Görkəmli şərqşünas alim Aida İmanquliyevanın 70 illik yubileyi münasibətilə gənc tədqiqatçılar arasında keçirilən müsabiqəyə yekun vurulmuşdur

Ailə, Qadın və Uşaq Problemləri üzrə Dövlət Komitəsi və AMEA-nın Şərqşünaslıq İnstitutunun görkəmli şərqşünas alim, professor Aida İmanquliyevanın 70 illik yubileyi münasibətilə gənc tədqiqatçılar arasında keçirdikləri müsabiqəyə oktyabrın 8-də yekun vurulmuş, qaliblər mükafatlandırılmışlar.

Görkəmli şərqşünas alim, pedaqoq, filologiya elmləri doktoru, professor Aida İmanquliyevanın 70 illik yubileyinə həsr olunmuş konfransda onun şərəfli ömür yoluna və çoxşaxəli yaradıcılığına, elmi fəaliyyətinə bir daha ətraflı nəzər salınmışdır.

Komitənin sədri Hicran Hüseynova XX əsrin görkəmli ziyalılarından, elm təşkilatçılarından biri olan Aida İmanquliyevanın 70 illik yubileyinin ölkəmizin elmi ictimaiyyəti üçün əlamətdar hadisə olduğunu bildirmişdir. Nəcib insan, gözəl alim Aida xanım İmanquliyeva şərqşünaslıq elminə böyük töhfələr verdiyi kimi, həm də öz ardıcıllarını yetişdirmiş, gənc alimlərə diqqət və qayğı ilə yanaşmış, onlara elmi potensiallarının üzə çıxmasında dəstək olmuşdur. "Ərəb filologiyası sahəsində gənc alimlərin ən yaxşı elmi-tədqiqat əsəri" adlı müsabiqə də görkəmli alimin xatirəsinə həsr olunmuşdur.

Şərqşünaslıq İnstitutunun direktoru, Milli Məclisin deputatı Gövhər Baxşəliyeva Azərbaycanda ərəbşünaslıq üzrə ilk qadın filologiya elmləri doktoru Aida İmanquliyevanın ərəb məhcər ədəbiyyatının tədqiq olunmasında məxsusi xidmətlərindən danışmışdır. Demişdir ki, professor A.İmanquliyeva dərin nəzəri bilikləri, analitik təfəkkürü, zəngin mütaliəsi, bir neçə Şərq və Qərb dillərini mükəmməl bilməsi sayəsində apardığı tədqiqatlar və yazdığı əsərlər ona nəinki keçmiş Sovetlər Birliyində, hətta bir sıra xarici ölkələrdə geniş şöhrət qazandırmışdır. Alim AMEA-nın Şərqşünaslıq İnstitutuna rəhbərlik etdiyi illərdə bu elm ocağının təkmilləşdirilməsi üçün böyük işlər görmüş, gözəl alimlər hazırlamışdır. Onun yetirmələrinin çoxu indi elmlər doktorudur və Aida xanımın elmi məktəbini uğurla davam etdirirlər. Yubileyi münasibətilə gənc alimlər arasında keçirilən müsabiqə isə böyük əhəmiyyət daşıyır.

Konfransda çıxış edən Bakı Dövlət Universiteti ilahiyyat fakültəsinin dekanı, akademik Vasim Məmmədəliyev demişdir ki, Aida İmanquliyeva dövlət işində müvəffəqiyyətlə çalışan, elmi fəaliyyətlə ciddi məşğul olan istedadlı alim idi. Onu təkcə Azərbaycanda deyil, bir çox xarici ölkələrdə də tanıyırdılar. Aida İmanquliyevanın elmi araşdırmalarının zirvəsi olan "Yeni ərəb ədəbiyyatı korifeyləri" monoqrafiyası keçmiş ittifaq, o cümlədən Azərbaycan şərqşünaslığında mühüm hadisə olmuşdur.

Alimin ərəb ədəbiyyatına dair məqalələri, beynəlxalq elmi konfrans və simpoziumlardakı çıxışları yeni ərəb ədəbiyyatının daha dərindən öyrənilməsi üçün ən gözəl mənbələrdən biridir. Bütün bilik və bacarığını Azərbaycan elminin tərəqqisinə həsr etmiş Aida xanım İmanquliyeva şərqşünaslıq elmimizi müxtəlif nüfuzlu beynəlxalq tədbirlərdə ləyaqətlə təmsil etmişdir.

Aida İmanquliyevanın 70 illik yubileyinə həsr olunan "Ərəb filologiyası sahəsində gənc alimlərin ən yaxşı elmi-tədqiqat əsəri" müsabiqəsinin nəticələri elan olunmuşdur. Bildirilmişdir ki, müsabiqədə magistr, aspirant, dissertant və alimlər iştirak etmişlər. Müsabiqəyə 15 elmitədqiqat əsəri təqdim olunmuşdu. Nüfuzlu alim-ərəbşünaslar, təcrübəli elm xadimlərinin daxil olduğu münsiflər heyəti araşdırmadan sonra üç ən yaxşı elmi işin müəllifini qalib elan etmişdir. Birinci yerin qalibi, filologiya elmləri namizədi Bəsirə Əzizəliyevaya mükafatı alimin qızı, Moskva Dövlət Universitetinin Bakı filialının rektoru, professor Nərgiz Paşayeva təqdim etmişdir.

Sonra digər qaliblərə də mükafatlar verilmiş, müsabiqənin 12 iştirakçısına isə diplomlar təqdim olunmuşdur.

1-ci yerin qalibi B.Əzizəliyeva çıxış edərək görkəmli şərqşünas alim A.İmanquliyevanın əlamətdar yubileyi münasibətilə keçirilən müsabiqənin qalibi olmasından iftixar hissi duyduğunu bildirmişdir.

Daha sonra konfrans iştirakçıları görkəmli şərqşünas alim A.İmanquliyevanın məzarını ziyarət etmiş, xatirəsini ehtiramla anmışlar.

Oktyabrın 9-dan 11-dək Bakıda alimin yubileyinə həsr edilən "Şərq və Qərb: ortaq mənəvi dəyərlər, elmi-mədəni əlaqələr" mövzusunda Beynəlxalq İbn Ərəbi Simpoziumu keçiriləcəkdir. Tədbirdə alimin zəngin tədqiqatları və araşdırmalarına dair müzakirələr aparılacaqdır.

AzərTAc

Azərbaycan.- 2009.- 9oktyabr.- S. 4.