Oyanan Şərqin vicdan səsi

Azərbaycanın mədəni və ictimai fikrinin inkişafı yolunda mühüm xidmətlər göstərmiş Cəlil Məmmədquluzadənin 140 illik yubileyinin respublika səviyyəsində qeyd olunmasının təmin edilməsi məqsədilə Azərbaycan Respublikasının Prezidenti cənab İlham Əliyev 6 fevral 2009-cu il tarixdə sərəncam imzalamışdır. Bu sərəncamdan irəli gələn vəzifələrin yerinə yetirilməsi üçün cari ilin əvvəlindən ölkəmizdə, xüsusilə də ədibin vətəni Naxçıvan Muxtar Respublikasında müxtəlif səpkili tədbirlər keçirilmiş, ədibin xatirəsi yad olunmuş, universitetin Tələbə Teatr Studiyasının quruluşunda məşhur "Ölülər" tragikomediyası səhnələşdirilərək geniş tamaşaçı kütləsinə təqdim edilmişdir.

Silsilə tədbirlərin davamı olaraq Naxçıvan Dövlət Universitetinin Jurnalistika və dünya ədəbiyyatı kafedrası "Cəlil Məmmədquluzadə və müasir dünyaya baxış" adlı elmi konfrans təşkil etmişdir.

Universitetin rektoru, akademik İsa Həbibbəyli tədbiri giriş sözü ilə açmış, böyük ustadın millətinin cəhalətdən, mövhumatdan, gerilikdən qurtulmaq yolundakı yorulmaz fəaliyyətindən ətraflı danışmış, Mirzə Cəlil yaradıcılığını oyanan Şərqin vicdan səsi kimi qiymətləndirmişdir. Natiq qeyd etmişdir ki, Azərbaycan ədəbiyyatının görkəmli nümayəndəsi, böyük yazıçı, dramaturq, publisist və ictimai xadim Cəlil Məmmədquluzadənin zəngin irsi, bədii-estetik düşüncəsi tariximizin parlaq səhifələrindəndir.

Tədbirdə NDU-nun Jurnalistika və dünya ədəbiyyatı kafedrasının müəllimləri, tarix elmləri namizədi Vaqif Məmmədov "Molla Nəsrəddin"də erməni xisləti", filologiya elmləri namizədi Şəhla Şirəliyeva "Cəlil Məmmədquluzadə yaradıcılığının ekran həyatı", filologiya elmləri namizədi Xumar Məmmədova "Molla Nəsrəddin" mövzusu müasir Amerika elmi-ədəbi mənbələrində", kafedra müdiri, filologiya elmləri namizədi Seyid Surə "Satirik gülüşün qüdrəti", universitetin mətbuat şöbəsinin müdiri, filologiya elmləri namizədi Mehriban Sultan "Cəlil Məmmədquluzadə və demokratik cəmiyyət quruculuğu tariximiz" mövzularında məruzələr etmişlər. Qeyd olunmuşdur ki, klassik Azərbaycan və dünya bədii fikir ənənələrindən, xalq yumorundan məharətlə bəhrələnən sənətkarın milli oyanışa səsləyən yaradıcılığı həm Qafqaz xalqlarının, həm də bir sıra Şərq ölkələrinin ədəbiyyatlarına böyük təsir göstərmişdir. Vurğulanmışdır ki, ədibin yüz il əvvəl yaratdığı "Ölülər", milli vəhdət ideyasının carçısına çevrilmiş "Anamın kitabı", eləcə də digər dram, nəsr və publisist əsərləri Azərbaycanın çoxəsrlik söz xəzinəsinin qiymətli incilərini təşkil edir. Cəlil Məmmədquluzadənin təşəbbüsü, redaktorluğu və naşirliyi ilə çap olunan "Molla Nəsrəddin" jurnalının ölkənin ədəbi-publisistik həyatında müstəsna rol oynamasından, milli məfkurənin formalaşmasına layiqli töhfə verməsindən bəhs olunmuşdur.

Konfrans tələbələrin ifasında Mirzə Cəlilin əsərlərindən parçaların qiraəti ilə yekunlaşmışdır.

Tədbirdə Cəlil Məmmədquluzadənin həyat və yaradıcılığını əks etdirən videoslayd da nümayiş olunmuşdur.

Nərmin CƏFƏROVA

Azərbaycan.- 2009.- 9 oktyabr.- S. 4.