İstanbulda fəaliyyət göstərən "Azəri mədəniyyət evi"nin üzvləri Azərbaycandan xoş təəssüratla ayrılırlar

Oktyabrın 6-da Azərbaycanlıların və digər Türkdilli Xalqların Əməkdaşlıq Mərkəzində (ATXƏM) Azərbaycana səfərə gəlmiş İstanbulda fəaliyyət göstərən "Azəri mədəniyyət evi"nin üzvlərinin mətbuat konfransı keçirilmişdir.

Qonaqlar əvvəlcə Fəxri xiyabana gələrək xalqımızın ümummilli lideri, müasir müstəqil Azərbaycan dövlətinin memarı Heydər Əliyevin xatirəsinə ehtiramlarını bildirmiş, məzarı önünə gül dəstələri qoymuşlar.

Görkəmli oftalmoloq alim, akademik Zərifə xanım Əliyevanın da məzarı üzərinə güllər düzülmüşdür.

Şəhidlər xiyabanına gələn qonaqlar Azərbaycanın suverenliyi və ərazi bütövlüyü uğrunda canlarından keçmiş qəhrəmanların xatirəsini anmış, "Əbədi məşəl" kompleksinin önünə gül dəstəsi qoymuşlar.

Qonaqlar Azərbaycanın azadlığı uğrunda şəhid olmuş türk əsgərlərinin xatirəsinə ucaldılmış abidəni də ziyarət etmiş, önünə gül-çiçək düzmüşlər.

Mətbuat konfransında bildirilmişdir ki, ATXƏM-in dəvəti ilə reallaşan səfərin məqsədi Bakıda keçirilən Türkdilli Ölkələrin Parlament Assambleyasının (TÖPA) birinci plenar iclası və Naxçıvanda Türkdilli ölkələrin dövlət başçılarının IX zirvə görüşü zamanı türkdilli ictimai qurumlar ilə daha sıx əlaqələr qurmaq, müştərək diaspor fəaliyyətini genişləndirməkdən ibarətdir.

Prezident Administrasiyası İctimai-siyasi məsələlər şöbəsinin sektor müdiri Qafar Əliyev qonaqları salamlayaraq bildirmişdir ki, ulu öndər Heydər Əliyevin "bir millət, iki dövlət" fəlsəfəsinə uyğun olaraq hazırda Azərbaycan və Türkiyə ictimai qurumlarının birgə fəaliyyət göstərməsi olduqca vacib məsələdir: "Azərbaycanın haqq səsinin beynəlxalq aləmdə daha gur səslənməsində türkdilli xalqların, ən əsası isə Türkiyə diaspor təşkilatlarının üzərinə daha çox iş düşür. Ona görə də biz Azərbaycan və Türkiyə ictimai qurumlarının qarşılıqlı əlaqələrinin güclənməsində, iki qardaş ölkənin diaspor təşkilatlarının müştərək fəaliyyət göstərməsində maraqlıyıq".

ATXƏM-in sədri İlham İsmayılov qonaqları salamlayaraq onlara təşkilatın yaranması, fəaliyyəti və məqsədləri barədə geniş məlumat vermişdir.

"Azəri mədəniyyət evi"nin sədri Erol Göllü ATXƏM-lə yaxın tanışlıqdan məmnunluğunu ifadə etmiş və dərnəklə bağlı məlumat vermişdir: "İstanbulda 600 min, Türkiyə ərazisində isə 1,8 milyondan çox azəri əsilli türk yaşayır. İki ildən artıq bir vaxtda fəaliyyət göstərən dərnəyimiz azəri türklərinin musiqisini, mədəniyyətini, adət-ənənələrini bütün Türkiyəyə və dünyaya tanıtmaqdadır. Yarandığımız gündən ulu öndər Heydər Əliyevin "bir millət, iki dövlət" fəlsəfəsini rəhbər tutaraq bu iki qardaş dövlətin daha da yaxınlaşmasına çalışırıq. Dərnək yaradılandan bəri Azərbaycan dövlətinin hər zaman dəstəyini duymuş, arxamızda hər gün inkişaf edən və iqtisadi gücə sahib olan Azərbaycanı hiss etmişik".

Səfər çərçivəsində qonaqlar Quba, Salyan, Gəncə və Sumqayıtda olmuş, tarixi yerləri, o cümlədən Qubada ermənilər tərəfindən törədilmiş soyqırımdan nişanə olan məzarlığı, Gəncədə Cavadxanın məqbərəsini, Şah Abbas məscidini və dahi Azərbaycan şairi Nizami Gəncəvinin məqbərəsini ziyarət etmişlər. Azərbaycanın regionları ilə tanış olan qonaqlar öz təəssüratlarını bölüşərək bildirmişlər ki, günü-gündən inkişaf edən Azərbaycan artıq türk dünyasının birliyini möhkəmlədəcək böyük layihələrə imza atmaq iqtidarındadır.

Erol Göllü qeyd etmişdir ki, regionları gəzərkən onlar Azərbaycanın neft gəlirlərindən olduqca səmərəli istifadə edilməsinin, qeyri-neft sektorunun, eləcə də bölgələrin dinamik inkişafının şahidi olmuşlar.

Sonda jurnalistlərin sualları cavablandırılmışdır.

AzərTAc

Azərbaycan.- 2009.-7 oktyabr.- S. 6.