Nazirlər Kabinetində görüş

Oktyabrın 6-da Azərbaycanın Baş naziri Artur Rasizadə ölkəmizdə səfərdə olan Pakistan İslam Respublikasının Silahlı Qüvvələrinin Birləşmiş Qərargahlar Komitəsinin sədri general Tariq Məcidin başçılıq etdiyi nümayəndə heyəti ilə görüşmüşdür.

Azərbaycan hökumətinin başçısı dost və qardaş Pakistanla əlaqələrin son illərdə fəal inkişaf etdiyini vurğulayaraq bu ölkənin rəhbərliyinə Ermənistan-Azərbaycan, Dağlıq Qarabağ münaqişəsi ilə əlaqədar Azərbaycanın mövqeyini beynəlxalq səviyyədə dəstəklədiyinə görə təşəkkürünü bildirmişdir.

Baş nazir iqtisadi əlaqələrin genişləndirilməsinin zəruri olmasını qeyd edərək əmin olduğunu bildirmişdir ki, Pakistan nümayəndə heyətinin Bakıda, Müdafiə Nazirliyində və Müdafiə Sənayesi Nazirliyində apardığı danışıqlar hərbi quruculuq sahəsində əməkdaşlığın inkişafına stimul yaradacaqdır.

General Tariq Məcid Pakistanın Baş nazirinin salamlarını və qardaş Azərbaycan xalqına firavanlıq arzularını Artur Rasizadəyə çatdırmışdır. Pakistan nümayəndə heyətinin rəhbəri ölkəsinin Azərbaycan ilə əlaqələri dərinləşdirməkdə maraqlı olmasını qeyd etmişdir.

AzərTAc

Azərbaycan.- 2009.- 7 oktyabr.- S. 2.