Azərbaycan Xarici İşlər Nazirliyində İran səfirinə rəsmi nota verilmişdir

Oktyabrın 6-da İran İslam Respublikasının Azərbaycan Respublikasındakı səfiri Məmmədbaqir Bəhrami Xarici İşlər Nazirliyinə dəvət olunaraq nazir müavini Vaqif Sadıqov ilə görüşmüşdür.

Xarici İşlər Nazirliyinin mətbuat xidmətindən bildirmişlər ki, görüşdə səfir M.Bəhramiyə bildirilmişdir ki, İran İslam Respublikasının rəsmi qurumu olan Radio və Televiziya Təşkilatının və bu təşkilata məxsus "Səhər" televiziya kanalının müvafiq internet saytlarında 2009-cu il oktyabrın 4-də Azərbaycan Respublikasının daxili və xarici siyasəti ilə bağlı videoçarx və məqalə yerləşdirilmişdir. İran diplomatının nəzərinə çatdırılmışdır ki, bu materiallarda Azərbaycan Respublikasının dövlət siyasəti məqsədyönlü şəkildə təhrif olunmuş, milli dövlət bayrağı kobudcasına təhqir edilmiş, həmçinin Azərbaycan Respublikası hökumətinin və Milli Məclisinin üzvlərinə və digər dövlət məmurlarına qarşı böhtan xarakterli ittihamlar yer almışdır.

Nazir müavini V.Sadıqov belə qərəzli materialların İranın rəsmi kütləvi informasiya vasitələrində yayımlanmasının Azərbaycan tərəfində ciddi narahatlığa səbəb olduğunu vurğulayaraq eyni xarakterli materialların İranın rəsmi mətbu orqanlarında əvvəllər də yer aldığını və bununla bağlı Azərbaycan tərəfinin dəfələrlə narahatlığını bildirdiyini demişdir. Son zamanlar isə Azərbaycan Respublikasına qarşı qərəzli veriliş və yazılarda təhqir və böhtanların sayının artaraq öz həddini aşması səfirin diqqətinə çatdırılmışdır.

Qeyd olunan məsələlərin iki ölkə arasındakı münasibətlərə ciddi xələl gətirə biləcəyini vurğulayan V.Sadıqov İranın rəsmi qurumlarının yolverilməz hərəkətlərinə Azərbaycan tərəfinin qəti etirazını bildirmiş, bu hərəkətlərin səbəblərinin araşdırılmasına və nəticələri barədə Azərbaycan tərəfinin məlumatlandırılmasına, eləcə də belə halların qarşısının alınması və təkrar olunmaması istiqamətində İranın müvafiq addımlar atacağına israrla təkid etmişdir.

Sonra səfir Məmmədbaqir Bəhramiyə Azərbaycan Xarici İşlər Nazirliyinin eyni mövzulu rəsmi notası verilmişdir.

Səfir görüş və müvafiq nota barədə İran tərəfini məlumatlandıracağını demişdir.

AzərTAc

Azərbaycan.- 2009.- 7 oktyabr.- S. 2.