Gəncədə görkəmli şərqşünas alim Aida İmanquliyevanın 70 illiyinə həsr olunmuş elmi-praktiki konfrans keçirilmişdir

AMEA Gəncə Regional Elm Mərkəzində Azərbaycan şərqşünaslığının görkəmli nümayəndəsi, Şərq-Qərb problematikasının sistemli şəkildə ilk tədqiqatçısı Aida xanım İmanquliyevanın anadan olmasının 70 illiyinə həsr olunmuş "Şərq və Qərb: ortaq mənəvi dəyərlər" mövzusunda elmi-praktiki konfrans keçirilmişdir.

Gəncə Şəhər İcra Hakimiyyəti başçısının müavini Akif Ələkbərov Azərbaycan şərqşünaslığının görkəmli və parlaq nümayəndələrindən biri, filologiya elmləri doktoru professor Aida xanım İmanquliyevanın şərqşünaslıq elminə bəxş etdiyi töhfələrdən danışmışdır.

Gəncə Elm Mərkəzinin direktoru, əməkdar elm xadimi, professor Fuad Əliyevin "Aida xanımın həyat və yaradıcılığı", əməkdar elm xadimi professor Xəlil Yusifovun "Azərbaycan ədəbiyyatında Şərq-Qərb münasibətləri", tarix elmləri namizədi Samir Pişnamazovun "Aida xanım İmanquliyeva Azərbaycanda Şərq-Qərb problematikasının ilk tədqiqatçısıdır" mövzularında məruzələri dinlənildikdən sonra çıxışlar olmuşdur.

Məruzə və çıxışlarda görkəmli şərqşünas alimin ərəb filologiyası sahəsində nəhəng elmi-tədqiqat işlərindən, bu sahədə onun yazdığı üç fundamental monoqrafiyanın əhəmiyyətindən geniş söhbət açılmışdır.

Konfransda AMEA-nın Gəncə Regional Elm Mərkəzi tərəfindən nəşr edilmiş "Şərqşünaslıq səmasının sönməz ulduzu" adlı kitabı da təqdim edilmişdir.

AzərTAc

Azərbaycan.- 2009.- 9 oktyabr.- S. 4.