Azərbaycanın müdafiə sənayesi naziri Çexiyanın müdafiə naziri ilə görüşmüşdür

Müdafiə Sənayesi Nazirliyinin mətbuat xidmətindən bildirmişlər ki, oktyabrın 2-də nazir Yavər Camalov Azərbaycanda səfərdə olan Çexiya Baş nazirinin müavini, müdafiə naziri Martin Bartakın başçılıq etdiyi nümayəndə heyəti ilə görüşmüşdür.

Nazir Yavər Camalov nümayəndə heyətinə nazirliyin fəaliyyəti barədə ətraflı məlumat vermiş, ölkələrimiz arasında müxtəlif sahələrdə tərəfdaşlıq münasibətlərini yüksək qiymətləndirdiyini vurğulamışdır.

Ölkələrimiz arasındakı əməkdaşlığın son zamanlar xeyli inkişaf etdiyini müsbət hal kimi dəyərləndirən Çexiyanın müdafiə naziri Martin Bartak yaxın gələcəkdə müdafiə sənayesi sahəsində də ikitərəfli əlaqələrin yaranacağına ümidvar olduğunu bildirmişdir.

Sonra tərəfləri maraqlandıran məsələlərə dair geniş fikir mübadiləsi aparılmışdır.

Görüşdə Azərbaycanın Çexiyadakı səfiri Tahir Tağızadə və Çexiyanın ölkəmizdəki səfiri Radek Matula iştirak etmişlər.

AzərTAc

Azərbaycan.- 2009.- 3 oktyabr.- S. 5.