Zamanın lideri

Məlumdur ki, sürətli inkişafa yol açan idarəçilikdə əldə edilmiş müvəffəqiyyətlərin davam etdirilməsi, eyni zamanda yeni nailiyyətlərin qazanılmasına səbəb olan mühüm amillərdən biri kimi uğurlu siyasi varislik ənənələrinin qorunması çıxış edir. Bu mənada Azərbaycanda müstəqil dövlətçilik ənənələrini formalaşdıran ümummilli lider Heydər Əliyevin müəllifi olduğu inkişaf strategiyasının Prezident İlham Əliyev tərəfindən inamla davam etdirilməsi qısa müddətdə Azərbaycanı təkcə Cənubi Qafqazın yox, bəzi hallarda inkişaf tempinə görə, dünyanın liderinə çevirmiş, onun sabit və qüdrətli dövləti imicini daha da möhkəmləndirmişdir.

Milli dövlətçilik ənənələrinin layiqli davamçısı

Prezident İlham Əliyev ölkəyə rəhbərlik etdiyi müddətdə ulu öndərin banisi olduğu milli dövlətçilik ənənələrinə sadiq qalmaqla Azərbaycanın dövlət müstəqilliyini daha da gücləndirmiş, yeni mərhələdə onun daimiliyini, dönməzliyini təmin etmişdir. Elə buna görə də xalqımız alternativi olmayan inkişaf strategiyası nəticəsində qazanılmış nailiyyətlərin davam etdirilməsi, Azərbaycanın sabaha doğru inamla irəliləməsinin təmini üçün cənab İlham Əliyevə tam dəstək vermiş və bu, istər 2003-cü il, istərsə də 2008-ci ildə keçirilən prezident seçkilərində özünü əyani büruzə vermişdir.

O da faktdır ki, müdrik xalqımızın cənab İlham Əliyevi strateji islahatlar kursunun layiqli davamçısı qismində qəbul etməsi tam reallıqlara söykənir. Cənab İlham Əliyevin 1995-2003-cü illərdə fəaliyyət göstərdiyi sahələrdə nümayiş etdirdiyi vətənpərvər, praqmatik və yüksək idarəçilik keyfiyyətləri təbii olaraq onun xalqın mütləq çoxluğunun etimadını qazanmasına və beləliklə, şəksiz lider kimi qəbul edilməsinə səbəb olmuşdur. Göstərilən dövr ərzində onun fəaliyyəti təkcə ölkə daxilində sabit inkişaf kursuna töhfələr verməmiş, həm də Azərbaycanın beynəlxalq arenada mövqelərinin siyasi, iqtisadi və digər vacib sferalarda güclənməsində müstəsna rol oynamışdır. Məsələn, Azərbaycanın 2001-ci ildə Avropa Şurasına tamhüquqlu üzv qəbul edilməsindən sonra sözügedən qurumun Parlament Assambleyasında Azərbaycanı təmsil edən nümayəndə heyətinin rəhbəri cənab İlham Əliyevin təşəbbüskarlığı və diplomatik fəallığı nəticəsində elə ilk sessiyadan etibarən Ermənistan-Azərbaycan, Dağlıq Qarabağ münaqişəsinə dair həqiqətləri özündə əks etdirən sənədlər yayılmağa başladı. Məhz cənab İlham Əliyevin rəhbərliyi altında qurumda ölkəmizi təmsil edən deputatlar AŞ PA-nın müxtəlif dövlətlərdən olan üzvləri ilə yaxın münasibətlər qurur, ölkəmizin qarşılaşdığı problemlər, torpaqlarımızın 20 faizinin Ermənistan silahlı qüvvələri tərəfindən işğal olunması, bir milyondan çox insanın qaçqın və məcburi köçkün kimi yaşaması barəsində ətraflı məlumatlar verirdilər. Bunun nəticəsi olaraq Avropa Şurası Nazirlər Komitəsinin 108-ci sessiyasının rəsmi məlumatında Ermənistanın təcavüzkar siyasəti pislənildi və burada aydın şəkildə qeyd olundu ki, Avropa Şurası ölkələrin ərazi bütövlüyü, suverenliyi, sərhədlərinin toxunulmazlığını dəstəkləyir.

2001-ci ilin aprelində AŞ PA-nın yaz sessiyasında daha çox diqqət cəlb edən məqam Azərbaycan nümayəndə heyətinin rəhbəri cənab İlham Əliyevin çıxışı oldu. Avropada mütəşəkkil cinayətkarlığın mərkəzlərindən birinin Azərbaycanın işğal edilmiş ərazilərində olduğunu diqqətə çatdıran cənab İlham Əliyev bildirirdi: "Azərbaycan ərazisinin 20 faizinin Ermənistan silahlı qüvvələri tərəfindən işğal olunması ilə nəinki bir milyon azərbaycanlı qaçqın evsiz-eşiksiz qalıb, çoxsaylı şəhərlərimiz, kəndlərimiz, mədəniyyət abidələrimiz, əcdadlarımızın qəbirləri büsbütün dağıdılıb, bir sözlə, erməni işğalçılarının zəbt etdikləri ərazidə bütün infrastruktur məhv edilib, həm də ermənilərin işğal etdikləri ərazidə mütəşəkkil cinayətkarlığın inkişafı üçün çox əlverişli şərait yaranmışdır. "Dağlıq Qarabağ respublikası" deyilən ərazidən narkotik bitkilərin yetişdirilməsi və daşınması üçün istifadə edilir. Narkotiklərlə məşğul olan işbazlar və tiryək alverçiləri orada özlərini təhlükəsiz və çox rahat hiss edirlər".

Cənab İlham Əliyev Dağlıq Qarabağ münaqişəsinə ədalətli münasibət bildirilməsinin zəruriliyinə də xüsusi diqqət çəkirdi: "Nə vaxta kimi Avropa belə bir fakta göz yumacaq ki, Avropa Şurasının bir üzvü olan Ermənistan başqa bir üzvün - Azərbaycanın ərazilərinin 20 faizini işğal altında saxlayır?" Məhz belə qətiyyətli mövqedən sonra AŞ PA-da Dağlıq Qarabağ münaqişəsinə münasibətdə daha ciddi dönüş yarandı. 2003-cü ilin yanvarında Azərbaycan nümayəndə heyətinin rəhbəri cənab İlham Əliyevin AŞ PA-nın sədr müavini və büro üzvü vəzifələrinə seçilməsilə ölkəmizin bu qurumla əlaqələri bir qədər də yüksək səviyyəyə çatdı. Bundan sonra Azərbaycanın qurumda yeni bir uğuru 2003-cü ilin yay sessiyasında qeydə alındı. Həmin sessiyada "Avropada muxtar vilayətlərin müsbət təcrübəsi" məsələsi ətrafında müzakirələr aparılırdı. Burada məhz cənab İlham Əliyevin təklifi ilə muxtar vilayətlərin ərazi bütövlüyünü pozmaq səlahiyyətlərinə malik olmadığı barədə müddəa sənədə əlavə edildi. Yenə də ermənilərin ciddi müqavimətinə baxmayaraq, cənab İlham Əliyevin qətiyyətli mövqeyi onların geri çəkilməsinə səbəb oldu. Beləliklə, sözügedən sənədə "muxtariyyət verilməsi dövlətin özünün suverenliyinə və ərazi bütövlüyünə əsaslanmalıdır" cümləsi əlavə edildi. Bu, faktiki olaraq, Dağlıq Qarabağdakı separatçı rejimin müstəqillik tələblərinin qarşısına sədd çəkən çox mühüm bir addım idi. Sənədin Azərbaycanın istədiyi şəkildə qəbul edilməsi həm də muxtariyyətin ərazi bütövlüyü prinsipindən sonra gəldiyini göstərirdi. Ermənilərin buna qarşı çıxması isə heç bir nəticə vermədi və Azərbaycan qurumda növbəti uğurunu qazanmış oldu.

Azərbaycanın iqtisadi yüksəlişinin əsası olan uğurlu neft strategiyasının həyata keçirilməsi və "Əsrin müqaviləsi" kimi möhtəşəm bir layihənin imzalanmasında da Azərbaycan Dövlət Neft Şirkətinin vitse-prezidenti kimi cənab İlham Əliyevin xüsusi rolu olmuşdur. Belə ki, xarici neft şirkətlərinin Azərbaycana cəlb edilməsi üçün beynəlxalq səviyyədə danışıqlar aparmaq bacarığında olan, neft sahəsində ölkəmizlə əməkdaşlığın perspektivinə xarici şirkətləri inandıra bilən, eyni zamanda ölkənin mənafelərini daim ön planda tutmağı bacaran bir professional şəxs kimi cənab İlham Əliyev kifayət qədər böyük uğurlara imza atıb. Məhz cənab İlham Əliyev danışıqlar prosesində fəal iştirak etməklə yanaşı, yeni neft strategiyasının hazırlanmasının, uğurla həyata keçirilməsinin ən aparıcı iştirakçılarından oldu və beləliklə də, xarici şirkətlərlə uzun sürən danışıqların müvəffəqiyyətlə yekunlaşmasında misilsiz xidmətlər göstərdi. Türkiyədə, ABŞ-da neft müqaviləsinin imzalanmasına dair aparılan danışıqlarda cənab İlham Əliyev yüksək səviyyədə öz diplomatik bacarığını nümayiş etdirdi, özünə, ümumilikdə Azərbaycana qarşı böyük inam və etimad formalaşdırmağa nail oldu.

Cənab İlham Əliyev Milli Məclisin deputatı, həmçinin Yeni Azərbaycan Partiyasının sədr müavini kimi yürütdüyü uğurlu fəaliyyəti ilə də özünün ölkənin ən layiqli siyasətçilərindən biri olduğunu təsdiqlədi və ictimai nüfuzunu artırdı.

Uğurlara doğru gedən yol

Həm daxildə, həm də beynəlxalq aləmdə qazanılan bu və digər uğurlar 2003-cü ildə xalqın maraq və mənafeyini öz siyasətində ehtiva edən, rasional siyasət, cəlbedici proqram və ideyalarla tanınan cənab İlham Əliyevin dövlət başçısı seçilməsilə nəticələndi. Bu seçim bir daha təsdiqlədi ki, Azərbaycan xalqı ulu öndər Heydər Əliyevin müəyyən etdiyi inkişaf yolunu bütün sahələrdə öz təhlükəsizliyinin, iqtisadi maraqlarının və siyasi sistemin sabitliyinin təminatına yönələn və alternativi olmayan konsepsiya kimi qəbul edir. Hadisələrin sonrakı gedişi bir daha Azərbaycan xalqının qibtəediləcək dərəcədə doğru seçim etdiyini göstərdi.

2003-cü ilin 31 oktyabrında Vətənə və xalqa sədaqət andı içərək səlahiyyətlərinin icrasına başlayan Prezident İlham Əliyev Azərbaycanın növbəti iqtisadi, siyasi inkişaf istiqamətlərini ən xırda detallarına qədər dəqiq müəyyənləşdirməklə davamlı tərəqqini təmin etmiş, ilk növbədə sosialyönümlü inkişaf strategiyasının daha böyük sürətlə həyata keçirilməsinə nail olmuşdur. Ötən altı ildə yaşananlar da bunun ən bariz təsdiqi hesab oluna bilər. Tarix üçün elə də böyük olmayan bu zaman kəsiyində ölkənin bütün problemlərinə milli dövlətçilik və milli maraqlar kontekstindən yanaşan, cəmiyyətin ümumi inkişaf qanunauyğunluqlarını dəqiq şəkildə qiymətləndirməyi bacaran Prezident İlham Əliyev məhz bu keyfiyyətləri sayəsində qarşıda duran prioritetlərin uğurlu həllinə nail ola bilmişdir.

Məhz qeyd olunanların nəticəsidir ki, Prezident İlham Əliyevin son 6 illik fəaliyyətinin üstün cəhətlərindən biri də onun milli maraqlar naminə cəsarətli və prinsipial addımlar atması, ölkənin taleyüklü problemlərinə həssaslıqla yanaşması, reallığı operativ və obyektiv şəkildə dəyərdəndirən praqmatik siyasi lider olması, ən optimal, düzgün qərar qəbul etməsidir. İstər daxili, istərsə də xarici siyasətdə son altı ildə Prezident İlham Əliyev ümummili liderin siyasi kursunu davam etdirməklə yanaşı, onu özünəməxsus novatorluqla, dinamizmlə inkişaf etdirmiş və daha da zənginləşdirmişdir. Daxili siyasətdə bu, ilk növbədə, aşağıdakı vəzifələrin irəli sürülməsi və onların həlli yollarının tapılmasında özünü göstərmişdir:

Birincisi, Azərbaycanda bir dənə olsun belə çadır şəhərciyinin qalmaması. Hələ 2003-cü ildə prezident seçildikdən sonra cənab İlham Əliyev bildirmişdi ki, 5 il ərzində Azərbaycanda bir dənə də çadır şəhərciyi qalmayacaq və bu vədə nəinki 5 il, əksinə, daha az zaman, yəni 4 il müddətində nail olundu, bütün çadır şəhərcikləri ləğv edildi.

İkincisi, qaçqın və məcburi köçkünlərin sosial müdafiəsinin əsas məsələ olaraq qabardılması. Bu kateqoriyadan olan insanların yaşayış vəziyyətinin yaxşılaşdırılması və məşğulluğun artırılmasına dair 2004-cü ildə qəbul edilmiş dövlət proqramının icrası çox uğurla aparıldı. Bu müddət ərzində məcburi köçkünlərin həyat şəraitində, maddi təminatında ciddi dönüşlər olmuş, onlar bütün təminatı olan yeni qəsəbələrə köçürülmüşdür. Sözügedən proses indi də davam etməkdədir.

Üçüncüsü, yoxsulluğun aradan qaldırılması üçün daha səmərəli tədbirlərin görülməsi. Ümumiyyətlə, Prezident İlham Əliyev dəfələrlə vurğulamışdır ki, sosial-iqtisadi hüquqların müdafiəsi sahəsində dövlətin əsas vəzifəsi mütərəqqi iqtisadi və sosial islahatları həyata keçirmək, iqtisadi inkişaf prosesində hər bir vətəndaşın iştirakını təmin etmək, mövcud potensialdan hər bir fərdin bacarıq və qabiliyyətinə görə ədalətli şəkildə yararlanmasına şərait yaratmaqdır. Praqmatizmə və real əməli işlərə söykənən siyasətin əsas məğzində məhz insan və şəxsiyyət amili dayanır. Bunun nəticəsidir ki, əgər 2003-cü ildə yoxsulluq şəraitində yaşayanların sayı 49 faiz idisə, artıq bu rəqəm 13 faizə kimi azalıb. Bu, onu göstərir ki, Azərbaycanda uğurlu iqtisadi inkişaf, iqtisadi islahatlar ilk növbədə, insanların yaşayış səviyyəsinin yaxşılaşmasına xidmət edir. Həmçinin aztəminatlı vətəndaşların sosial müdafiəsi, istehsalçı və istehlakçının maraqlarının uzlaşdırılması, bir sözlə, sosial-liberalizm xətti cənab İlham Əliyevin prezidentlik dövrünü səciyyələndirən prioritet istiqamətlərdən biri kimi diqqəti çəkir.

Dördüncüsü, 800 minə qədər yeni iş yerinin açılması. Azərbaycan Prezidentinin elmi əsaslara söykənən sosial-iqtisadi siyasəti nəticəsində 2003-cü ilin sonlarından bəri respublikada məhz göstərilən sayda yeni iş yeri açılmış, yüzlərlə təhsil, səhiyyə, mədəniyyət obyektləri tikilmiş, əhalinin sosial müdafiəsinin möhkəmləndirilməsi üçün real resursların dayanıqlı mənbəyi yaradılmışdır.

Beşincisi, regionların iqtisadi inkişafı və aqrar islahatların növbəti mərhələsilə bağlı dövlət proqramlarının hazırlanması. Regionlara yüksək diqqət və qayğının bariz təcəssümü kimi 11 fevral 2004-cü il tarixdə imzalanmış birinci "Azərbaycan Respublikası regionlarının sosial-iqtisadi inkişafı (2004-2008-ci illər) Dövlət Proqramı"nda bölgələrin tarazlı və davamlı inkişafı, sosial infrastrukturun yeniləşdirilməsi, sahibkarlığın, özəl sektorun yüksəlişi, ölkə iqtisadiyyatının neft amilindən asılılığının aradan qaldırılması üçün kompleks tədbirlər müəyyənləşdirilmişdi. Fundamental əhəmiyyətli bu proqram ölkəmizin sosial-iqtisadi yüksəlişində müstəsna rol oynamışdır və cənab İlham Əliyev Azərbaycanın ayrı-ayrı bölgələrinə ardıcıl səfərləri zamanı sənədin icrası vəziyyəti ilə yerində tanış olmuş, görülən işlərin səmərəliliyini artırmaq üçün icra strukturlarının rəhbərlərinə müvafiq tapşırıqlar vermişdir. Proqram çərçivəsində yerlərdə çoxlu sayda sosial, mədəni, infrastruktur obyektləri istifadəyə verilmiş, energetika və kommunal xidmətin səviyyəsi əhəmiyyətli dərəcədə yaxşılaşmış, bütövlükdə regionların siması müsbətə doğru xeyli dəyişmişdir. Bu istiqamətdə fəaliyyətin davam etdirilməsi məqsədilə regionların sosial-iqtisadi inkişafı ilə bağlı 2009-2013-cü illər üçün növbəti proqram hazırlanıb və uğurla həyata keçirilməkdədir.

Altıncısı, sahibkarlara qayğının artırılması. Bu gün Azərbaycan Prezidentinin bilavasitə qayğısı nəticəsində ölkədə güclü sahibkarlar ordusu formalaşmışdır və sahibkarlığın daha da inkişaf etdirilməsi üçün dövlət tərəfindən hər cür şərait yaradılır. Hər il sahibkarlığın inkişafına böyük məbləğdə vəsaitin ayrılması, güzəştli şərtlərlə kreditlərin verilməsi, kənd təsərrüfatının inkişafı üçün dövlət tərəfindən ayrılan subsidiyalar, alınan texnika, verilən dəstək və bütövlükdə sahibkarlara Prezident tərəfindən verilən həm mənəvi-siyasi dəstək, həm də əməli-praktik dəstək qeyri-neft sektorunun inkişafında çox böyük dönüşə səbəb olmuşdur.

Yeddincisi, transmilli layihlər çərçivəsində ölkədə yeni infrastrukturun yaradılmasına nail olunması. Məlum reallıqdır ki, indi Azərbaycanın bütün bölgələrində geniş abadlıq-quruculuq işləri aparılır və bu, ölkəmizin simasının əhəmiyyətli dərəcədə dəyişməsinə gətirib çıxarmışdır. Tarixiliklə müasirliyi özündə təcəssüm etdirən Azərbaycanın bir çox şəhərləri artıq gözəlliklərinə görə Avropanın meqapolislərilə müqayisə edilməkdədir.

Səkkizincisi, güclü ordu. Dövlət başçısının dəfələrlə bəyan etdiyi kimi, bu gün Azərbaycan Ordusu regionun ən güclü, təminatlı, modern ordusudur. Milli Ordunun müdafiə qüdrətinin və döyüş qabiliyyətinin artırılması, maddi-texniki təchizatının yaxşılaşdırılması, o cümlədən hərbi qulluqçuların sosial müdafiəsi tədbirlərinin gücləndirilməsi cənab İlham Əliyevin diqqət mərkəzindədir. Ali Baş Komandan Ermənistan-Azərbaycan, Dağlıq Qarabağ münaqişəsinin sülh yolu ilə həllinin mümkün olmayacağı təqdirdə, xalqın öz torpaqlarını azad etmək üçün silaha sarılacağını gizlətmir və Silahlı Qüvvələrin buna tam qadir olduğunu bəyan edir.

Demokratiya hamisi

Doqquzuncusu, güclü demokratik inkişaf. Azərbaycan Prezidenti İlham Əliyevin vurğuladığı kimi, demokratik proseslərin davamlı şəkildə aparılmadığı hansısa dövlətin iqtisadi sahədə davamlı və yüksək nəticələr əldə etməsi, beynəlxalq arenada layiqli yerini tutması, insan hüquqlarının təminatı sahəsində mühüm irəliləyişlərə nail olması mümkün deyildir: "Azərbaycanda siyasi islahatlar çox cəsarətlə aparılır. Bu da bizim prinsipial və düşünülmüş seçimimizdir. İqtisadi islahatlar və siyasi islahatlar ölkəmizin inkişafı üçün çox möhkəm zəmin yaradır. Biz bu iki amili bərabər, paralel şəkildə həyata keçiririk və gözəl zəmin əsasında güclü dövlət quruculuğu prosesi gedir. Bu zəmin əsasında Azərbaycanda güclü sosial siyasət aparılır".

Ümumiyyətlə, Prezident İlham Əliyev ilk gündən bildirmişdir ki, hər bir dövlətin davamlı iqtisadi inkişafını şərtləndirən mühüm amillərdən biri məhz demokratikləşmə prosesinin sürətləndirilməsi və bu prosesin tərkib hissəsi olaraq vətəndaş cəmiyyəti institutlarının inkişafı, insan və vətəndaş hüquq və azadlıqlarının müdafiəsi naminə təkmil mexanizmlərin formalaşdırılmasıdır. İnkişaf etmiş sivil ölkələrin təcrübəsi də göstərir ki, ictimai-siyasi həyatın bütün sahələri üzrə dövlətin hüquqi bazasının möhkəm təməllər üzərində qurulması, ictimai ədalət prinsiplərinə ciddi riayət olunması sabitliyin, vətəndaş həmrəyliyinin və dinamik iqtisadi inkişafın başlıca təminatlarından biridir.

Ötən 6 ildə respublikamızda cəmiyyətin təkamül sistemini, dövlət idarəçilik mexanizmlərinin səmərəli fəaliyyətini tənzimləyən qanunların müasirləşdirilməsi və təkmilləşdirilməsi davamlı prosesə çevrilmişdir. Bu istiqamətdə həyata keçirilən islahatlar, tətbiq olunan mütərəqqi yeniliklər zamanın tələbi ilə səsləşmiş, cəmiyyətin inkişaf ahənginə adekvat olmuş, ən başlıcası, insan və vətəndaş hüquq və azadlıqlarının təmini məsələlərini özündə maksimum səviyyədə ehtiva etmişdir. Bu baxımdan Prezident İlham Əliyevin "Azərbaycan Respublikasında insan hüquqlarının müdafiəsi üzrə Milli Fəaliyyət Planının təsdiq edilməsi haqqında" 28 dekabr 2006-cı il tarixli sərəncamı ölkədə insan hüquq və azadlıqlarının təmini istiqamətində daha qətiyyətli və prinsipial addımların atılmasına imkan yaratmışdır.

Bununla yanaşı, qeyri-hökumət təşkilatlarının vətəndaş cəmiyyəti quruculuğu prosesindəki müstəsna rolunu nəzərə alan cənab İlham Əliyev onların dövlətlə sıx əməkdaşlığının təmin olunmasına xidmət edən ardıcıl tədbirlər həyata keçirir. Azərbaycan Prezidentinin "Azərbaycan Respublikasının qeyri-hökumət təşkilatlarına dövlət dəstəyi Konsepsiyasının təsdiq edilməsi haqqında" 27 iyul 2007-ci il tarixli sərəncamının əsas məqsədi də məhz dövlət orqanları ilə qeyri-hökumət təşkilatları arasında tərəfdaşlıq münasibətlərinin sabit və səmərəli sisteminin yaradılması, qeyri-hökumət təşkilatlarının dövlət və cəmiyyətin inkişafı üçün əhəmiyyət daşıyan problemlərin həllinə cəlb olunması, vətəndaş cəmiyyətinin inkişafının sürətləndirilməsidir.

Cənab İlham Əliyevin ölkədə siyasi barışığın, vətəndaş həmrəyliyinin və sülhünün təmin olunması, əksqütblü qüvvələr arasında etimad mühitinin formalaşdırılması istiqamətində atdığı addımlar onun ədalətli rəhbər obrazını şərtləndirən amillər sırasında xüsusi vurğulana bilər. Bununla yanaşı, ölkədə sabitliyin daha da möhkəmləndirilməsindən tutmuş, təhsil, səhiyyə, mədəniyyət və digər sahələrdə də Prezident İlham Əliyevin uğurlu fəaliyyəti və bu fəaliyyətin nəticələrinin hər bir azəbaycanlının öz həyatında müsbət mənada hiss etməsi barədə geniş söhbət açmaq mümkündür. Bütün bunlar dövlət başçısının daxildə həyata keçirdiyi siyasətin nə qədər çoxqütblü olduğunu və sürətli inkişafa yol açdığını bir daha nümayiş etdirir. Bu gün Azərbaycanda elə bir sahə yoxdur ki, o sahə üçün xüsusi konkret proqram olmasın. İndi ölkəmizdə hər bir istiqamət üzrə konkret iş cədvəli mövcuddur və hər istiqamət üzrə konkret proqramlar, onların maddi təminatı, çox işlək icra mexanizmləri var. Bir sözlə, Azərbaycanın hərtərəfli inkişafı üçün bütün şərait yaradılıbdır.

Millətlər içində Azərbaycan imzası

Azərbaycan təkcə daxildə yox, beynəlxalq aləmdə aparıcı dövlətlərdən birinə çevrilib. Hazırda Cənubi Qafqazın şəksiz lideri sayılan Azərbaycan bu gün dünyanın siyasi həyatında oynadığı roldan, tutduğu mövqedən, böyük və kiçikliyindən asılı olmayaraq, dünyanın bir çox dövlətləri üçün vacib tərəfdaşlardan biridir.

Şərqlə Qərbi birləşdirən geostrateji tranzit xətlərinin, qlobal enerji layihələrinin başlıca təminatçısına çevrilən Azərbaycan xarici siyasətdə son altı il ərzində də böyük dərəcədə öz mövqelərini möhkəmləndirə bilmişdir. Prezident İlham Əliyev dünya siyasətinə əsaslı təsir imkanları olan dövlətlərlə qarşılıqlı faydalı əməkdaşlığı genişləndirmək, inkişaf etdirmək, beynəlxalq təşkilatlarda Azərbaycanın mövqelərini gücləndirmək istiqamətində böyük səy və əzmkarlıq göstərərək bu sahədə də tarixi uğurlara imza atmışdır. İlk növbədə, balanslaşdırılmış xarici siyasət nəticəsində Azərbaycan beynəlxalq mövqelərini və milli təhlükəsizliyini möhkəmləndirə bilmiş, qlobal məkanda cərəyan edən proseslərin istiqamətverici subyektlərindən birinə çevrilməyə nail olmaq kimi mühüm nailiyyətlər əldə etmişdir. Bütün bunların fonunda qlobal və yerli təhlükəsizlik maraqlarının uzlaşdırılması Azərbaycanın ictimai-siyasi cəhətdən sabit, iqtisadi cəhətdən sürətlə inkişaf edən, eyni zamanda beynəlxalq miqyasda maraq və mənafeyini layiqincə təmin edən dövlətə çevrilməsilə nəticələnmişdir. Bununla bağlı Prezident İlham Əliyev qeyd etmişdir: "Biz bütün ölkələrlə ikitərəfli surətdə faydalı əməkdaşlığın dərinləşməsində maraqlıyıq, bunu edirik və bizim təşəbbüslərimiz bu məqsədi güdür. Xarici siyasətdə Azərbaycan böyük dərəcədə öz mövqelərini möhkəmləndirə bilmişdir. Bizim regional müstəvidə təşəbbüslərimiz həm regional əməkdaşlığın möhkəmlənməsinə xidmət göstərir, həm də Azərbaycanın maraqlarına uyğundur. Əminəm ki, bölgədə bizimlə əməkdaşlıq edən ölkələr də bu əməkdaşlıqdan razıdır. Bizim bütün təşəbbüslərimiz bu məqsədi güdür ki, bölgədə sülh, sabitlik daha da möhkəm olsun, iqtisadi əməkdaşlıq sürətlənsin və bölgədə yerləşən bütün ölkələr sülh, sabitlik, dostluq şəraitində yaşasınlar".

Ulu öndər Heydər Əliyevin müəllifi olduğu yeni neft strategiyasının məntiqi nəticəsi olan Bakı-Tbilisi-Ceyhan əsas ixrac boru kəmərinin, eləcə də Bakı-Tbilisi-Ərzurum qaz kəmərinin istismara verilməsinə nail olmaqla Prezident İlham Əliyev Azərbaycanın beynəlxalq sferada mövqelərinin daha da gücləndirilməsini, onun xarici investisiyalar üçün açıq və cəlbedici dövlət imicinin formalaşmasını, etibarlı tərəfdaş imici qazanmasını da təmin etmişdir. Bütün bunların məntiqi nəticəsi olaraq Azərbaycanın son illər dünya enerji bazarında çəkisinin və rolunun xeyli dərəcədə artması Avropa dövlətlərinin respublikamızla bu sektorda sıx əməkdaşlığa can atmasına gətirib çıxarmışdır. İndi Azərbaycanın qlobal enerji təhlükəsizliyində mühüm rol oynaması istər Avropa, istər ABŞ, istərsə də dünyanın bir çox digər dövlətləri, aparıcı beynəlxalq təşkilatlar tərəfindən birmənalı şəkildə etiraf edilməkdə, danılmaz reallıq kimi qəbul olunmaqdadır. Buna görədir ki, Avropanın enerji təhlükəsizliyində mühüm rol oynayacaq Nabukko layihəsinin reallaşmasında Azərbaycan əsas ümid yeri kimi qəbul olunur. Perspektivdə isə Şimal və Cənubun genişmiqyaslı əməkdaşlığına böyük imkanlar yaradacaq Bakı-Tbilisi-Qars dəmir yolu xəttinin tikintisi durur.

Azərbaycan Prezidentinin xarici siyasət kursu müstəqil dövlətimizin milli mənafelərinə hörmətlə yanaşan bütün beynəlxalq təşkilatlar və xarici dövlətlərlə əməkdaşlıq əlaqələrinin daha da genişləndirilməsi müstəvisi üzərində qurulmuşdur. Avropa ailəsinə inteqrasiya edən Azərbaycanın Avropa Şurası qarşısında götürülən öhdəliklərin yerinə yetirilməsi prosesi başa çatmış, ölkəmiz Avropa Birliyinin "Yeni Qonşuluq Siyasəti" və "Şərq tərəfdaşlığı" proqramına, habelə NATO-nun "Fərdi əməkdaşlıq üzrə fəaliyyət planı"na qoşulmuş və modern ordu quruculuğunu təşkilatın standartlarına uyğunlaşdırmaq istiqamətində mühüm addımlar atmışdır.

Bütün bunlar bir daha müstəqil Azərbaycanın son 6 ildə Prezident İlham Əliyevin rəhbərliyi altında ciddi nailiyyətlərə imza atması, sürətli iqtisadi inkişaf tempi ilə dünyada lider mövqelərini qoruyub saxlamasının əyani göstəricisi hesab oluna bilər. Ölkəmizin ən böyük nailiyyətlərindən biri isə, zamanın sürət parametrinin nəzarətə alınması, onun Azərbaycanın inkişafına uyğunlaşdırılması, bunun məntiqi nəticəsi olaraq, qısa müddətdə nəhəng uğurların əldə edilməsi kimi möcüzənin gerçəkliyə çevrilməsidir. Bütün bunları layiqincə qiymətləndirməyi bacaran Azərbaycan xalqı Prezident İlham Əliyevi davamlı inkişafın, sabitliyin reallaşmasının təminatçısı hesab edir. Elə buna görə də Prezident İlham Əliyev o öndərlərdəndir ki, xalqının tam dəstəyini qazana bilib.

Beləliklə, altı il ərzində əldə olunan yeni nailiyyətlər, Azərbaycanın daxili və beynəlxalq uğurları, regionda və dünyada dinamik inkişaf edən ölkə imici Prezident İlham Əliyevin simasında əsl lider obrazını yarada bilmişdir. Azərbaycan xalqının misilsiz dəstəyinə və etimadına malik olan Prezident İlham Əliyevin rəhbərliyi altında ölkəmizin daha böyük nailiyyətlərə imza atacağı isə bu gün respublika vətəndaşları ilə yanaşı, beynəlxalq ictimaiyyətin də birmənalı rəyi, yekun qənaətidir!

Zahid CƏFƏROV,

Bakı Dövlət Universitetinin dosenti,

hüquq elmləri namizədi

Azərbaycan.- 2009.- 9 oktyabr.- S. 2.