Azərbaycanın görkəmli şərqşünas alimi, professor Aida İmanquliyevanın 70 illik yubileyinə həsr edilmiş elmi konfrans başa çatmışdır

Bakı Dövlət Universitetində (BDU) Azərbaycanın görkəmli şərqşünas alimi, professor Aida İmanquliyevanın 70 illik yubileyinə həsr olunmuş "Şərqşünaslığın aktual problemləri" mövzusunda respublika elmi konfransı oktyabrın 7-də başa çatmışdır.

Bölmə iclaslarında davam edən konfransın ikinci günündə Azərbaycan alimlərinin "Müasir türk ədəbi dilində perifrastik fel formaları", "İslamın elmə və öyrənməyə verdiyi dəyər", "Azərbaycan şərqşünaslığında Aida İmanquliyevanın rolu", "Azərbaycan ərəbşünaslarının xilafət tarixinə dair tədqiqatları", "Professor Aida İmanquliyeva Azərbaycan şərqşünaslığının ulduzudur" və digər mövzularda məruzələri dinlənilmişdir.

Məruzələrdə vurğulanmışdır ki, Azərbaycan ərəbşünaslığının, ərəb ədəbiyyatının tədqiqi ilə bağlı öyrənilən mühüm sahələrdən biri də yeni dövr ərəb ədəbiyyatının araşdırılması məsələsi olmuşdur. Bu sahədə yazılmış dəyərli tədqiqat əsərləri arasında görkəmli ərəbşünas alim Aida İmanquliyevanın monoqrafiyaları, elmi-nəzəri məqalələri mühüm yer tutur. Professor Aida İmanquliyeva Azərbaycan şərqşünaslığını öz məqalələri, tədqiqat əsərləri ilə zənginləşdirmiş, ona elmi işıq və böyük töhfə vermişdir. Onun əsərləri həm ölkə daxilində, həm keçmiş SSRİ məkanında, həm də xaricdə çap olunan beynəlxalq jurnallarda nəşr edilmişdir.

Qeyd edək ki, iki gün davam edən konfrans çərçivəsində 100-dən çox maraqlı elmi məruzə dinlənilmişdir.

Azərbaycan.- 2009.- 8 oktyabr.- S. 2.