Tovuz rayonunun sosial-iqtisadi inkişafının sürətləndirilməsinə dair əlavə tədbirlər haqqında

Son illər Tovuz rayonunun sosial-iqtisadi inkişafı, yol və digər infrastruktur layihələrinin həyata keçirilməsi sahəsində bir sıra mühüm işlər görülmüşdür. Bu istiqamətdə görülən tədbirlərin daha da sürətləndirilməsi, bütövlükdə 21 min nəfər əhalinin yaşadığı 43 yaşayış məntəqəsini, o cümlədən Ermənistan Respublikası ilə sərhəddə yerləşən 19 dağ kəndini rayon mərkəzi ilə birləşdirən, xüsusi strateji əhəmiyyətə malik olan Tovuz-Böyük Qışlaq-Qaralar avtomobil yolunun yenidənqurulması məqsədilə qərara alıram:

1. Azərbaycan Respublikasının 2009-cu il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan Tovuz-Böyük Qışlaq-Qaralar avtomobil yolunun yenidənqurulması məqsədilə Tovuz Rayon İcra Hakimiyyətinə ilkin olaraq 5 milyon (beş milyon) manat məbləğində vəsait ayrılsın.

2. Azərbaycan Respublikasının Maliyyə Nazirliyi bu sərəncamın 1-ci bəndində nəzərdə tutulmuş vəsaitin maliyyələşdirilməsini müəyyən olunmuş qaydada həyata keçirsin.

3. Azərbaycan Respublikasının Nazirlər Kabineti bu sərəncamdan irəli gələn məsələləri həll etsin.

İlham ƏLİYEV,

Azərbaycan Respublikasının Prezidenti

Bakı şəhəri, 7 oktyabr 2009-cu il

Azərbaycan.- 2009.- 8 oktyabr.- S.1.