksəriyyəti ictimai əhəmiyyət kəsb etməyən mövzulara həsr olunur, müəyyən mənada cəmiyyətdə neqativ tendensiyaların yayılmasına istiqamət verir, gənclərin və yeniyetmələrin zövqünü, dünyagörüşünü korlayır, təlim-tərbiyəsinə mənfi təsir edir. Əksər əyləncə verilişlərinin ixtisaslı kadrlar tərəfindən deyil, aparıcılıq edən müğənni və ya şou-biznes nümayəndələrinin iştirakı ilə təşkil olunması yaxşı hal kimi qəbul olunmur. Çox hallarda bu tipli aparıcıların davranışlarından gənclər özləri üçün nümunə götürməyə çətinlik çəkirlər". Əlavə şərhə nə hacət?

Həqiqətən də, hər bir aparıcı həmin telekanalın simasıdır. Görəsən, gənclər Aygün Kazımovadan və onun siması olduğu ATV-dən nə örnək götürə bilərlər? Bəlkə, efirdəki boşboğazlığı, qonaqların hər addımbaşı səviyyəsizcəsinə təhqir olunmasını, yüngüllüyü, yaxud da əxlaq naqisliyini özlərinə nümunə seçməlidirlər?! Azərbaycanda şou-biznesin ən səviyyəsiz, cılız yönümlərini və mənəviyyatsızlığı həyat tərzinə çevirən təmsilçilərini hər gün efirimizə və evimizə zorla yeridən ATV vaxtilə özünün belə tərbiyəsi, əxlaqı ilə bağlı ən sərt ifadələrlə ittiham etdiyi bu müğənnini indi həftədə 10 saat millətə "tərbiyəçi" kimi sırıyır! Bəli, başa düşürük ki, tamaşaçıların zövqləri müxtəlifdir və bu xanımın da öz auditoriyası var. Lakin bu məntiqlə yanaşsaq, unutmayaq ki, pornoqrafik filmlərin, intim mövzuda verilişlərin də kifayət qədər böyük izləyici təbəqəsi var. İndi onların rəyinə əsaslanıb, efiri hər gün erotik mövzularamı həsr etmək lazımdır?! Bəs harada qaldı teleyayımın maddi və mənəvi dəyərlər sisteminə, milli adət-ənənələrin qorunub saxlanmasına, ictimai şüurun yüksəlməsinə xidmət etməli olan fəaliyyəti? ATV görəsən, 10-15 faizlik auditoriyasını qalan 85-90 faizin səviyyəsinə qaldırmaq əvəzinə, niyə özü ilə bərabər teleauditoriyanın mütləq əksəriyyətinin efirə həsr etdiyi zamanı da çirkaba, girdaba yuvarladır?!

SOYumuza qənim kəsilənlər

Bütün proqramlarını demək olar ki, xarici telekanalların format və məzmununun təkrarı üzərində quran ATV bəs, həmin kanallardan bu verilişin hazırlanma səviyyəsini, aparıcının qabiliyyətini niyə əxz edə bilmir? Qadın qarderobunda üç-dörd il alt paltarı axtarışına çıxan "Yağ kimi" bu gün mətbəxlərdəki məişət üfunətini can-dildən gün ərzində efirdə yayır, bu azmış kimi, axşam bir daha təkrar yayımlayır! Səhər kanalında aparıcılıq edən 20 yaşlı qız gəlin-qayınana münasibətləri ilə bağlı "ekspert" rəyi verir, yoldaşından şikayət edən ailəli xanıma ərindən ayrılmağı tövsiyə edir, "müasir kişilərin öz kişiliklərini itirməsindən" gileylənir.

Milli köklərimizə, SOYumuza qənim kəsilən verilişləri ilə ATV kanalı səviyyəli tamaşaçıda ikrah doğurur, qəzəb yaradır! Qeybəti, mənəvi cılızlığı "Çal-çağır şou" ilə efirə çıxarıb, düşüklüyü tirajlamaq azmış kimi, artıq neçə illərdir ki, evimizə "El içində" ilə ucuz dedi-qodu da "qonaq" gəlir. Ümumilikdə, kolbasa istehsalını tənqid edib, istisna kimi yalnız bir sexi təqdir eləyib, iki aydan sonra onun reklam çarxına çəkilmək, yaxud da sponsor olan tibb mərkəzi ilə bağlı el içində (!) olan kütləvi narazılıqları ört-basdır etmək üçün digər tibb müəssisələri haqqında "tənqidi" veriliş aparmaqla işimiz yox, bu, proqram və kanal rəhbərlərinə dəxli olan məsələdir! Fəqət, "xoruz döyüşdürməsini" xatırladan "El içində"nin aparıcısının tədqiqatçısı olduğu sənətşünaslıq elmi prizmasından görəsən, bu verilişə necə rəy vermək olar? Mövzu bir kənarda qalır, iştirakçılar aparıcı tərəfindən biri-birləri ilə məcburi qalmaqala sövq edilir, bərkdən qışqırana meydan verilir, abırından utanan isə məzəmmət edilir ki, niyə sən də buna cavab vermirsən, bunu söymürsən, axı, söymək sənin haqqındır (?). Yalançıların qışqırtısı ilə doğruların bağrının yarıldığı bu verilişdə müəllif-aparıcı özündən meyarlar müəyyənləşdirir, arbitr kimi çıxış edir, prokuror kimi ittiham irəli sürür, hakim kimi hökm verir... "Həqiqət axtarışına" çıxan verilişin hər bölümündə həqiqət axtalanır, ədalət prinsipi pozulur! Titullu və titulsuz boşboğazlar tamaşaçıya "görkəmli ictimai xadim, ziyalı" kimi təqdim olunur! (Bu hal ATV-nin digər verilişlərinə də xasdır)... Sonda isə hər münaqişə nəticəsiz bitir...

SMS-lərlə qazanılan milyonlardan bir hissə görəsən, hansısa maarifçi verilişin hazırlanmasına yönəlsə, ATV çoxmu kasıblayar? Biz heç kəsin cibindəki pullarını saymaq niyyətində deyilik. Amma görəsən, həqiqətən "Yeni ulduz", "Xalq ulduzu", "Nömrə bir", "Meyxana" yarışması... gecə saatlarında əhalini tapmaca variantlı fırıldaqla soyan proqramlardan, bütün gün ərzində ekranın aşağı hissəsində yayımlanan mesajlardan toplanan "çox cüzi qəpik-quruşun" bir qismi ilə SMS-lərin deyil, professional münsiflər heyətinin seçdiyi bir vokal yarışma proqramı yaratmaq, intellektual veriliş açmaq mümkünsüzdürmü? Yuxarıda sadaladığımız və onlara əlavə olan "Performans", "ATV-Maqazin", "106 house", eləcə də digər bu kimi verilişləri ATV özünün siması kimi müəyyənləşdirib! Biz bu simanı qəbul etmirik! Biz ATV-yə səviyyəli proqramlar, keyfiyyətli verilişlər hazırlamağı arzulayırıq! Ölkə teleməkanının ictimai-siyasi-xəbər proqramları arasında lider mövqedə olan "Son xəbər", "Həftə" verilişlərində nümayiş etdirilən qabiliyyət və bacarıq, peşəkarlıq və dinamizm ATV-nin bütün yayımına örnək ola bilər.

Geriyə doğru irəli?!

Bütün bu deyilənlər həm də özəl telekanallarda balanslaşdırılmış efir siyasətinin və efir proqramının olmadığına dəlalət edir. Hansı veriliş yaxşı pul qazandırır, hansı verilişlə yaxşı bazar tutmaq olar - bu prinsiplər teleefirin əsas vaxtında, "praym-taym"da proqramın yayımlanması üçün başlıca meyara çevrilib! Ancaq peşəkar tələblər tamam fərqlidir. Akademik Ramiz Mehdiyev məqaləsində qeyd edir ki, balanslaşdırılmış proqram siyasəti, həmçinin yüksək efir mədəniyyəti, ictimai maraqlara xidmət, maarifləndirmə, operativ, obyektiv, hərtərəfli məlumatlandırma teleradio yayımı həyata keçirən qurumun müvəffəqiyyətinin əsas şərtləridir.

Bu amillərin teleyayımda nə dərəcədə ödənməsi hamıya məlumdur. Bu gün Mirzə Cəlil yaşasaydı, şübhəsiz ki, "Molla Nəsrəddin"in bir neçə sayı XXI əsrin tamaşaçılarını "ekstra hisslərlə" cəhalətə, geriyə sürükləyən "Lider"ə həsr olunardı. Ana adını bilməklə və bir kağız parçası üzərində cızma-qara etməklə 20 saniyəyə insanların gələcək talelərini müəyyənləşdirmək absurduna "Lider"in mənsublarının inanıb-inanmadığını bilmirik, amma bu səfsəfəyə xalqı inandırmaq üçün bütün dünyada yayımlanan bir kanal xüsusi səy göstərməklə, özünü "Molla Nəsrəddin"in cəhalət tör-töküntüləri ilə bir sıraya qoyur! Bayağılıq, cılız məişət yönümü, qeyri-peşəkarlıq bu kanalın əyləncəli verilişlər konsepsiyasının qayəsini təşkil edir. Yeni telemövsümə təmtəraqla başladıqlarını elan etsələr də, əslində, özünü doğrultmayan köhnə verilişlər fərqli dekorasiyalarla tamaşaçıya sırınır!

"Xəzər" öz "Mix şou"sunda bir neçə yeniyetmənin tərbiyəsiz və əxlaqsız tərzdə səhnəciyini göstərməklə nə eyib etdiyinin fərqindədirmi? "Ay Zaur"dan danışmağa dəyməz! Rəzalətin telemənzərəsi olan bu proqramdan qazanılan gəlir görəsən, "Xəzər"in rəhbərliyi üçün itirdiyi tamaşaçılardan daha önəmlidir? Bu kanalın başbilənləri "Eldən-elə", "Ulduzlu xəzər" verilişlərinə əvvəldən sonadək baxmağa görəsən, özlərini məcbur edə bilərlərmi? İnanmağımız gəlmir! "Space" kanalında bu sahədə kütləvi qarma-qarışıqlıq olmasa da, "Bazar" proqramını və onun əlavəsini, maqazin ruhlu digər verilişlərini reklam tarifləri əsasında deyil, tamaşaçı istəyi üzərində qursalar, daha məqsədəuyğun olar.

Hər bir verilişə maraq yaradan, onun keyfiyyətini göstərən əsas amil aparıcının qabiliyyəti və bacarığıdır. Akademik Ramiz Mehdiyevin bu məsələyə baxışı demək olar ki, bütün tamaşaçıların ürək sözlərini ifadə edir: "Televiziya kanallarında aparıcı problemi kəskindir. Bir çox hallarda aparıcıların peşəkarlıq səviyyəsi, nitqi standartlara uyğun gəlmir. Bəzi proqramların, əsasən də, əyləncə xarakterli verilişlərin aparıcıları jurnalistikadan uzaq, efir mədəniyyəti, peşəkarlığı aşağı olan şəxslərdir. Bir sıra "aparıcıların" telejurnalistika sahəsində təcrübəsizliyi, qeyri-peşəkarlığı haqlı olaraq cəmiyyətdə narazılıq doğuran məsələlərdir". Çox aydın irad, haqlı məzəmmət, ən əsası isə nəticə çıxarmaq üçün verilən ünvandır! Teleşirkətlər fəaliyyətində dönüş yaratmaq üçün verilişlərin keyfiyyətini artırmaqla bahəm, aparıcılarının səviyyəsi, peşəkarlığı üzərində də ciddi düşünməlidir.

Bu sahədəki çatışmazlıq ANS kanalı üçün xüsusilə səciyyəvidir. Özəl teleyayımın "qaranquşlarından" olan ANS kanalında bu gün bayquş ulartısını xatırladan sədaları eşitmək vaxtilə "lider kanal" kimi onu böyük maraqla izləyən biz tamaşaçılar üçün həqiqətən, böyük itkidir. Uzun müddət özünü səviyyəsiz şou-proqramlardan qoruyan ANS-in də artıq iki-üç mövsümdür ki, müqaviməti qırılıb. Tamaşaçısına səhərlər "Günəbaxan"la qeybət, süni qalmaqallar "yedirdən", axşamlar isə müxtəlif yeni proqramlarla səviyyəsiz mükalimələr, mənəviyyata sığmayan fikirlər, avantüralar təqdim edən ANS-in "Qırmızı"lığı da ayrı aləmdir! Həftənin ən mühüm mədəniyyət xəbəri kimi müzakirə olunan mövzu orta səviyyəli xanım müğənninin qızının nişan üzüyünün qaytarılması idi! Görəsən, ANS mənsubları həqiqətənmi inanırlar ki, iki gəncin münasibətlərindəki anlaşılmazlığın milli mədəniyyətimizə təsiri ola bilər?! Azərbaycan mədəniyyətini bu həddə qədər cılızlaşdırmaqla kanal hansı məqsədi gerçəkləşdirir? Vaxtilə Azərbaycanın özəl teleməkanının "vizit kartına" çevrilərək, Mirşahin, Xəyal Tağıyev kimi simaları ilə öyünən bu kanal indi Elgizin, Turanın, Turalın... simasındadır, onların günündədir!

Məsuliyyəti kimlər daşıyır?

Bəs yaranmış bu acınacaqlı duruma görə kimlər məsuliyyət daşıyır? Haqlı sualın dəqiq cavabı şübhəsiz ki, Azərbaycan Respublikası Prezidentinin Administrasiyasının rəhbəri akademik Ramiz Mehdiyevdədir: "Azərbaycan televiziya və radio kanallarının monitorinqi göstərir ki, maarifləndirici, məlumatlandırıcı və əyləncə funksiyaları arasında ciddi disbalans yaranmış, peşəkarlıq, yaradıcılıq, yeniliklərin tətbiqi, milli-mənəvi dəyərlərin qorunması kimi məsələlər teleradio rəhbərlərini o qədər də maraqlandırmır... Bu sahələrdə müşahidə olunan çatışmazlıqlara görə məsuliyyət teleradio qurumlarının rəhbərlərinin üzərinə düşür".

Məsuliyyətin konkret ünvanı dəqiq göstərilib! Elektron KİV fəaliyyətlərindəki böhranı, nöqsan və çatışmazlıqları aradan qaldırmaq üçün əməli tədbirlər həyata keçirməlidirlər. Bu qurumların rəhbərləri indiyə qədər ancaq telekanalların maddi maraqlarının ödənməsini fəaliyyətlərində əsas istinadgah kimi seçmişdilərsə, bundan sonra müvafiq teleqanunvericiliyin tələblərinə uyğun iş qurmağa, ən əsası isə, Azərbaycan tamaşaçısı qarşısında daşıdıqları mənəvi öhdəlikləri ödəməyə məhkumdurlar! Artıq Azərbaycan telekanallarını küçə ticarəti mərkəzi kimi fəaliyyətdən xilas edib, əsl maarifçilik missiyasına yönəltməyin vaxtı çatıb!

İxtiyar HÜSEYNLİ

Azərbaycan.- 2009.- 3 oktyabr.- S. 5.